သျှမ်းပြည် တန့်ယန်းမြို့တွင် UWSA စစ်ဝတ်စုံ ဝတ်ဆင်ကာ ‘ဝ’စစ်သား အယောင်ဆောင်ပြီး ဓားပြမှုနှင့် လူကုန်ကူးမှု ကျူးလွန်သူများရှိနေကြောင်း စုံစမ်းသိရသည်။

‘ဝ’ပြည်သွေးစည်းညီညွတ်ရေးတပ်မတော် UWSA ဝင်ရောက်တပ်စွဲထားသည့် တန့်ယန်းမြို့တွင် ဩဂုတ်လဆန်းပိုင်း၌ UWSA စစ်ဝတ်စုံ ဝတ်ဆင်ပြီး စစ်သား အယောင်ဆောင်ကာ ဓားပြမှုနှင့် လူကုန်ကူးမှု ကျူးလွန်ခဲ့သူ (၁၇) ဦးကို UWSA က ဖမ်းဆီးခဲ့ကြောင်း ဖြစ်စဉ်သိရှိသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“တန့်ယန်းက လူပဲ မြို့ပေါ်ကော ရွာကလူကော ပါတယ်။ ဓားပြတိုက် ခိုးဆိုးလုနှိုက် လုပ်တဲ့အပြင် ကျားဖြန့်လုပ်တဲ့ တရုတ်တွေကို လိုက်ဖမ်းပြီး တခြားကျားဖြန့်အဖွဲ့ကို ပြန်ရောင်းတာ။ အဲ့အဖွဲ့ကလည်း တရုတ်အချင်းချင်း ပြန်ဝယ်ပြီး ငွေထပ်လိမ်ခိုင်းတယ်၊ အဲ့လို အဆင့်ဆင့် ပြန်ရောင်းကြတော့ လူကုန်ကူးသလို ဖြစ်တာပေါ့။ သူတို့ကို ‘ဝ’တပ်က ပြန်ဖမ်းတာ”ဟု တန့်ယန်းမြို့မှ အသက် (၃၀) ကျော်အရွယ် ဒေသခံအမျိုးသားက ပြောသည်။

လက်ရှိ ဖမ်းဆီးမှုနှင့် ပတ်သက်၍ UWSA ဘက်မှ တရားဝင် သတင်းထုတ်ပြန်ထားခြင်း မရှိသေးဘဲ ဖမ်းဆီးခံရသူများကို မည်ကဲ့သို့ အရေးယူထားကြောင်း သိရှိနိုင်ရန် ‘ဝ’ပြင်ပဆက်ဆံရေးတာဝန်ခံ ဦးညီရမ်းထံသို့ သျှမ်းသံတော်ဆင့်မှ ဆက်သွယ် မေးမြန်းထားသော်လည်း ပြန်လည်ဖြေကြားခြင်း မရှိသေးပါ။

တန့်ယန်းမြို့နယ်အတွင်း ‘ဝ’တပ်ဖွဲ့ UWSA က ယမန်နှစ် ၂၀၂၄ ဇူလိုင်လတွင် စစ်ကောင်စီ သဘောတူညီမှုဖြင့် ဝင်ရောက်တပ်စွဲခဲ့ပြီးနောက် ‘ဝ’တပ်သားများသည် စစ်ဝတ်စုံ၊ လက်နက် အပြည့်အစုံ တပ်ဆင်ကာ ပေါ်ပေါ်ထင်ထင် သွားလာလှုပ်ရှားနေကြောင်း တန့်ယန်းဒေသခံများထံမှ သိရသည်။

“မြို့ထဲ ‘ဝ’စစ်သားတွေ လက်နက်အပြည့်အစုံနဲ့ သွားလာနေတာ ဈေးထဲ၊ ရပ်ကွက်ထဲ နေရာတိုင်းပဲ။ စစ်ကောင်စီက လိုင်စင်မဲ့ကားတွေ ဖမ်းတာတောင် ‘ဝ’စစ်သားတွေကို မစစ်ရဲဘူး။ သူတို့အဲ့လို သွားလာနေတာတောင်မှ သူခိုး၊ ဓားပြတွေလည်း ပိုများလာတယ်”ဟု အသက် (၄၀) ကျော်အရွယ် အမျိုးသားတစ်ဦးက ပြောသည်။

‘ဝ’တပ်သားများ ထိုသို့သွားလာလှုပ်ရှားခြင်းကို အခွင့်ကောင်းယူပြီး မသမာသူများမှ UWSA စစ်ဝတ်စုံ ဝတ်ဆင်ကာ ‘ဝ’စစ်သားအယောင်ဆောင်ပြီး ဓားပြမှု၊ လူကုန်ကူးမှုနှင့် ပြန်ပေးဆွဲမှုများ ကျူးလွန်နေခြင်းကြောင့် ဒေသခံများလည်း စိုးရိမ်ထိတ်လန့်မှု ဖြစ်ကြောင်း ၎င်းဒေသခံ အမျိုးသားက ဆက်ပြောသည်။

တန့်ယန်းမြို့နယ်ထဲ ‘ဝ’တပ်ဖွဲ့ UWSA တပ်စွဲထားသည့် တစ်နှစ်ကျော်အတွင်း အွန်လိုင်းကျားဖြန့် လုပ်ကိုင်သူ တရုတ်နိုင်ငံသားများကို သုံးကြိမ်ထက်မနည်း ဖမ်းဆီးပြီး တရုတ်ဘက်သို့ လွှဲပြောင်းပေးခဲ့သော်လည်း ပြည်သူ့စစ်ထိန်းချုပ် နယ်မြေများတွင် ရွှေ့ပြောင်းလုပ်ကိုင်နေသည့် ကျားဖြန့်ရုံ အများအပြား ကျန်ရှိနေသေးကြောင်း ဒေသခံများက ပြောသည်။