သျှမ်းပြည်မြောက်ပိုင်း လားရှိုးမြို့ရှိ ဆင်နှစ်ကောင်ဟိုတယ်တွင် ကိုးကန့်တပ် MNDAA နှင့် စစ်ကော်မရှင်၏ ကိုယ်စားလှယ်တို့သည် တွေ့ဆုံဆွေးနွေးခဲ့သော်လည်း အဖြေမထွက်ဘဲ ပြီးဆုံးသွားခဲ့ကြောင်း သတင်းသိရှိရသည်။

ယမန်နေ့ (သြဂုတ် ၁၄ ရက်)က ပြုလုပ်သည့် ဆွေးနွေးပွဲတွင် အရှေ့မြောက်တိုင်း စစ်ဌာနချုပ် (ရမခ) တိုင်းမှူး ဗိုလ်မှူးချုပ် အေးမင်းဦး ဦးဆောင်ပြီး ကိုးကန့်တပ် MNDAA အခိုင်အမာ ပြင်ဆင်တည်ဆောက်ထားသည့် သိန္နီမြို့ကို ပြန်ပေးရေးအပါအဝင် ဆွေးနွေးခဲ့ကြောင်း သိရသည်။

စစ်ကော်မရှင်၏ တောင်းဆိုမှုများကို MNDAA ဘက်က လက်မခံသဖြင့် အဖြေမထွက်ဘဲ ပြီးဆုံးသွားခဲ့သည်။

“မြို့ထဲမှာ နေတဲ့အဖွဲ့တွေက တုတ်တုတ်ကို မလှုပ်သေးတာ။ ကျနော်အသိ ကိုးကန့်တပ်ထဲက စစ်သားတွေနဲ့လည်း စကားပြောဖြစ်တယ်။ သူတို့လည်း လုံးဝပြန်မဆုတ်ပေးနိုင်ဘူးတဲ့၊ ဟိုဘက်ကလည်း ဒီလကုန်ရင် ဌာနဆိုင်ရာတွေ သိန္နီမြို့ကို ပြန်ဝင်လာမယ်လို့ သတင်းဖြန့်နေတာ။ ဒါကတော့ ဟုတ်၊ မဟုတ် ထပ်စောင့်ကြည့်ရမှာပေါ့” ဟု လားရှိုးမြို့ဒေသခံတစ်ဦးက ပြောသည်။

သိန္နီမြို့ကို တစ်နှစ်ခွဲကျော် ထိန်းချုပ်ထားသည့် ကိုးကန့်တပ်ဖွဲ့ MNDAA သည် လာမည့် သြဂုတ်လကုန်ပိုင်းတွင် ထပ်မံတပ်ဆုတ်ရမည်ဟု သတင်းများ ကျယ်ကျယ်ပြန့်ပြန့် ထွက်ပေါ်နေသော်လည်း သိန္နီမြို့ပေါ်တွင် ပညာရေး၊ ကျန်းမာရေးနှင့် လမ်းပန်းဆက်သွယ်ရေးကဲ့သို့ ပြန်လည်ထူထောင်ရေး လုပ်ငန်းများ အရှိန်မပျက် ဆက်လက်နေကြောင်း ဒေသခံများ ပြောသည်။

“သိန္နီမြို့အတွင်းမှာတေ့ ပုံမှန်အတိုင်းပါပဲ၊ သူတို့လုပ်စရာရှိ ဆက်လုပ်နေတယ်။ လွန်ခဲ့တဲ့ နှစ်ရက်တုန်းက သူတို့ရုံးကြီး (ထွေအုပ်ရုံးဟောင်း) ထဲမှာ အခင်းတွေပြန်ပြင်နေတာ တွေ့ရတယ်။ ဈေးဟောင်းနေရာမှာလည်း ဆေးရုံဆောက်မယ်ဆိုတဲ့ ဟာတွေလည်း သူတို့အခုဆက်လုပ်နေတုန်း၊ အခုတောင် အုတ်မြစ်တောင် ချနေပြီ။ အခုတစ်လော လမ်းမီးတွေလည်း မြို့ထဲကနေ လမ်းခွဲအထိ လင်းအောင်ဆိုလာနဲ့ လုပ်ပြီးပြီ” ဟု သိန္နီမြို့ ဒေသခံတစ်ဦးက ပြောသည်။

၂၀၂၄ ခုနှစ် သြဂုတ်လတွင် လားရှိုးမြို့ကို ကိုးကန့်တပ် MNDAA ပါဝင်သော မြောက်ပိုင်းညီနောင်မဟာမိတ်အဖွဲ့က သိမ်းပိုက်ထိန်းချုပ်နိုင်ခဲ့ပြီး အုပ်ချုပ်ရေးယန္တရား လည်ပတ်နေချိန် တရုတ်နိုင်ငံ၏ ကြားဝင်ပေးမှုဖြင့် ယခုနှစ် ၂၀၂၅ ဧပြီ ၂၁ ရက်တွင် စစ်ကော်မရှင်ထံသို့ ပြန်လည် လွှဲပြောင်းပေးခဲ့ရခြင်း ဖြစ်သည်။

စစ်ကော်မရှင်သည် လားရှိုးမြို့အား တရုတ်ကြားဝင်ပေးမှုဖြင့် တောင်းယူခဲ့ပြီးနောက် သိန္နီမြို့ကိုပါ ပြန်လည်တောင်းယူရန် ဆွေးနွေးနေခြင်း ဖြစ်ပြီး ဆွေးနွေးပွဲများ အဖြေမထွက်ဘဲ ပြီးဆုံးသွားသဖြင့် တိုက်ပွဲများ ပြန်လည်ဖြစ်ပွားလာမည်ကို မြို့ခံများက စိုးရိမ်နေကြောင်း သိရသည်။

လက်ရှိတွင် လားရှိုးမြို့ထဲကို MNDAA က တပ်အင်အားများ ဖြည့်တင်းကာ မြို့တွင်းရပ်ကွက်များအတွင်း တပ်စွဲထားသလို စစ်ကော်မရှင်တပ် ဘက်ကလည်း တပ်အင်အား ဖြည့်တင်းခြင်းများ ပြုလုပ်နေကြောင်း သိရသည်။