သျှမ်းပြည် အရှေ့ပိုင်း တာချီလိတ်မြို့အတွင်းတွင် လောင်းကစားရုံ လုပ်ငန်းများကို ပေါ်ပေါ်ထင်ထင် ပြန်လည်ပတ်နေကြောင်း သတင်းရရှိသည်။

စစ်ကောင်စီထိန်းချုပ်ထားသည့် တာချီလိတ်မြို့အတွင်း ပြီးခဲ့သည့် ဧပြီလမှ စတင်ပြီး လောင်ကစားရုံ လုပ်ငန်းများ ပြန်လည်ဖွင့််လှစ်ပြီး ကာစီနို ၊ ငါးခုံ စသည့် လောင်းကစားအမျိုးမျိုးကိုလည်း ပေါ်ပေါ်ထင်ထင် ဖွင့်လှစ်နေကြကြောင်း အသက် ၂၅ ကျော်အရွယ် တာချီလိတ်ဒေသခံ အမျိုးသမီးတစ်ဦးက သျှမ်းသံတော်ဆင့်ကိုပြောသည်။

“အလောင်းကစားရုံတွေ ပြန်ဖွင့်လာ ၃ လကျော်လောက်ရှိပြီ။ စစ်တုန်း၊ ဖမ်းတုန်း က ခဏပိတ်ကြတာ။ ကျမသိသလောက် အလောင်းကစားရုံသီးသန့်ဆိုရင် ၄ ရုံ၊ KTV နဲ့ ငါးခုံတွဲ ဖွင့်တဲ့ဆိုင်တွေကလည်း ၄ ဆိုင်လောက်ရှိမယ်။ ငါးခုံ လောင်းကစား သီးသန့်ဖွင့်ထားတာမျိုးဆိုရင်တော့ ရပ်ကွက်တိုင်းလိုလို ပြန်ရှိနေပြီ။ လောင်းကစားကတော့ အစုံပဲ။အရင်တုန်းက ပိတ်တဲ့ဟာတွေ ပြန်ဖွင့်နေတာ။”ဟု ၎င်း အမျိုးသမီးတစ်ဦးကပြောသည်။

ပြီးခဲ့သည့် ဇူလိုင်လ မှစပြီး တာချီလိတ်မြို့အတွင်း ဟိုတယ် (Hotel) ၊ KTV ဖွင့်ထားသည့် ဆိုင်များသည် ငါးခုံများနှင့် တွဲ၍ တိုးချဲ့ဖွင့်လာကြကြောင်း၊ အချို့သော လောင်းကစားရုံများတွင် အမျိုးသမီးများကို ဦးစားပေး အလုပ်ခေါ်ကြောင်း လောင်းကစားရုံတွင် အလုပ်လုပ်နေသည့် လူငယ်အမျိုးသမီးတစ်ဉီးက သျှမ်းသံတော်ဆင့်ကိုပြောသည်။

“နေရာတိုင်းမှာတော့ အသက် ၁၈နှစ်အထက်တွေပဲယူတာ။ အချိုးနေရာတွေက အမျိုးသမီးတွေကို အလုပ်ခေါ်ရင် မလှရင်မယူဘူး။” ဟု ၎င်းက ဆိုသည်။

လက်ရှိ တာချီလိတ်မြို့ပေါ်တွင် ဖွင့်လှစ်နေသော လောင်းကစားရုံများသည် ပြည်သူ့စစ်နှင့် ဌာနဆိုင်ရာများနှင့် ပတ်သက်သူများသာဖြစ်ကြသည်။

တာချီလိတ်မြို့ရှိ အလောင်းကစားလုပ်ငန်း ကာစီနိများတွင် အလုပ်လုပ်ကိုင်နေသော ဝန်ထမ်းများသည် တာချီလိတ်မြို့ခံများအပြင် မြန်မာပြည်တဝှမ်းမှ စစ်ဘေးလာရောက်ရှောင်သူများနှင့် စစ်ရေးပဋိပက္ခ၏ ရိုက်ခတ်မှုကြောင့် စီးပွားရေး ရှာဖွေ စားသောက်ရန် ခက်ခဲသူများက လာရောက်လုပ်ကိုင်ကြကြောင်း လောင်းကစားရုံတွင် အလုပ်လုပ်နေသည့် အသက် ၂၅နှစ်အရွယ် လူငယ်အမျိုးသားတစ်ဉီးက သျှမ်းသံတော်ဆင့်ကိုပြောသည်။

“ အဓိကတော့သျှမ်းမြောက်ဘက်ကဆို ကျောက်မဲ၊ သီပေါ စစ်ရှောင်လာတဲ့လူငယ်တွေရှိမယ်။ နောက် ရန်ကုန်၊မန္တလေးဘက်က လာတဲ့လူငယ်တွေရှိတယ်။ နောက် သျှမ်းရှေ့ တာချီလိတ်၊ ကျိုင်းတုံ မိုင်းဖြတ်က လူငယ်တွေလည်းများတယ်” ဟု ၎င်းက ပြောသည်။

လောင်းကစားရုံတွင် အလုပ်လုပ်ကိုင်ကြသော သူများသည် နေစရိတ်၊ စားစရိတ်ငြိမ်းအပြင် တစ်လလျှင် လစာ ထိုင်းဘတ်ငွေ ဘတ်တစ်သောင်းမှ ဘတ်တစ်သောင်းခွဲထိရကြောင်း (မြန်မာကာလပေါက်စျေး ကျပ်ငွေ ဆယ်နှစ်သိန်း အထက်) ရရှိကြောင်း ၎င်းက ဆက်ပြောသည်။

တာချီလိတ်မြို့သည် ထိုင်း-မြန်မာနယ်စပ်မြို့ဖြစ်ပြီး စစ်ရေး ပဋိပက္ခဖြစ်ပွားမှုမရှိဘဲ စစ်ကောင်စီနှင့် ၎င်းလက်အောက်ခံများက အခွန်အခကောက်ယူပြီး အွန်လိုင်းလောင်းကစားလုပ်ငန်းနှင့် လောင်းကစားရုံများကို ပေါ်တင်ပြုလုပ်နေသည့် မြို့ဖြစ်သည်။

ထို့အပြင် ပြီးခဲ့သည့် ၂၀၂၅ခုနစ် ဖေဖော်ဝါရီ ပထမပတ်တွင် ထိုင်းနိုင်ငံ၏ဖိအားကြောင့် တာချီလိတ်မြို့တွင်း ရှိ အွန်လိုင်းလောင်းကစားလုပ်ငန်းများကို စစ်ကောင်စီ လက်အောက်ခံ ရဲတပ်ဖွဲ့က မဖမ်းဆီးခင် ၎င်းလုပ်ကိုင်သူများကို ကြိုတင်အသိပေးခဲ့ပြီးမှ လိုက်လံဟန်ပြ ဖမ်းဆီးခဲ့ပြီး ငါးခုံဂိမ်းဆိုင်များ၊KTV ဆိုင် အချို့ကိုလည်းဟန်ပြ ပိတ်ခိုင်းခဲ့သည်။