ထိုင်းနိုင်ငံ၊ ဘန်ကောက်မြို့ Srivara လမ်းရှိ Town in Town Hotel ဘေးတွင် ဖွင့်လှစ်ထားသော တရားမဝင် ကာရာအိုကေ ဘားတစ်ခုအတွင်း မူးယစ်ဆေးသုံးစွဲထားသည့် မြန်မာနိုင်ငံသား ၄၁ ဦးဖမ်းဆီးခဲ့ကြောင်း ဘန်ကောက်ပိုစ့် သတင်းဌာနကဖော်ပြသည်။

ယမန်နေ့ (ဩဂုတ်လ ၁၅ )ရက် ညပိုင်းတွင် ဘန်ကောက်မြို့၊ ဝမ်သွန်လန်းရဲတပ်ဖွဲ့မှ Srivara လမ်းရှိ Town in Town Hotel ဘေးလမ်းသွယ်အတွင်းရှိ အမည်မဖော်ထားသော ကရာယိုကလပ်တစ်ခုကို ဝင်ရောက်စစ်ဆေးခဲ့သည်။

အဆိုပါနေရာသည် တစ်ထပ်ဈေးရောင်းခန်းတစ်ခုဖြစ်ပြီး ကာရာအိုကေအခန်း ၃ ခန်း ပါဝင်ကာ စစ်ဆေးမှုအချိန်တွင် မြန်မာနိုင်ငံသား ၆၀ ခန့် ရှိနေပြီး ၄၁ ဦးမှာ မူးယစ်ဆေးဝါး အသုံးပြုထားသည်ကို စစ်ဆေးတွေ့ရှိရကြောင်း ထုတ်ပြန်ချက်တွင်ဖော်ပြထားသည်။

မေးမြန်းစစ်ဆေးချိန်တွင် ၎င်းတို့သည် မွေးနေ့ပွဲတစ်ခုအတွက် စုရုံးနေကြောင်း၊ ရှာဖွေမှုအတွင်း ထိုင်းနိုင်ငံအတွင်းတားမြစ်ထားသော ဆေးရည်ဖြင့်အသုံးပြုသောအီးစီးကရက်ဟုလူသိများသည့် (Vape liquid cartridges) များနှင့် အခြားတရားမဝင်ပစ္စည်းများလည်း တွေ့ရှိခဲ့သည်။

ရဲတပ်ဖွဲ့၏ ပြောကြားချက်အရ အဆိုပါကလပ်သည် လိုင်စင်မရှိဘဲ လုပ်ကိုင်နေပြီး ပိုင်ရှင်ဖြစ်သူ ထိုင်းနိုင်ငံသား Paphangkorn (၄၈ နှစ်) ကိုလည်း ဖမ်းဆီးခဲ့သည်။
သံသယရှိသူအားလုံးကို ဝမ်သွန်လန်းရဲစခန်းတွင် ခေါ်ယူစစ်ဆေးမှုများပြုလုပ်နေကြောင်းသိရသည်။