သျှမ်းပြည်တောင်ပိုင်း၊ ဆီဆိုင်မြို့နယ် တောင်ရှေ့ကျေးရွာ အုပ်စု နောင်ထောင်ကျေးရွာတွင်းရှိ ဈေးဆိုင်ခန်းများကို စစ်ကော်မရှင် လက်အောက်ခံ ပအိုဝ်းပြည်သူ့စစ် PNOက ဖျက်ခိုင်းနေ ကြောင်း သတင်းရရှိသည်။

ပြီးခဲ့သည့် ဩဂုတ်လ ၉ ရက်တွင် ဆီဆိုင်မြို့နယ် နောင်ထောင်ကျေးရွာ၌ စစ်ကော်မရှင်တပ်နှင့် ၎င်း၏လက်အောက်ခံ PNO တို့နှင့် ပအိုဝ်းအမျိုးသားလွတ်မြောက်ရေးတပ်တော် PNLA တို့ တိုက်ပွဲပြင်းထန်စွာ ဖြစ်ပွားခဲ့ပြီး နောင်ထောင်အပါအဝင် အနီးနားကျေးရွာများကိုPNO/PNA ပြည်သူ့စစ် တို့က သိမ်းယူလိုက်သည်။

ထိုသို့ သိမ်းယူပြီးနောက် နောင်ထောင်ကျေးရွာရှိ ဈေးဆိုင်ခန်းများအားလုံးကို ဖျက်သိမ်းရန် ဆိုင်ရှင်များကို PNO/PNA ပြည်သူ့စစ်က အမိန့်ပေးခဲ့သည်။

“ဈေးဆိုင်ခန်းတွကို အကုန်ဖျက်ရမယ်တဲ့၊ ဆိုင်ခန်း အကောင်းတိုင်းရှိတဲ့ဟာလည်း အကုန်ဖျက်ရတယ်။ အခုဖျက်နေကြပြီ။ PNO/PNA သူတို့က ဖျက်ဖို့ ဖိအားပေးလို့ ဖျက်ရတာပေါ့။ အဲဖက်နယ်မြေက သူတို့ပဲ စိုးမိုးထားတာကို။ဈေးပြန်ဆောက်ဖို့ ဖျက်တယ် ပြောတာပဲ ပျက်စီးသွားရင်တော့ တမျိုး မပျက်စီးဘဲနဲ့ ဖျက်လိုက်တော့ စဉ်းစားစရာပဲ။” ဟု ဆီဆိုင်ဒေသခံ အမျိုးသားတစ်ဦးက ပြောသည်။

ထို့အပြင်နောင်ထောင်ကျေးရွာ၌ နေရပ်ပြန် စစ်ရှောင်အနည်းငယ်သာရှိပြီး ထိုသို့ ဈေးဖျက်လိုက်ခြင်းကြောင့် ပျံကျဈေးပုံစံဖြစ်သွားနိုင်ပြီး လူနေမှုမလုံခြုံတော့သည့်အပြင် ပစ္စည်းများလည်း စိတ်ချထားခဲ့လို့ မရကြောင်း ၎င်းက ဆက်ပြောသည်။

နောင်ထောင်ကျေးရွာသည် ဆီဆိုင်မြို့နှင့် ၁၂ မိုင်ကျော်ကွာဝေးပြီး နောင်ထောင်ဈေးသည်လည်း အရှေ့ဘက် မောက်မယ်ဒေသအတွင်းရှိ ကျေးရွာများနှင့် တောင်ရှေ့အုပ်စုကျေးရွာများက အဓိက အားထားနေရသော ဈေးတစ်ခုဖြစ်သည်။

ထိုသို့ နောင်ထောင်ဈေးကို ဖျက်ခိုင်းသည်မှာ PNO/PNA အဖွဲ့အနေဖြင့် မဖျက်ခိုင်းကြောင်းနှင့် ရွေးကောက်ပွဲအတွက်သာလျှင် အာရုံစိုက်ကြရန် PNO/PNA သတင်းနှင့် ပြန်ကြားရေး ခွန်ဆန်းအောင်က ပြောသည်။

“နောင်ထောင်ဈေးကို ဖျက်ခိုင်းတယ်ဆိုတာ မဟုတ်ပါဘူး။ ကျနော်တို့က ပိုကောင်းအောင် လုပ်နေတာ။ လူတွေ ပြန်စည်ကားဖို့ လုပ်ဆောင်နေတာ။ အခုဆို နောင်ထောင်နားက ရွာတွေအကုန် ကျနော်တို့ သိမ်းထားလိုက်ပြီ။ လာမဲ့ ရွေးကောက်ပွဲ ဖြစ်မြောက်ဖို့ပဲ အာရုံစိုက်ရမှာ၊ ရွေးကောက်ပွဲအောင်မြင်ရင်တော့ မြန်မာတစ်နိုင်ငံလုံး တည်ငြိမ် အေးချမ်းသွားမယ်၊ အများကြီးပြောင်းလဲ သွားမယ်လို့ မျှော်လင့်တယ်။” ဟု အဆိုပါ ခွန်ဆန်းအောင်က ပြောသည်။

ဆက်လက်ပြီး နေရပ်ပြန်လာသည့် စစ်ရှောင်များကို PDF တပ်ဖွဲ့ဝင်များနှင့် ပါဝင်ပတ်သက်နေလျှင် လုံခြုံရေးအတွက် တစ်ရွာလုံးကို အာမ မခံပေးကြောင်းနှင့် ပတ်သက်မှုမရှိလျှင် လုံခြုံရေးအပြည့်ဝယူနိုင်ကြောင်း ဆက်ပြောသည်။

ပြီးခဲ့သည့် ဩဂုတ်လ ၉ ရက်တွင် ဆီဆိုင်မြို့နယ် ကုလားလမ်း ကျေးရွာရှိ ပြည်သူနေအိမ်များကို စစ်ကော်မရှင်နှင့် PNOပြည်သူ့စစ်တို့က မီးရှိုဖျက်ဆီးခဲ့သောကြောင့် နေအိမ်၂၄ အိမ်ထက်မနည်း မီးလောင်ခဲ့ကြောင်း သိရသည်။

ပြီးခဲ့သည့် ဇွန်လ (၆)ရက်တွင်လည်း ဆီဆိုင်မြို့နယ် နောင်ကျောကျေးရွာအုပ်စုထဲမှ ကောင်ထိုကျေးရွာ၊ စလောင်းထောင်ကျေးရွာ၊ နောင်ဘိုကျေးရွာနှင့် နောင်ထော်ကျေးရွာအုပ်စုထဲမှ တပူထိုးကျေးရွာ၊ လွယ်ငွန်းကျေးရွာ၊ ပင်စက်ကျေးရွာ၊ တောင်ရှေ့ကျေးရွာ မှ ဒေသခံ စုစုပေါင်း(၆၀၀၀)ကျော်ကို PNO က အကြောင်းပြချက်မရှိ ရွှေ့ပြောင်းခိုင်းခဲ့သည်။