သျှမ်းပြည် တောင်ကြီးမြို့မှ ဟိုပုံးမြို့နယ်အတွင်း ခရီးသွားခဲ့သည့် အမျိုးသားနှစ်ဦးသည် တစ်နှစ်ကျော်ကြာ အဆက်အသွယ် ပြတ်တောက်ပြီး ပျောက်ဆုံးနေကြောင်း သတင်းရရှိသည်။
အဆိုပါ ပျောက်ဆုံးသွားသူ လူငယ်နှစ်ဦးသည် သိန္နီမြို့ဒေသခံနှင့် ကျောက်မဲမြို့ဒေသခံ အသက် ၂၅ နှစ်ဝန်းကျင်ရှိ စိုင်းတုမ်လိန်ခမ်းနှင့် အသက် ၃၀ နှစ်ဝန်းကျင်ရှိ စိုင်းကျော်မြင့် ဟု သိရပြီး မိသားစုဝင်များက စိုးရိမ်နေကြကြောင်း သိရသည်။
ထိုအမျိုးသားနှစ်ဦးသည် တောင်ကြီးမြို့တွင် သွားရောက်နေထိုင်သူများဖြစ်ပြီး ဟိုပုံးမြို့နယ် အတွင်း ခရီးထွက်စဉ် မိုင်းပျဉ်းကျေးရွာအုပ်စု ဖာလိုင်းရွာ အနီးတဝိုက်တွင် ယမန်နှစ် ၂၀၂၄ သြဂုတ်လ ၂၆ ရက်မှ စတင်ပြီး အဆက်အသွယ် ပြတ်သွားရာမှ ယနေ့ (စက်တင်ဘာလ ၄ ရက်) အထိ ပျောက်ဆုံးနေကြောင်း ပျောက်ဆုံးသူလူငယ်တစ်ဦး၏ မိသားစုဝင်က သျှမ်းသံတော်ဆင့်ကို ပြောသည်။
“ကျနော်ရဲ့ ညီက တောင်ကြီးမှာ ကျောင်းသွားတက်တာပါ။ သူတို့နှစ်ယောက် ဟိုပုံးဘက်သွားရင်း လမ်းမှာ ပျောက်သွားတာ။ သူ့ရဲ့ သူငယ်ချင်းကလည်း တောင်ကြီးမှာ အမျိုးတွေနဲ့ နေတာ။ ပျောက်သွားတဲ့နေ့ကနေ လိုက်ရှာ စုံစမ်းတာ ကျနော်တို့လည်း အဆက်အသွယ် မရသေးဘူး။ သူ့ရဲ့ သူငယ်ချင်းဘက်က ဆွေမျိုးတွေလည်း ဘာမှ မသိရသေးဘူး ပြောတယ်”ဟု ၎င်းမိသားစုဝင် အမျိုးသားတစ်ဦးက ပြောသည်။
လက်ရှိ အချိန်ထိ ၁ နှစ်ကျော်ကြာ ပျောက်ဆုံးသွားသည့် အဆိုပါ လူငယ် အမျိုးသားနှစ်ဦးနှင့် ပတ်သက်ပြီး လိုက်လံစုံစမ်းနေသော်လည်း မည်သည့်ထူးခြားမှုမျှ မရှိသည့်အတွက် တွေ့ရှိပါက ဆက်သွယ် အကြောင်းကြားပေးရန် ပျောက်ဆုံးသူ လူငယ်တစ်ဦး၏ မိသားစုဝင်က အကူအညီတောင်းဆိုသည်။
“တွေ့ဖူးတဲ့လူတွေ ရှိရင်လည်း ပြောပေးကြပါ။ ကျနော်ညီကလည်း မိဘတွေ မရှိတော့ဘူး။ သိချင်တာက အခုထိ အသက်ရှင်သေးလား ဆိုတာလည်း မသိရသေးဘူး။ အဖွဲ့အစည်းတွေထဲမှာ ရှိသေးတယ် ဆိုရင်လည်း တွေ့ချင်တယ်။ အခုက ဘယ်မှာမှ သွားရှာမရဘူး”ဟု ပျောက်ဆုံးသူ လူငယ်တစ်ဦး၏ မိသားစုဝင်က ပြောသည်။
ပျောက်ဆုံးနေသည့် စိုင်းတုမ်လိန်ခမ်းနှင့် စိုင်းကျော်မြင့် တို့သည် သာမာန် အရပ်သားတစ်ဦး ဖြစ်ပြီး မည်သည့် အဖွဲ့အစည်း၊ လက်နက်ကိုင် အဖွဲ့အစည်းများနှင့် ပတ်သက်မှု မရှိကြောင်း မိသားစုဝင်များက ပြောသည်။
ထိုလူငယ်များ ပျောက်ဆုံးသွားသည့် ဟိုပုံးမြို့နယ် မိုင်းပျဉ်းကျေးရွာအုပ်စုတွင် စစ်ကော်မရှင်တပ်နှင့် ၎င်းလက်အောက်ခံ ပအိုဝ်းပြည်သူ့စစ် PNO တို့ လှုပ်ရှားနေသည့် နယ်မြေဖြစ်ကြောင်း သိရသည်။
စစ်တပ် အာဏာသိမ်းပြီးနောက် သျှမ်းပြည်အတွင်း ဒေသခံ ပြည်သူများ မကြာခဏ ဖမ်းဆီးခံရခြင်း၊ လူပျောက်ခြင်းများ ဖြစ်ပေါ်လေ့ရှိသည်။
Leave a Comments