တရုတ်-မြန်မာနယ်စပ်တလျှောက် ကိုးကန့်တပ်ဖွဲ့ MNDAA ထိန်းချုပ်ထားသည့် မုံးကိုးမြို့အနီးတွင် နယ်စပ်လုံခြုံရေး အတွက် (၉) ရက်တာ ကင်းလှည့်စောင့်ကြည့်ခဲ့ကြောင်း သတင်းသိရသည်။
ဩဂုတ်လ (၂၅) ရက်မှ စတင်ပြီး စက်တင်ဘာလ (၄) ရက်အထိ တရုတ်-မြန်မာ နယ်စပ်တလျှောက် လုံခြုံရေး လှည့်လည်စောင့်ကြပ်ခြင်းကို ကိုးကန့်တပ်ဖွဲ့ MNDAA ထိန်းချုပ်ထားသည့် မူဆယ်မြို့နယ် မုံးကိုးမြို့နှင့် မုံးပေါ်ဒေသတို့တွင် (၉) ရက်တာ ပြုလုပ်ခဲ့ကြောင်း ကိုးကန့်သတင်းကွန်ရက်မှ ယနေ့ (စက်တင်ဘာလ ၅ ရက်) တွင် ထုတ်ပြန်သည်။
တရုတ်နိုင်ငံတွင် ကမ္ဘာ့ဖက်ဆစ်ဆန့်ကျင်ရေး စစ်ပွဲအောင်နိုင်ခြင်း နှစ် (၈၀) ပြည့် အထိမ်းအမှတ် စစ်ရေးပြပွဲ ကျင်းပစဉ် တရုတ်-မြန်မာ နယ်စပ်လုံခြုံရေး ကင်းလှည့်စောင့်ကြည့်ခြင်းကို MNDAA လက်အောက်ခံ အထူးဒေသ(၁) အုပ်ချုပ်ရေးကော်မတီက ကြေညာချက်ထုတ်ပြန်ကာ အချိန်မီ တုံ့ပြန်ဆောင်ရွက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြထားသည်။
ထိုသို့ တရုတ်နယ်စပ်တလျှောက် ကင်းလှည့်စောင့်ကြည့်ရန် MNDAA ဘက်မှ မူဆယ်မြို့နယ် အတွင်းရှိ မုံးကိုးမြို့နှင့် မုံးပေါ်ဒေသ နယ်စပ်လမ်းကြောင်း (၅) ခုတွင် ခြေလျင်နှင့် ယာဉ်ဖြင့် စောင့်ကြပ်ခြင်းနည်းလမ်းကို ပေါင်းစပ်ကာ ကားလမ်းနှင့် တောတောင်များတွင် နေ့စဉ်မပြတ် ကင်းလှည့်စောင့်ကြည့်ခဲ့ကြောင်း ဆိုသည်။
အလားတူ စက်တင်ဘာလ (၃) ရက်နေ့တွင် ကျရောက်ခဲ့သည့် ကမ္ဘာ့ဖက်ဆစ်ဆန့်ကျင်ရေး စစ်ပွဲ အောင်နိုင်ခြင်း နှစ် (၈၀) ပြည့် အထိမ်းအမှတ် အခမ်းအနားများကို MNDAA ထိန်းချုပ်ထားသည့် လောက်ကိုင်မြို့နယ် တာရွှေထန်ကျေးရွာတွင် ကျင်းပခဲ့ပြီး MNDAA ခေါင်းဆောင် ဖုန်တာ့ရွှင် ကိုယ်တိုင် တက်ရောက်ခဲ့ကြောင်း ဓာတ်ပုံမှတ်တမ်းများတွင် တွေ့ရသည်။
တချိန်တည်းတွင် ညီနောင်မဟာမိတ်တပ်များ ပူးတွဲထိန်းချုပ်ထားသည့် မူဆယ်မြို့နယ် (၁၀၅) မိုင် မိုင်းယုကျေးရွာတွင်လည်း ကမ္ဘာ့ဖက်စစ်ဆန့်ကျင်ရေးစစ်ပွဲ အောင်နိုင်ခြင်း အခမ်းအနားကို ကျင်းပြခဲ့ပြီး MNDAA ထိပ်ပိုင်းခေါင်းဆောင်များအပြင် ဒေသခံ ပြည်သူနှင့် ကျောင်းသားများ (၃၀၀) ကျော် တက်ရောက်ခဲ့ကြောင်း သိရသည်။
Leave a Comments