သျှမ်းပြည် မူဆယ်မြို့ နှင့် နမ့်ခမ်းမြို့ ပြည်ထောင်စုလမ်းမကြီးကို တအာင်း(ပလောင်) အမျိုးသား လွတ်မြောက်ရေးတပ်မတော် TNLA က ဖြတ်သန်းသွားလာခွင့်ပိတ်လိုက်ကြောင်း သိရသည်။
ယနေ့ (ဇူလိုင်လ ၃၁ ရက်) မနက် ၆ ရက်နာရီတွင် မူဆယ် – နမ့်ခမ်း ပြည်ထောင်စုလမ်မကြီးကို အကြောင်းရင်းမဲ့ တအာင်း(ပလောင်) အမျိုးသား လွတ်မြောက်ရေးတပ်မတော် TNLA က ဖြတ်သန်း သွားလာခွင့် ပိတ်လိုက်ကြောင်း နမ့်ခမ်းမြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီမနက်မှာပဲ အကြောင်းပြချက်လည်းမရှိဘူး။ ဘာမှလည်း မဖြစ်ပဲ ဒီတိုင်းပိတ်လိုက်တာ။ ဈေးသည် တွေနဲ့ ကလေးတွေကျောင်းသွားကျောင်းလာဖို့လည်း ခက်ခဲကုန်တယ်။ မူဆယ်က ကားသမားတွေက နမ့်ခမ်းဘက်မှာ လာပိတ်မိနေကြတာ။”ဟု နမ့်ခမ်းမြို့ ဒေသခံအမျိုးသားတစ်ဦးက ပြောသည်။
မူဆယ် – နမ့်ခမ်း ပြည်ထောင်စုလမ်မကြီး ၊ မူဆယ်မြို့ စယ်လန့်ကျေးရွာအုပ်စု ဆိုင်ခေါင်ရွာ နှင့် နမ့်ခမ်းမြို့ရှိ မန့်ခမ်းရပ်ကွက်ကို ပိတ်ထားကြောင်းသိရသည်။
TNLA မှ မူဆယ် – နမ့်ခမ်း လမ်မကြီးကို အကြောင်းရင်းမဲ့စွာ ပိတ်လိုက်သည့်အတွက် ကလေးကျောင်းသွားလာခြင်း၊ ကားသမား၊ ကုန်သည်၊ ဈေးသည် နှင့် တောင်သူ လယ်သမားများ အတွက် အခက်အခဲများ ဖြစ်စေကြောင်း အသက် ၄၀ ဝန်းကျင် ကုန်သည်အမျိုးသမီးတစ်ဦးက ဆက်ပြောသည်။
“လမ်းလျှောက်သွားလာလို့တော့ ရတယ်။ ကားနဲ့ ဆိုင်ကယ် သွားလာလို့မရဘူး။နမ့်ခမ်းကလူတွေက မူဆယ် ၊ ကျယ်ခေါင်ဘက်က ကုန်ပစ္စည်းတွေကို သွားဝယ်ကြရတာလေ။ ဈေးသယ်တွေကစ သွားလာမရတော့ အဆင်မပြေကြဘူး။”ဟု အသက် ၄၀ ဝန်းကျင် ကုန်သည်အမျိုးသမီးတစ်ဦးက ပြောသည်။
အလားတူ ပြီးခဲ့သည့် (ဇူလိုင်လ ၂၈ ရက်) တွင် မိုးကုတ် မှ ကျောက်မဲ၊ မိုးမိတ် ၊ စဉ်းကူး၊ သပိတ်ကျင်း ကားလမ်း၊ ပြင်ဦးလွင် မှ အုမ္မတီး ၊ အုမ္မခါး၊ မိုင်းလုံ ကားလမ်းနှင့် တာကောင်း မှ တွင်းငယ် ၊ မိုးမိတ် ကားလမ်းတို့ကို TNLA မှ ရေကြီး မြေပြိုမှုကြောင့် လမ်းတံတားပျက်စီးကြောင်းကို အကြောင်းပြီး ဖြတ်သန်းသားလာခွင့် ယာယီပိတ်ထားကြောင်း အသိပေးထုတ်ပြန်ခဲ့သည်။
Leave a Comments