သျှမ်းပြည်ဖယ်ခုံမြို့နယ် အနောက်ဘက်ခြမ်းတွင် စစ်ကော်မရှင်တပ်၊ ပအိုဝ်းပြည်သူ့စစ် (PNO)တို့ နှင့် ကရင်နီတော်လှန်ရေးတပ်ပေါင်းစုတို့သည် ယမန်နေ့ (အောက်တိုဘာ ၁၄ ရက်) ညပိုင်းတွင် တိုက်ပွဲ ထပ်မံဖြစ်ပွားခဲ့ကြောင်း စုံစမ်းသိရသည်။

လွန်ခဲ့သည့် (အောက်တိုဘာ ၁၁ ရက်)တွင်လည်း စစ်ကော်မရှင်တပ်၊PNO တို့သည် ဖယ်ခုံမြို့နယ် အနောက်ဖက်ခြမ်း ခေါင်းအီကျေးရွာအုပ်စု၊ ဘောရန်ကျေးရွာအတွင်းသို့ စစ်ကြောင်းထိုလားပြီး ကရင်နီ တော်လှန်ရေးတပ်ပေါင်းစုတို့နှင့် ထိတွေ့မှု တိုက်ပွဲဖြစ်ပွားခဲ့သေးသည်။

ယနေ့ (အောက်တိုဘာ ၁၄)ရက်တွင်လည်း စစ်ကော်မရှင်တပ်နှင့် PNO တပ်သားတို့ အင်အား အလုံးအရင်းဖြင့် ဘောရန်ကျေးရွာဘက်ကို ထပ်မံရောက်ရှိလာသဖြင့် တိုက်ပွဲဆက်ပြင်း ထန်မှုရှိလာကြောင်း ကရင်နီတော်လှန်ရေးတပ်ဖွဲ့ထဲမှ စစ်ရေးသတင်းရင်းမြစ်တစ်ဉီး က သျှမ်းသံတောင့်ကိုပြောသည်။

“ စစ်တပ်ဘက်က အင်အားအလုံးရင်းနဲ့ ထပ်ဝင်လာတော့ ရွားရဲ့အနီးတဝိုက်မှာ ကျနော်တို့နဲ့ တွေ့တော့ ထိတွေ့တိုက်ပွဲဖြစ်သွားတာ။ တိုက်ပွဲက နှစ်နာရီလောက်ကြာတယ်။ သူတို့ဘက်က ဒရုန်းတွေပါ သုံးတယ်” ဟု ၎င်းကပြောသည်။

ဆက်လက်ပြီး (အောက်တိုဘာ ၁၄ ရက်) ည ၇နာရီဝန်းကျင်တွင်လည်း စစ်ကော်မရှင်တပ်ဘက်မှ ဖယ်ခုံမြို့နယ် ဘောရန်ကျေးရွာအနီးကို လေကြောင်းဗုံးကြဲတိုက်ခိုက်မှု ထပ်မံပြုလုပ်ခဲ့ကြောင်း ၎င်းကပြောသည်။

ထို့ပြင် စစ်ကော်မရှင်တပ်နှင့် PNO တပ်တို့ သည် ယမန်နေ့ ညနေပိုင်းတွင် ဖယ်ခုံမြို့ နယ် ဘောရန်ကျေးရွာနှင့် ၁၃မိုင်ဝေးသည့် မြောက်စလုံးကျေးရွာကိုလည်းဝင်ရောက်ခဲ့ပြီး နေအိမ်မီးရှို့မှု ပြုလုပ်ခဲ့သေးကြောင်း မြေပြင်သတင်းရင်းမြစ် တစ်ဉီးက ပြောသည်။

ပြီးခဲ့သည့် (အောက်တိုဘာ ၁၃ ရက်)တွင်လည်း စစ်ကော်မရှင်တပ်နှင့် PNO တို့သည် ဖယ်ခုံမြို့နယ် အနောက်ဘက်ခြမ်းရှိ ဘောရန်ကျေးရွာကို စစ်ကြောင်း ထိုးဝင်ရောက်လာပြီး နေအိမ် (၃၀)ထက်မနည်း မီးရှို့ဖျက်ဆီးခဲ့ကြောင်း သိရသည်။

ဖယ်ခုံမြို့နယ် ဘောရန် အထက်ရွာ ၊အောက်ရွာ (၂) ရွာကို နှစ်ရွာပေါင်း လူဦးရေ စုစုပေါင်း (၁၆၀၀) ခန့် ရှိပြီး လက်ရှိတွင် နီးစပ်ရာ ကျေးရွာ နှင့် တောတောင်အတွင်းသို့ ထွက်ပြေးတိမ်းရှောင်နေရကြောင်း သိရသည်။