သျှမ်းပြည်အရှေ့ပိုင်း မိုင်းလားမြို့သို့ ကွင်းဆင်းလေ့လာရေး ရောက်ရှိခဲ့သည့် စစ်ကောင်စီခန့် သျှမ်းပြည်ဝန်ကြီးချုပ်သည် တရုတ်-မြန်မာ နယ်ခြားမှတ်တိုင်သို့ သွားရောက်စစ်ဆေးခဲ့ကြောင်း သတင်းသိရသည်။

ယမန်နေ့ (ဩဂုတ်လ ၇ ရက်နှင့် ၈ ရက်) တွင် စစ်ကောင်စီလက်အောက်ခံ သျှမ်းပြည်နယ်အစိုးရ ကိုယ်စားလှယ်အဖွဲ့များသည် အမျိုးသားဒီမိုကရက်တစ်မဟာမိတ်အဖွဲ့ ထိန်းချုပ်ထားသည့် မိုင်းလားမြို့သို့ သွားရောက်ပြီး NDAA ထိပ်ပိုင်းခေါင်းဆောင်များနှင့် ပညာရေး၊ ကျန်းမာရေး၊ ဒေသဖွံ့ဖြိုးရေးကိစ္စများ ဆွေးနွေးခဲ့ကြောင်း သိရသည်။

စစ်ကောင်စီအသွင်ပြောင်း စစ်ကော်မရှင်လက်အောက်ခံ သျှမ်းပြည်ဝန်ကြီးချုပ် ဦးအောင်အောင်၊ တြိဂံဒေသ တိုင်းစစ်ဌာနချုပ် တိုင်းမှူး ဗိုလ်ချုပ်စိုးလှိုင်နှင့် အဖွဲ့ကို မိုင်းလားတပ်ဖွဲ့ NDAA ၏ ငြိမ်းချမ်းရေးနှင့် စည်းလုံးရေးကော်မတီ ဒု-ဥက္ကဋ္ဌများ ဖြစ်ကြသည့် ဦးစန်ပေ့နှင့် ဦးဆန်လူ၊ အမြဲတမ်းကော်မတီဝင် ဦးလော်ချန်ပေါင်၊ ဦးကြည်မြင့်၊ ဦးခမ်းမောင်၊ ဦးစိုင်းတစ်တို့က ဦးဆောင်ဆွေးနွေးခဲ့ကြောင်း အထူးဒေသ(၄) သတင်းပြန်ကြားရေးဌာနမှ ဓာတ်ပုံမှတ်တမ်းနှင့်တကွ ထုတ်ပြန်လာသည်။

ယမန်နေ့ (ဩဂုတ်လ ၈ ရက်)တွင် စစ်ကောင်စီလက်အောက်ခံ သျှမ်းပြည်အစိုးရအဖွဲ့ကို တရုတ်-မြန်မာ နယ်ခြားမှတ်တိုင်သို့ NDAA ခေါင်းဆောင်များမှ လိုက်ပါပို့ဆောင်ခဲ့ပြီး စာသင်ကျောင်းနှင့် ဆေးရုံ ပြန်လည်ပြုပြင်ရန်အတွက် အသုံးစရိတ်များကို ချပေးခဲ့ကြောင်း သတင်းထုတ်ပြန်ချက်အရ သိရသည်။

ထို့အပြင် မိုင်းလားတပ်ဖွဲ့က လျှောက်လှမ်းနေသည့် “ငြိမ်းချမ်း၊ စည်းလုံး၊ ဖွံ့ဖြိုး” လမ်းစဉ်ကို စစ်ကောင်စီလက်အောက်ခံ သျှမ်းပြည်အစိုးရအဖွဲ့က အသိအမှတ်ပြုခဲ့ပြီး ယခုတစ်ကြိမ် တွေ့ဆုံဆွေးနွေးခြင်းကို အခွင့်အရေးအဖြစ် အသုံးချပြီး ဒေသဖွံ့ဖြိုးရေးအတွက် အနေအထားသစ် တစ်ခုသို့ ရောက်ရှိအောင် ဖော်ဆောင်သွားမည်ဖြစ်ကြောင်း ထုတ်ပြန်ချက်တွင် ရေးသားထားသည်။

အခြားတစ်ဘက်တွင် မိုင်းလားတပ်ဖွဲ့ NDAA အနေဖြင့် ၎င်းတို့ထိန်းချုပ်မြို့ကို စစ်အုပ်ချုပ်ရေး ကြေညာခံရခြင်းအပေါ် နားမလည်နိုင်ဘဲ နေပြည်တော်ရှိ သက်ဆိုင်ရာ တာဝန်ရှိသူများကို ပြန်လည်တင်ပြထားကြောင်း NDAA ပြောရေးဆိုခွင့်ရှိသူ ဦးကြည်မြင့်က သျှမ်းသံတော်ဆင့်ကို ယမန်နေ့တွင် ပြောဆိုထားသည်။

ပြီးခဲ့သည့် ဩဂုတ်လ (၁) ရက်နေ့က သျှမ်းပြည်အတွင်း (၁၅) မြို့နယ်ကို အရေးပေါ်ကာလ စစ်အုပ်ချုပ်ရေး ကြေညာကြောင်း အမျိုးသားကာကွယ်ရေးနှင့် လုံခြုံရေးကောင်စီမှ ထုတ်ပြန်ခဲ့စဉ် ထိုစာရင်းထဲတွင် ‘ဝ’တပ်ဖွဲ့ UWSA ထိန်းချုပ် ဟိုပန်မြို့နယ်နှင့် မိုင်းလားတပ်ဖွဲ့ NDAA ထိန်းချုပ် မိုင်းလားမြို့နယ်တို့လည်း ပါဝင်ခဲ့သည်။

အလားတူ စစ်ကောင်စီလက်အောက်ခံ သျှမ်းပြည်နယ်အစိုးရ ကိုယ်စားလှယ်အဖွဲ့များသည် UWSA ထိန်းချုပ် မိုင်းပေါက်မြို့နှင့် ပန်ဆန်းမြို့သို့ ဩဂုတ်လ ၆ ရက်နှင့် ၇ ရက်တို့တွင် သွားရောက်ခဲ့ပြီး ဒေသဖွံ့ဖြိုးရေးအပြင် လာမည့် ဒီဇင်ဘာလလယ်တွင် ကျင်းပမည့် ရွေးကောက်ပွဲ ကိစ္စရပ်များကိုပါ ဆွေးနွေးခဲ့ကြောင်း UWSA ဘက်မှ ဩဂုတ်လ (၇) ရက်တွင် သတင်းထုတ်ပြန်ထားသည်။