သျှမ်းပြည် ကျောက်မဲမြို့နယ် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA)ထိန်းချုပ်သည့် နောင်ပိန်ကျေးရွာအတွင်း စစ်ကောင်စီတပ် လက်နက်ကြီးပစ်ခတ်မှုကြောင့် စစ်ဘေးရှောင် ကိုရင်တစ်ပါး သေဆုံးပြီး ၄ ပါး ဒဏ်ရာပြင်းထန်ကြောင်း စုံစမ်းသိရသည်။

ယနေ့ (ဇူလိုင် ၃၀ ရက်) နေ့လယ်ပိုင်းတွင် နောင်ချိုစစ်ကောင်စီတပ်သည် ဂုတ်ထိပ်တဖက်ကမ်းရှိ ကျောက်မဲမြို့နယ် SSPP/SSA ထိန်းချုပ်သည့် နောင်ပိန်ကျေးရွာအတွင်းသို့ လက်နက်ကြီးဖြင့် ဆက်တိုက်ပစ်ခတ်ခဲ့သည်။

ထိုလက်နက်ကြီးကျည်သည် နောင်ပိန်ကျေးရွာ ရပ်ကွက်(၄)ရှိ ပုဗ္ဗာရုံဘုန်းကြီးကျောင်းနှင့် ဆေးရုံအနီး ကျရောက်ပေါက်ကွဲခဲ့ခြင်းကြောင့် စစ်ဘေးရှောင် ကိုရင်တစ်ပါး ပျံလွန်သွားပြီး ၄ ပါး ဒဏ်ရာပြင်းထန်ကြောင်း ဒေသခံများက ပြောသည်။

“နေ့လယ်ထဲက ဆေးရုံဘက်ကို လက်နက်ကြီး ပစ်ခံရတာ ၁၀ လုံးကျော်ရှိပြီ၊ အဲ့နားက အိမ်တွေလည်း လက်နက်ကြီးမှန်လို့ ပျက်စီးတယ်။ ပုဗ္ဗာရုံကျောင်းထဲလည်း တစ်လုံးကျကွဲလို့ နောင်ချိုက ရှောင်လာတဲ့ ကိုရင်လေးတစ်ပါး လက်ပြတ်ပြီး ဆုံးသွားတယ်၊ နောက်ထပ် ၄ ပါးလည်း ဒဏ်ရာရတယ်။ ဘုန်းကြီးကျောင်းက စစ်ရှောင်လည်း အကုန်ထွက်ပြေးနေရပြီ” ဟု နောင်ပိန်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ် နောင်ပိန်တိုက်နယ်အတွင်း SSPP/SSA မှ ထိန်းချုပ်ထားသော်လည်း ဇူလိုင်လ နောက်ဆုံးပတ်မှ စတင်ပြီး ဂုတ်ထိပ်တဖက်ကမ်းရှိ နောင်ချိုစစ်ကောင်စီတပ်မှ နောင်ပိန်ကျေးရွာ လူနေရပ်ကွက်ထဲနှင့် ပြည်ထောင်စုလမ်းမကြီးအနီး နေ့စဉ်နီးပါး လက်နက်ကြီးဖြင့် ပစ်ခတ်တိုက်ခိုက်လာကြောင်း ဒေသခံများထံမှ သိရသည်။

လက်ရှိတွင် နောင်ပိန်ဒေသခံများလည်း ဘေးလွတ်ကင်းရာ ထပ်မံထွက်ပြေးနေရပြီး ကျောက်မဲနှင့် နောင်ချိုမြို့တို့မှ နောင်ပိန်ရွာထဲ လာရောက်ခိုလှုံနေသည့် စစ်ဘေးရှောင်များမှာ နှစ်ထပ်ကွမ်း ထပ်မံထွက်ပြေးရခြင်းကြောင့် နေရာထိုင်ခင်းနှင့် စားနပ်ရိက္ခာ အခက်အခဲများ ကြုံတွေ့နေရကြောင်း စစ်ဘေးရှောင် ကူညီသူများက ပြောသည်။

ပြီးခဲ့သည့် ဇူလိုင်လ ၂၆ ရက် နေ့လယ်ပိုင်းကလည်း ကျောက်မဲမြို့နယ် နောင်ပိန်ကျေးရွာထဲသို့ ဂုတ်ထိပ်တဖက်ကမ်းရှိ နောင်ချိုစစ်ကောင်စီတပ်မှ လက်နက်ကြီးဖြင့် ဆက်တိုက်ပစ်ခတ်ခဲ့ခြင်းကြောင့် လူနေရပ်ကွက်အတွင်း ကျရောက်ပေါက်ကွဲပြီး အမျိုးသားတစ်ဦး ထိမှန်သေဆုံးကာ နေအိမ်အများအပြား ထိခိုက်ပျက်စီးခဲ့သည်။

ထို့အပြင် နောင်ချိုမြို့ကို ပြန်လည်ထိန်းချုပ်ထားသည့် စစ်ကောင်စီတပ်သည် ဂုတ်တွင်းမှတဆင့် မြေပြင်စစ်ကြောင်းများ ချီတက်လာကြောင်း သတင်းထွက်ပေါ်နေပြီး ပြည်ထောင်စုလမ်းမကြီးတလျှောက် ၁ မိုင်ပတ်လည်အတွင်းရှိ ကျေးရွာများမှာ လုံခြုံရေးစိုးရိမ်မှုကြောင့် ထွက်ပြေးတိမ်းရှောင်နေကြောင်း ဒေသခံများက ပြောသည်။