တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) ထိန်းချုပ်ထားသော နယ်မြေဒေသအတွင်း နေထိုင်သည့် ပြည်သူများကို ၎င်း၏ မှတ်ပုံတင်ကို မဖြစ်မနေ ပြုလုပ်ရမည်ဖြစ်ပြီး ခရီသွားလာရင်း မှတ်ပုံတင် မပြနိုင်လျှင် အရေးယူခံရမည်ဖြစ်ကြောင်း ဒေသခံများက သျှမ်းသံတော်ဆင့်ကို ပြောကြားသည်။

ယမန်နေ့ (သြဂုတ် ၁၆ )ရက် နမ္မတူမြို့နယ် မန်စံကျေးရွာတွင် ပြုလုပ်ခဲ့သည့် အစည်းအဝေး၌ TNLA ၏ လူဝင်မှုကြီးကြပ်ရေးဌာန (လဝက) ဘက်က ဒေသခံများကို ၎င်းဌာနမှထုတ်မည့် မှတ်ပုံတင်ကို ပြုလုပ်ကြရန် ပြောကြားခဲ့သည်။

“လုပ်ချင်လုပ်၊ မလုပ်ချင်လည်း ရတယ်တဲ့။ ဒါပေမယ့် ခရီးထွက်လို့ သူတို့ဂိတ် (TNLA) ကိုဖြတ်ရင် မှတ်ပုံတင်မပြ နိုင်ရင်တော့ အရေးယူမယ် ပြောတယ်” ဟု နမ္မတူမြို့ မန်စံကျေးရွာ ဒေသခံတစ်ဦးကသျှမ်းသံတော်ဆင့်ကို ပြောသည်။

ထိုကြောင့် ယနေ့ သြဂုတ် ၁၇ ရက်နေ့မှစပြီး နမ္မတူမြို့ ရပ်ကွက် (၁) တွင် TNLA ထုတ် မှတ်ပုံတင် စတင်ပြုလုပ်ပေးသွားမည်ဖြစ်ပြီး ဒေသခံများအနေဖြင့် မူရင်းမှတ်ပုံတင်နှင့် အိမ်ထောင်စုစာရင်းကိုယူပြီး လာရောက်ပြုလုပ်ရန် လိုအပ်ကြောင်း ၎င်းက ဆိုသည်။

ပြီးခဲ့သည့် ဇွန်လပိုင်းတွင်လည်း နမ္မတူမြို့နယ်အတွင်း TNLA ဘက်က ၎င်းတို့၏ မှတ်ပုံတင်နှင့် အိမ်ထောင်စုစာရင်းကို လူမျိုးဘာသာမရွေး မဖြစ်မနေ သွားရောက်ပြုလုပ်ရန် အသံချဲ့စက်ဖြင့် ရပ်ကွက်များကို လှည့်လည်ပြောဆိုခဲ့သည်။

ထိုမြို့နယ်တွင် TNLA ပြုလုပ်ပေးသည့် အိမ်ထောင်စု လူဦးရေစာရင်းတစ်ခုလျှင် ကျပ်ငွေ တစ်သောင်း၊ မှတ်ပုံတင်တစ်ခုလျှင် တစ်သောင်း ကျပ်နှင့် စမတ်ကတ်တစ်ခု ငါးသောင်းကျပ် ပေးဆောင်ရကြောင်း ဒေသခံများ ပြောပြချက် အရသိရဿည်။

TNLA သည် ဇွန်လ ၁ ရက်၌ စစ်ဘက်၊ အရပ်ဘက်နှင့် နိုင်ငံရေးပါတီ ကိုယ်စားလှယ်များ အချိုးကျပါဝင်သည့် တအာင်းပြည်ကောင်စီ (TLC) ကို ဖွဲ့စည်းပြီးနောက် ၎င်းတို့ ထိန်းချုပ်ထားသော မြို့နယ် ၁၀ ခုအတွင်း ပြည်သူ့အင်အား လူဦးရေစာရင်း အမှန်ကို ပြုစုထိန်းသိမ်းထားရန်၊ လူအဝင်အထွက် စာရင်းများကို စည်းစနစ် ကြပ်မတ်ထိန်းသိမ်းရန် ရည်ရွယ်ပြီး မှတ်ပုံတင် ထုတ်ပေးသွားမည်ဖြစ်ကြောင်း TNLA ပြောရေးဆိုခွင့်ရှိသူ လွေးယေဦးက (ဇွန်လ ၅ ရက်) တွင် အွန်လိုင်းမှတဆင့် ပြုလုပ်သည့် သတင်းစာရှင်းလင်းပွဲအတွင်း ပြောဆိုလိုက်သည်။

သို့သော် ဒေသခံများသည် TNLA မှ ပြုလုပ်ပေးသော မှတ်ပုံတင်ကို ကိုင်ဆောင်ပြီး စစ်ကော်မရှင် ထိန်းချုပ်ရာ ဒေသအတွင်း ခရီးသွားလာလျှင် စစ်ဆေးမေးမြန်းခံရမည်ကိုလည်း စိုးရိမ်နေရကြောင်း ၎င်းထိန်းချုပ်ဒေသအတွင်းနေထိုင်သူများက ပြောဆိုလိုက်သည်။

