သျှမ်းပြည် သီပေါမြို့နယ် နမ့်လန်မြို့အနီးရှိ ရေချောင်းထဲတွင် ပလတ်စတစ်ဖြင့်ထုပ်ပြီး စွန့်ပစ်ခံထားရသည့် အမည်မသိ အလောင်းတစ်လောင်းကို တွေ့ရှိခဲ့ကြောင်း စုံစမ်းသိရသည်။
ဩဂုတ်လ (၁) ရက် နေ့လယ်ပိုင်းတွင် သီပေါမြို့နယ်ရှိ နမ့်လန်မြို့နှင့် ၁၃ မိုင်ခန့် ကွာဝေးသည့် မန်လီရွာနှင့် ခိုဟတ်ရွာကြား ရေချောင်းထဲတွင် ပလတ်စတစ် အမည်းရောင်အိတ်ဖြင့် သုံးထပ်ခန့် ထုပ်ပြီး စွန့်ပစ်ခံထားရသည့် အမည်မသိ အမျိုးသား အလောင်းကို ရွာသားများ တွေ့ရှိခဲ့ကြပြီးနောက် မီးသင်္ဂြိုဟ်ပေးလိုက်ကြောင်း ဒေသခံများက ပြောသည်။
“၁ ရက်နေ့ကတွေ့တော့ အလောင်းကို ပလတ်စတစ်နဲ့ ထုပ်ထားတာ သုံးထပ်လောက်ရှိမယ်။ အဲ့တာကို ရွာသားတွေ ဆယ်ပြီး ဖွင့်ကြည့်တော့ သေတာ ၄ ရက်လောက် ရှိမယ့်ပုံပဲ၊ သူ့ကိုယ်မှာလည်း ရိုက်ခံထားရတဲ့ ဒဏ်ရာတွေ့တယ်။ ဘယ်သူလဲ ဘယ်ကလဲ ဆိုတာတော့ မသိရဘူး”ဟု နမ့်လန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ပိုင်ရှင်မဲ့ အလောင်းတွေ့ရှိသည့် နေရာသည် သီပေါ-နမ့်လန် ကားလမ်းမကြီးနှင့် သိပ်မဝေးဘဲ ဒေသခံများမှ မိဘဆွေမျိုးများကို ရှာဖွေဆက်သွယ်လျက်ရှိပြီး ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ကိုလည်း အကြောင်းကြားထားသည်ဟု ဆိုသည်။
ပြီးခဲ့သည့် ဖေဖော်ဝါရီလ ၂၅ ရက်တွင်လည်း သီပေါမြို့နယ်ရှိ ကိုးကန့်တပ်ဖွဲ့ MNDAA ထိန်းချုပ်ထားသည့် နားမခေါ်ကျေးရွာ အနောက်ဘက်ခြမ်းတွင် အမည်၊ နေရပ် မသိရသည့် အသက် ၁၄ နှစ်မှ ၁၈ နှစ်ကြားအရွယ် မိန်းကလေးငယ် (၃) ဦးသည် အဝတ်အစား မပါဘဲ အသတ်ခံထားရပြီး အလောင်းစွန့်ပစ်ခံထားရသည့် အနေအထားဖြင့် မြင်တွေ့ခဲ့ရကြောင်း ဒေသခံများက ပြောသည်။
အခြားတစ်ဘက်တွင် TNLA ထိန်းချုပ်ထားသည့် သီပေါမြို့အနီးရှိ စစ်ကောင်စီ၏ တပ်စခန်းနေရာဟောင်း ခလရ-(၂၃) ထဲသို့ ယနေ့ (ဩဂုတ်လ ၃ ရက်) နေ့လယ် ၂ နာရီခွဲခန့်တွင် စစ်ကောင်စီတပ်မှ ဂျက်ဖိုက်တာဖြင့် ပေါင် (၅၀၀) ဗုံး ၄ လုံး ကြဲချခဲ့ပြီး ပြည်သူထိခိုက်မှု မရှိကြောင်း ဒေသခံများထံမှ သိရသည်။
Leave a Comments