သျှမ်းပြည် ဖယ်ခုံမြို့နယ်ကို စစ်ကောင်စီမှ ပြန်လည်းထိန်းချုပ်နိုင်ပြီးနောက် အခြေခံပညာ စာသင်ကျောင်းများ ပြန်ဖွင့်နိုင်ရန် အာဏာဖီဆန်ရေး လှုပ်ရှားမှုတွင် ပါဝင်ထားသော ပညာရေးဝန်ထမ်းများ (CDM) ကို ပြန်ခေါ်နေကြောင်း သတင်းရရှိသည်။

ကရင်နီတော်လှန်ရေးတပ်များ ထိန်းချုပ်ထားသည့် ဖယ်ခုံမြို့ နှင့် မိုးဗြဲမြို့ကို စစ်ကောင်စီက ပြီးခဲ့သည့် ဇူလိုင်လ ပထမပတ်အတွင်းတွင် ပြန်လည်ထိန်းချုပ်နိုင်ခဲ့သည်။

ထို့နောက် မိုးဗြဲမြို့ နှင့် ဖယ်ခုံအ‌ရှေ့ဘက်ကမ်းရှိ အခြေခံပညာ အလယ်တန် နှင့် အထက်တန်းကျောင်းများကို (သြဂုတ်လ ၁၈ ရက်)တွင် စဖွင့်နိုင်ရန် ပညာရေးဝန်ထမ်းများကို စစ်ကောင်စီလက်အောက်ခံ ပညာရေးမှူးက ပြန်ခေါ်နေကြောင်း ဖယ်ခုံသျှမ်းလူငယ်များ အသင်းမှ တာဝန်ခံတစ်ဦးက သျှမ်းသံတော်ဆင့်ကို ပြောသည်။

“ဆရာ၊ဆရာမ ဝန်ထမ်းတွေကတော့ မ‌လောက်သေဘူး။ဒါပေမဲ့ သြဂုတ်လ ၁၈ ရက်မှာ ဆရာ၊ဆရာမ ရှိတဲ့ ညကျောင်းတွေကို ပြန်ဖွင့်သွားမယ်တဲ့။အခုက ဝန်ထမ်းတွေကိုပြန်ခေါ်နေပြီ။ ဖယ်ခုံမှာတော့ ဇူလိုင်လ ကတည်းကကျောင်းတွေက ပြန်ဖွင့်နေပြီ။”ဟု ၎င်း တာဝန်ခံက ပြောသည်။

ထို့အပြင် ပညာရေးဝန်ထမ်းအင်းအား မလုံလောက်သည့်အတွက် စစ်ကောင်စီ လက်အောက်ခံ ပညာရေးမှူးက CDM လုပ်ထားသည့် ပညာရေးဝန်းထမ်းများကိုပါ ပြန်ခေါ်နေကြောင်း သိရသည်။

“သူတို့က ဒီသြဂုတ်လအတွင်းမှာပဲ ရွာတွေ မြို့တွေမှာ ပညာရေးမှူးက အစည်းအဝေးလုပ်ပြီးတော့ ပညာရေးဝန်ထမ်း နဲ့ CDM လုပ်ထားတဲ့လူတွေကိုပြန်ခေါ်ခိုင်းတာ။ CDM လုပ်ထားတဲ့ဝန်ထမ်း တွေတော့ ပြန်လာတာမျိုးမရှိပါဘူး။စိတ်ချလို့မှ မရတာပြန်သွားရင်လည်း ဖမ်းဆည်းမှုရှိနိုင်တာကို။”ဟု ၎င်းကဆက်ပြောသည်။

စစ်ကောင်စီမှ ဖယ်ခုံ – မိုးဗြဲ လမ်းတကြောကို ပြန်လည်ထိန်းချုပ်နိုင်ပြီးနောက် ဖယ်ခုံမြို့ရှိ အခြေခံပညာ အထက်တန်းကျောင်း အ.ထ.က (၁) နှင့် (၂)များကို ဇူလိုင်လ အတွင်းတွင် ပြန်ဖွင့်ခဲ့ပြီး ကျောင်းတက်နေသည့် ကျောင်းသားကျောင်းသူ ၄၀၀ကျော်ခန့်ရှိနေကြောင်း ၎င်းကဆက်ပြောသည်။

ဖယ်ခုံမြို့နယ်အတွင်းတွင် ပညာရေးဝန်ထမ်း CDM ပြုလုပ်သူ ၂၀၆ ဦး အထက်ရှိကြောင်း သိရသည်။

ဖယ်ခုံမြို့နယ်တွင် COVID 19 ရောဂါပြန့်ပွားအပြီး နိုင်ငံရေး မတည်ငြိမ်မှုကြောင့် အချို့ကလေး ၊ လူငယ်များ ၆ နှစ်ကျော်ကြာ စာသင်ကြားခွင့်မရရှိခဲ့သည့်အပြင် တိုက်ပွဲများကြောင့် ကျောင်းများလည်း ပိတ်ထားခဲ့ရသည်။

ဖယ်ခုံမြို့နယ် လွယ်ပေါ၊ နမ့်ပေါ်လုံ၊ ဆောင်နန်းခဲ၊ လဟယ်၊ မခေခမ်း၊ ပိန္နဲကုန်း၊ နားဟီး၊ အုံတိုင်း၊ ဘန့်ခူး၊ နားကုန်း၊ ကာလရှေ့၊ ညောင်မွန်း၊ တောင်ပို့ကြီး၊ ဆင်ဖြူ၊ ငါးမူးနှင့် ညောင်ရွှေမြို့နယ် တောင်ပို့ကွဲ၊ စန့်စွဲ၊ စန့်လိတ်၊ လွယ်လုံရွာမှ စစ်ဘေးရှောင်ဦးရေ တစ်သောင်းခန့် နေရပ်တွင် ပြန်နေကြပြီး ပြန်လည်ထူထောင်ရေးလုပ်ငန်းတွင်လည်း အကူညီများလိုအပ်နေကြကြောင်း သိရသည်။