“ ကျနော်တို့အနေနဲ့ TNLA ရဲ့မှတ်ပုံတင်ရော စကစကထုတ်တဲ့ မှတ်ပုံတင် ၊စမတ်ကတ်ရောကိုင်ရမှာဆိုတော့ ရှိသမျှလုပ်နေရတယ်။ တကယ်တော့ ပြည်သူတွေဆီက ငွေညစ်နေတဲ့အတိုင်းပဲ။ TNLA မှတ်ပုံတင်ကိုင်လို့ စကစဘက်ကိုဖြတ်ရင် အခမသင့်ရင် ဖမ်းခံရနိုင်တယ်။ တက်လာသမျှက ပြည်သူကို ကြည့်တဲ့ သူဆိုတာ မရှိဘူး” ဟု ကွတ်ခိုင်မြို့ခံ ဒေသခံ အမျိုးသားတစ်ဉီးက သျှမ်းသံတော်ဆင့်ကိုပြောသည်။

နမ္မတူမြို့နယ်တွင် သျှမ်းလူမျိုး ၄၂.၅၃ရာခိုင်နှုန်း၊ ပလောင်လူမျိုး ၁၅.၄ ရာခိုင်နှုန်း နှင့် ဗမာလူမျိုး ၁၇.၃ရာခိုင်နှုန်း၊ ကွတ်ခိုင်မြို့နယ်တွင် ကချင်၂၃ရာခိုင်နှုန်ကျော်၊ ပလောင် ၂၄ရာခိုင်နှုန်းကျော် မုန်းဝန်းလူမျိုး ၂၈ရာခိုင်နှုန်းကျော်၊ နမ့်ခမ်းမြို့နယ်တွင် သျှမ်းလူမျိုး ၄၀.၉၄ရာခိုင်နှုန်း၊ ပလောင် ၃၄.၁၃ရာခိုင်နှုန်း၊ လီရှော ၁၅.၇၈ ရာခိုင်နှုန်း တို့ရှိကြောင်း ISP Myanmar ထုတ်ပြန်ထားသည့် စာရင်းအရသိရသည်။

ထို့ကြောင့် TNLA ထိန်းချုပ်ထားသည့် မြို့နယ် ၁၀ခုသည် သျှမ်းတိုင်းရင်းသား၊ ကချင်တိုင်းရင်းသားနှင့် ဓနုတိုင်းရင်းသားအများစုနေထိုင်သည့် နယ်မြေဖြစ်သည်။

ထို့အပြင် ပြည်ထောင်စုနိုင်ငံရေး ဆွေးနွေး ညှိနှိုင်းရေး ကော်မတီ (FPNCC) အဖွဲ့ဝင်ဖြစ်သော ရှမ်းပြည် တိုးတက်ရေးပါတီ၊ ရှမ်းပြည်တပ်မတော်(SSPP/SSA) ၊ ကချင်လွတ်လပ်ရေးတပ်မတော် (KIA) တို့ထိန်းချုပ်သည့်နယ်မြေလည်းဖြစ်သည်။

“TNLA ထိန်းချုပ်နယ်မြေတွေက ထိလွယ်ရှလွယ်နယ်မြေပါ။ အဓိကတော့ လူမျိုးရေး ပဋိပက္ခမဖြစ်အောင် ထိန်းထိန်းသိမ်းသိမ်းလုပ်ဖို့လိုအပ်သလို။ ပြည်သူတွေကို ငဲ့ညှာဖို့လိုလည်းလိုတယ်။ TNLA မှတ်ပုံတင်လုပ်တာက ပြည်သူတွေ အတွက် ကောင်းတာလဲ။ ဘာအကျိုးရှိလဲ ဆိုတာ ထည့်စဉ်းစားဖို့လိုတယ်” ဟု သျှမ်းပြည်နိုင်ငံရေး လေ့လာသုံးသပ်သူ တစ်ဉီးက မှတ်ချက်ပြုလိုက်သည်.

အလားတူ မေလ ၂၅ ရက်မှ စတင်ပြီး TNLA ထိန်းချုပ်ထားသည့် နမ့်ခမ်းမြို့နှင့် နမ့်ဆန်မြို့တို့တွင်လည်း TNLA ၏ မှတ်ပုံတင်၊ အိမ်ထောင်စုစာရင်၊ မော်တော်ယဉ် မှတ်ပုံတင် ကြီးကြပ်ရေးဌာနမှ အိမ်စီးကား၊ လုပ်ငန်းသုံးကား၊ ခရီးသည် တင်ကားနှင့် ကုန်တင်ကားများကို ယာဉ်လိုင်စင် ပြုလုပ်ပေးလျက်ရှိကြောင်း ဒေသခံများထံမှ သိရသည်။

အဆိုပါ မော်တော်ယာဉ်လိုင်စင်အတွက် ကားအမျိုးအစားအလိုက် အခွန် ၂ သိန်းကျပ်မှ ၅ သိန်းကျပ်အထိ ပေးဆောင်ရကြောင်း သိရသည်။