သျှမ်းပြည် ကျောက်မဲမြို့နှင့် နောင်ချိုမြို့ကြားရှိ ကမ္ဘာကျော် ဂုတ်ထိပ်တံတားကြီး မိုင်းခွဲဖျက်ဆီးခံရပြီး တံတားချဉ်းကပ်နေရာ ကျိုးပဲ့ပျက်စီးသွားကြောင်း စုံစမ်းသိရသည်။
ကျောက်မဲမြို့နယ် နောင်ပိန်ကျေးရွာနှင့် နောင်ချိုမြို့နယ် ဂုတ်ထိပ်ရွာကြားရှိ ကမ္ဘာကျော် ဂုတ်ထိပ်တံတားကြီး မိုင်းခွဲဖျက်ဆီးခံရပြီး နောင်ပိန်ဘက်ခြမ်း တံတားချဉ်းကပ်တိုင်နေရာတွင် ကျိုးပဲ့ပျက်စီးနေကြောင်း ယနေ့ (ဩဂုတ်လ ၂၄ ရက်) နံနက်ပိုင်း၌ အွန်လိုင်းလူမှုကွန်ရက် စာမျက်နှာများတွင် ပုံနှင့်တကွ ပျံ့နှံ့လာသည်။
ကမ္ဘာကျော် ဂုတ်ထိပ်တံတားကို မည်သည့်အချိန်တွင် မည်သည့်လက်နက်ကိုင် အဖွဲ့အစည်းက မိုင်းခွဲဖျက်ဆီးသွားကြောင်း အတည်မပြုနိုင်သေးဘဲ သျှမ်းသံတော်ဆင့်မှ ဆက်လက်စုံစမ်းနေသည်။
အဆိုပါ ဂုတ်ထိပ်တံတား မိုင်းခွဲဖျက်ဆီးခံရခြင်းကြောင့် နောင်ပိန်ဘက်ခြမ်းရှိ တံတားချဉ်းကပ်တိုင်အနီး ပေ (၃၀) ခန့် ကျိုးကျပျက်စီးသွားကြောင်း စစ်ကော်မရှင်လက်အောက်ခံ မီဒီယာများနှင့် ဝါဒဖြန့် တယ်လီဂရမ် ချန်နယ်များတွင် ပုံနှင့်တကွ မျှဝေထားကြသည်။
အလားတူ ဇူလိုင်လ ဒုတိယပတ်အတွင်းကလည်း ကျောက်မဲနှင့် နောင်ချိုကြား ဂုတ်တွင်းလမ်းပိုင်းရှိ တံတားကြီးလည်း မိုင်းခွဲဖျက်ဆီးခံလိုက်ရပြီး မည်သည့်ယာဉ်မှ ဖြတ်သန်းသွားလာနိုင်ခြင်း မရှိတော့ဘဲ ထိုလမ်းပိုင်းမှတဆင့် နောင်ချိုမြို့မှ စစ်ကော်မရှင်တပ်များ ကျောက်မဲမြို့ဘက် စစ်ကြောင်းချီတက်နိုင်ရန် အပြင်းအထန် ထိုးစစ်ဆင်လျက်ရှိကြောင်း ဒေသခံများက ပြောသည်။
ယမန်နေ့ (ဩဂုတ်လ ၂၃ ရက်) နံနက်ပိုင်းတွင် TNLA ပူးပေါင်းတပ်နှင့် စစ်ကော်မရှင်တပ်တို့ မြေပြင်ထိတွေ့တိုက်ပွဲ ပြင်းထန်နေသည့် ကျောက်မဲမြို့နယ် နောင်ပိန်ရွာထဲသို့ ဂျက်ဖိုက်တာဖြင့် ဗုံးကြဲတိုက်ခိုက်ခံရခြင်းကြောင့် ရပ်ကွက် (၂) ဈေးအနီးရှိ ကုန်မာဆိုင်နှင့် နေအိမ်များ မီးလောင်ကျွမ်းပြီး ပိတ်မိပြည်သူ ထိခိုက်သေဆုံးမှု များပြားနေကြောင်း၊ လက်ရှိအချိန်ထိ တိုက်ပွဲပြင်းထန်နေပြီး စစ်ကောင်စီတပ်မှ ရွာထဲသို့ ပေးမဝင်တော့ကြောင်း ဒေသခံများက ပြောသည်။
ဂုတ်ထိပ်တံတားသည် မန္တလေး-လားရှိုး မီးရထားလမ်းပေါ် အရေးပါဆုံး တံတားတစ်စင်းဖြစ်ပြီး အင်္ဂလိပ်ခေတ် ၁၉၀၀ ခုနှစ်တွင် တည်ဆောက်ပြီးစီးခဲ့စဉ် ကမ္ဘာ့အမြင့်ဆုံး သံမဏိအမျိုးအစား ရထားကူးတံတား ဖြစ်ခဲ့ကာ ကျောက်မဲမြို့နှင့် ၁၅ မိုင်ခန့် အကွာအဝေးတွင် တည်ရှိသည်။
ပုံစာ – နောင်ပိန်ဘက်ခြမ်း ဂုတ်ထိပ်တံတား ချဉ်းကပ်တိုင်အနီး မိုင်းခွဲခံရပြီး ပျက်စီးမှု (ဓာတ်ပုံ-တယ်လီဂရမ်)
Leave a Comments