ထိုင်း-မြန်မာနယ်စပ် တာချီလိတ်မြို့ ရှိ နှစ်နိုင်ငံ ကမ်းကူးစာအုပ်များ ပြုလုပ်ပေးသည့် နေရာများတွင် ရေကြီးပြီး စက်ပျက်သွားသဖြင့် တစ်နှစ် နယ်စပ်ဖြတ်သန်းသွားလာခွင့် (BP) စာအုပ်ကို လူဦးရေ အကန့်အသတ်ဖြင့် ပြန်လည်ပြုလုပ်ပေးနေကြောင်း ဒေသခံများက ပြောသည်။

ပြီးခဲ့သည့် ဇူလိုင်လတွင် ရေကြီးရေလျှံမှုကြောင့် တာချီလိတ်မြို့ အမှတ် (၁) ချစ်ကြည်ရေး တံတားအောက်ရှိ TBP/ BP အရောင်းကောင်တာများ ရေနစ်မြုပ်ပြီး ဆာဗာလိုင်းများ ပျက်စီးသွားသဖြင့် စာအုပ် ပြုလုပ်ခြင်း၊ အသစ်လဲလှယ်ခြင်း ရပ်နားထားခဲ့ရခြင်း ဖြစ်သည်။

“အခုက ပြန်လုပ်ပေးနေပြီ၊ တစ်နေ့ကို အယောက် ၃၀ လောက် လုပ်ပေးတယ်။ မိုးမလင်းခင် နံနက် ၄ နာရီကတည်းက သွားတန်းစီရတယ်၊ နောက်ကျရင်တော့ မရတော့ဘူး။ စာအုပ်က မလောက်ဘူးလို့ ပြောတယ်” ဟု တာချီလိတ်မြို့ဒေသခံ အမျိုးသားတစ်ဦးက ပြောသည်။

စာအုပ်လုပ်ရန်အတွက် တန်းစီစောင့်ဆိုင်းနေရသူများကို စာအုပ် မလောက်ငှ၊ စာအုပ် ကုန်နေသည်ဟု အကြောင်းပြကာ လူဦးရေ အကန့်အသတ်ဖြင့် ပြုလုပ်ပေးနေသော်လည်း ပွဲစားမှ တစ်ဆင့်ပြုလုပ်ပါက ဘတ် ၁,၀၀၀ ကုန်ကျပြီး ချက်ချင်းရရှိကြောင်း ၎င်းက ပြောသည်။

တစ်နှစ် နယ်စပ်ဖြတ်သန်းသွားလာခွင့် (BP) စာအုပ်ကို တာချီလိတ်မြို့တွင် နေထိုင်သူတစ်ဦးအနေဖြင့် အိမ်ထောင်စုစာရင်း၊ ရပ်ကွက်နှင့် ရဲထောက်ခံချက်များဖြင့် လဝကတွင် ၁၀၀ ဘတ် ပေးသွင်းပြီး ပြုလုပ်ရခြင်း ဖြစ်သည်။

အဆိုပါစာအုပ် ပြုလုပ်လျှင် တရားဝင် သတ်မှတ်ဈေးနှုန်းမှာ ၁၀၀ ဘတ်သာ ရှိသည်။

သို့သော် ရေကြီးပြီးနောက် ဆာဗာလိုင်းများ ပျက်စီးနေသည်၊ စာအုပ် ကုန်နေသည်ဟု အကြောင်းပြပြီး လူဦးရေ အကန့်အသတ်ဖြင့် ပြုလုပ်ရသည့်အပြင် ပွဲစားဖြင့် ပြုလုပ်ပါက ကုန်ကျစရိတ်များလာသည့်အတွက် အခက်အခဲ ကြုံတွေ့နေရကြောင်း တာချီလိတ်မြို့ ကုန်သည်တစ်ဦးက ပြောသည်။

“အရင်တုန်းက မနက်ပိုင်းသွားလုပ်ရင် နေ့လယ်မှာ စာအုပ်ရပြီ၊ ဒါပေမယ့် ရေကြီးပြီးနောက်ပိုင်း ဘာဖြစ်သွားတာလဲ မသိဘူး။ တချို့ရက်တွေဆိုရင် အယောက် ၅၀ လုပ်ပေးတယ်၊ တချို့ရက်တွေဆိုရင်လည်း ၁၀ ယောက်ပဲ လုပ်ပေးတယ်၊ တချို့ရက်ကျတော့ မလုပ်ပေးတော့ဘူး။ ပြီးတော့ အခုစာအုပ်ကို ပွဲစားနဲ့လုပ်ရင် ဘတ် ၁,၀၀၀ လောက်ကုန်တယ်၊ ကျနော်တို့အတွက် မတတ်နိုင်ဘူး” ဟု ၎င်းက ပြောသည်။

ယခင်က နှစ်နိုင်ငံ ကမ်းကူးစာအုပ်များ ပြုလုပ်ပေးသည့် နေရာတွင် TBP/ BP စာအုပ်ကို စက် (၅) လုံးဖြင့် တပြိုင်နက် လုပ်ဆောင်ပေးခဲ့ရာ ယခုနှစ် ၂၀၂၅ ဇွန်လတွင် ရေကြီးမှုဖြစ်ပြီးနောက် စက် (၃) လုံးဖြင့် လုပ်ဆောင်နေရကြောင်း သိရသည်။