မြန်မာ-ထိုင်းနယ်စပ် တာချီလိတ်မြို့ တွင် သက်ငယ်မုဒိမ်းကျူးလွန်ခဲ့သည့် တရားခံ သူရိန်ထွန်းသည် ရဲအချုပ်ခန်းမှ ထွက်ပြေးနေစဉ် သေနတ်ပစ်သတ်ခံရပြီး သေဆုံးသွားကြောင်း သတင်းရရှိသည်။
တာချီလတ်မြို့ အသက် (၈) နှစ်အရွယ် မိန်းကလေးငယ်တစ်ဦးကို မုဒိမ်းကျင့် သတ်ဖြတ်ခဲ့ပြီးအလောင်းဖျက်မှုဖြင့် အရေးယူခံထားရသည့် သူရိန်ထွန်းသည် သြဂုတ် ၆ ရက် နေ့လယ်ပိုင်းတွင် ရဲအချုပ်ခန်းမှ ထွက်ပြေးရန် ကြိုးစားနေစဉ် သေနတ်ပစ်သတ်ခံရပြီး သေဆုံးသွားခဲ့ကြောင်း ဖြစ်စဉ်ကိုသိသည့် အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“သူကထွက်ပြေးလို့ ပစ်သတ်တယ်လို့ ကြားတာပဲ။ အခုရဲစခန်းကို ဖုန်းလှမ်းဆက်တော့ ဟုတ်တယ်၊ ထွက်ပြေးသွားလို့ ပစ်လိုက်တယ် ပြောတယ်” ဟု ၎င်းအမျိုးသမီးက ပြောသည်။
သို့သော် သူရိန်ထွန်း၏ အလောင်းကို မည်သူက သယ်ဆောင်သွားကြောင်း မသိရပေ။
တရားခံ သူရိန်ထွန်းသည် ပြီးခဲ့သော ဇူလိုင် ၃၀ ရက်တွင် တာချီလိတ်မြို့ ဝမ်ဟောင်ရပ်ကွက်နေ အသက် (၈) နှစ်အရွယ် မငြိမ်းနှင်းနွယ်အား မုန့်ဝယ်ကျွေးမည်ဟုဆိုကာ သွေးဆောင်ဖြားယောင်း ခေါ်ဆောင်သွားပြီး အတင်းအဓမ္မ မုဒိမ်းကျင့် ပြုကျင့်ရာ မိန်းကလေးငယ်က အော်ဟစ်အကူညီတောင်းခံသဖြင့် အသံမထွက်စေရန် လည်ပင်းညှစ်ထားရာမှ သေဆုံးသွားခဲ့ကြောင်း ၎င်းက ထွက်ဆိုခဲ့သည်။
ထို့နောက် မိန်းကလေးငယ်၏ အလောင်းကို ဖျောက်ပစ်ရန်အတွက် မယ်ဟုတ်ချောင်းအတွင်း စွန့်ပစ်ခဲ့ကြောင်း သိရသည်။
ထိုအလောင်းကို သြဂုတ် ၄ ရက် နံနက် ၇ နာရီဝန်းကျင်တွင် တာချီလိတ်မြို့ မိုင်းဖုန်း (ခ) ကျေးရွာအုပ်စု နမ့်လွတ် အာခါရွာအနီးရှိ မယ်ဟုတ်ချောင်းထဲတွင် ပြန်လည်တွေ့ရှိခဲ့ခြင်း ဖြစ်သည်။
ထိုကြောင့် တရားခံ သူရိန်ထွန်းကို မုဒိမ်းကျင့် သတ်ဖြတ် အလောင်းဖျောက်မှုဖြင့် ဟောင်လိတ်နယ်မြေရဲစခန်းက သြဂုတ် ၄ ရက် နံနက်ပိုင်းတွင် (ပ) ၁၆၅/ ၂၀၂၅၊ ရာဇသတ်ကြီး ပုဒ်မ ၃၀၂/ ၃၇၆/ ၅၁၁/ ၂၀၂ ဖြင့် အမူဖွင့် အရေးယူခံထားကြောင်း သိရသည်။
Leave a Comments