သျှမ်းပြည် တန့်ယန်းမြို့နယ်အတွင်းရှိ လွယ်လွမ့်ပရဟိတ ပညာရေးကျောင်းတွင် ကျောင်းသားဦးရေ များပြားလာခြင်းကြောင့် စားနပ်ရိက္ခာနှင့် စာရေးကိရိယာ အကူအညီများ လိုအပ်နေကြောင်း စုံစမ်းသိရသည်။

တန့်ယန်းမြို့ ရပ်ကွက်(၉) ဝမ်ကောင်းတွင် ဖွင့်လှစ်ထားသည့် လွယ်လွမ့်ပရဟိတ ဘုန်းတော်ကြီးသင် ပညာရေးကျောင်းတွင် တက်ရောက်နေသော မိဘမဲ့ကလေးများ၊ စစ်ဘေးရှောင်ကလေးများ စုစုပေါင်း (၂၀၀) ကျော်အတွက် စားနပ်ရိက္ခာနှင့် စာရေးကိရိယာ အကူအညီများ လိုအပ်နေကြောင်း အဆိုပါ စာသင်ကျောင်းရှိ တာဝန်ရှိသူများထံမှ သိရသည်။

“ဒီနှစ်က ကျောင်းမှာ ကလေးတွေ အရင်နှစ်ထက် များလာတယ်၊ ဆရာနဲ့ ကျောင်းသားနဲ့ အားလုံးပေါင်း ၂၀၀ ကျော် ရှိတယ်။ အခုလို အခြေအနေ အမျိုးမျိုးကြောင့် ကျောင်းမှာ စားဖို့သောက်ဖို့ ဆန်လိုမျိုး၊ ဟင်းရွက်စိမ်းလိုမျိုး အခက်အခဲဖြစ်တယ်။ အဲ့တာကြောင့် ကလေးတွေ ထမင်းတစ်နပ်စားရင် ဟင်းတစ်မယ်ပဲ ကျွေးနိုင်တော့တယ်” ဟု လွယ်လွမ့်ပရဟိတ စာသင်ကျောင်းမှ ဆရာဖြစ်သူ စိုင်းစံညွန့်က သျှမ်းသံတော်ဆင့်ကို ပြောသည်။

လက်ရှိ လွယ်လွမ့်ပရဟိတ ပညာရေးကျောင်းတွင် KG မှ G-10 အထိ ကျောင်းအိပ်ကျောင်းစား ကျောင်းသားစုစုပေါင်း (၂၀၀) ကျော် ရှိပြီး KG မှ G-4 အထိ မူလတန်းကျောင်းသားများကို လွယ်လွမ့်ပရဟိတကျောင်း၌ သင်ကြားပေးကာ G-5 မှ G-10 အထိ အလယ်တန်းနှင့် အထက်တန်း ကျောင်းသား (၆၀) ကျော်မှာ တန့်ယန်းမြို့ အထက-(၁) တွင် ကျောင်းတက်ရောက်ရသည်။

အဆိုပါ လွယ်လွမ့်ပရဟိတ ဘုန်းတော်ကြီးသင် ပညာရေးကျောင်းတွင် စားနပ်ရိက္ခာ အခက်အခဲအပြင် ကျောင်းသား/သူများအတွက် နေရာထိုင်ခင်း၊ အိပ်ဆောင်၊ စာသင်ဆောင်နှင့် ပညာရေးဝန်ထမ်းများအတွက် လစာများလည်း ခက်ခဲနေကြောင်း သိရသည်။

“ကလေးတွေ များလာတော့ စားဖို့ကော နေဖို့ကော အခက်အခဲ ဖြစ်လာတယ်။ တစ်ရက်ကို ဆန်နှစ်ပိုင်း ကုန်တယ်၊ ကုန်ဈေးနှုန်း တက်တာလည်း ပါတော့ ဟင်းတစ်မျိုးပဲ ကျွေးနိုင်တယ်။ ပြီးခဲ့တဲ့ ၆ နှစ်က ဝါးနဲ့ဆောက်ထားတဲ့ အဆောင်တွေလည်း ကလေးနေဖို့ စာသင်ဖို့ ခက်သွားတယ်။ ဒါ့အပြင် ဆရာတွေအတွက် လစာလည်း အရင်နှစ်တွေလိုပဲ နည်းနေသေးတော့ ပြောရရင် အဘက်ဘက်က ခက်ခဲတာပေါ့”ဟု ကျောင်းအုပ်ဆရာတော် အရှင်ပညာသာမိ က သျှမ်းသံတော်ဆင့်ကို မိန့်ကြားသည်။

လွယ်လွမ့်ပရဟိတ ဘုန်းတော်ကြီးသင် ပညာရေးကျောင်းကို တန့်ယန်းမြို့ပေါ်ရှိ သံဃာတော်များ၊ ဝုန်းမေတ္တာအဖွဲ့နှင့် ပြည်သူများ စုပေါင်း၍ ၂၀၁၈ ခုနှစ်တွင် စတင်ဖွင့်လှစ်ခဲ့ပြီး ယခုပညာသင်နှစ်သည် (၇) နှစ်မြောက်ဖြစ်ကြောင်း သိရသည်။

ကျောင်းစတင်ဖွင့်လှစ်စဉ်က ကျောင်းသား/သူဦးရေ (၁၀၀) နီးပါးခန့်သာ ရှိခဲ့သော်လည်း သျှမ်းပြည်မြောက်ပိုင်း စစ်ရေးပဋိပက္ခများကြောင့် ကျောင်းသားဦးရေ နှစ်ဆကျော် တိုးလာပြီး လက်ရှိတွင် ကျောင်းအိပ်ကျောင်းစား (၂၀၀) ကျော် လက်ခံထားရှိကြောင်း ကျောင်းတာဝန်ရှိသူများက ပြောသည်။

ပြီးခဲ့သည့် ဇူလိုင်လ (၂၇) ရက်တွင် စစ်ကောင်စီထုတ်ပြန်ခဲ့သည့် ၂၀၂၅ ခုနှစ် တက္ကသိုလ်ဝင်စာမေးပွဲ G-12 အောင်စာရင်း၌ သျှမ်းပြည်မြောက်ပိုင်းမှ ဖြေဆိုသူ (၆၅၈) ဦး၊ အောင်မြင်သူဦးရေ (၂၇၉) ဦးဖြင့် ပြည်နယ်နှင့်တိုင်းအလိုက် အနည်းဆုံး ဖြစ်ခဲ့ခြင်းကြောင့် စစ်ရေးပဋိပက္ခကြား ပညာရေးအခွင့်အလမ်း ဆုံးရှုံးနေမှုမှာ အနာဂတ်အတွက် စိုးရိမ်ဖွယ်ဖြစ်ကြောင်း ဒေသခံများက သုံးသပ်ပြောဆိုသည်။

ပုံစာ – တန့်ယန်းမြို့ လွယ်လွမ့်ပရဟိတကျောင်းတွင် ပညာသင်ကြားနေသည့် ကျောင်းသား/သူများ (ဓာတ်ပုံ-ဒေသခံ)