စစ်ကောင်စီ လက်‌အောက်ခံ ပြည်သူ့စစ်အဖွဲ့များ လုံခြုံရေးယူထားသော တရုတ်-မြန်မာနယ်စပ် မူဆယ်မြို့တွင် အွန်လိုင်းငွေလိမ်ဂိုဏ်း (ကျားဖြန့်) လုပ်ငန်း လုပ်ကိုင်သူများကို စစ်ကောင်စီနှင့် ရဲတပ်ဖွဲ့တို့က တစ်အိမ်တက် တစ်အိမ်ဆင်း လိုက်လံရှာဖွေ ဖမ်းဆီးနေကြောင်း သတင်းသိရသည်။

ယမန်နေ့ (ဇူလိုင် ၂၈ ရက်) မှစ၍ မူဆယ်မြို့ပေါ် ရှိ ရပ်ကွက်များအနက် ရပ်ကွက် ၉ ခုတွင် အွန်လိုင်းငွေလိမ်ဂိုဏ်း (ကျားဖြန့်) လုပ်ငန်း လုပ်ကိုင်သူများ ရှိ၊ မရှိ စစ်ကောင်နှင့် ရဲတပ်ဖွဲ့တို့က တစ်အိမ်တက်ပြီး တစ်အိမ်ဆင်းကာ လိုက်လံစစ်ဆေး ရှာဖွေဖမ်းဆီးနေကြောင်းမူဆယ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“မူဆယ်မြို့ပေါ်က ရပ်ကွက်တွေမှာ စစ်သားနဲ့ ရဲတွေကတစ်အိမ်ဝင်တစ်အိမ်ထွက်နဲ့ လိုက်စစ်နေတာ။ သူတို့က ဖုန်းထဲကနေကြည့်ပြီရှာတာ။ အဲ့ကြောင့် တစ်အိမ်ဝင်၊ တစ်အိမ်ထွက်ပြီးလိုက်ရှာနေတာ။ အိမ်ငှားတွေ ဟုတ်မဟုတ်မေးပြီးတော့ လည်းစစ်တယ်။ သိပ်မယုံသင်္ကာတဲ့ အိမ်တွေကိုလည်း လိုက်စစ်တယ်” ဟု ၎င်းကပြောသည်။

လူအင်အား ၂၀ ဝန်းကျင်ဖြင့် စစ်ကောင်စီနှင့် ရဲတပ်ဖွဲ့တို့သည် ငှားရမ်းခန်းများအပြင် ပြည်သူနေအိမ်အတွင်းရှိ အခန်းအားလုံးကို ဝင်ရောက်စစ်ဆေးနေသောကြောင့် စိုးရိမ်ကြောက်လန့်နေရကြောင်း မူဆယ်မြို့ဒေသခံအမျိုးသားတစ်ဦးကဆက်ပြောသည်။

“ရဲကားပါတယ်၊ စစ်ကားပါတယ်။ လူက အယောက် ၂၀ ဝန်းကျင် လောက်ဝင်တာ။ အိမ်ထဲကအခန်းတိုင်း ကိုဖွင့်ပေးရတယ်။ အိပ်ခန်းတွေလည်း ဖွင့်ပေးရတယ်။ အိမ်နှစ်ထပ်တွေ သုံးထပ်တွေလည်း စစ်တယ်။ အဲ့လိုလိုက်ဝင်စစ်ဆေးနေလို့ ပြည်သူတွေနိုးကြား ကြောက်လန့်နေကြတာ။”ဟု ၎င်းကဆိုသည်။

သို့သော် မူဆယ်မြို့ပေါ်ရှိ အွန်လိုင်းငွေလိမ်ဂိုဏ်း (ကျားဖြန့်) လုပ်ငန်း လုပ်ကိုင်သူများသည် စစ်ကောင်စီ လက်အောက်ခံ ပြည်သူစစ်များနှင့် မကင်းကြောင်း ဒေသခံများက ပြောကြသည်။

ပြီးခဲ့သည့် ဇူလိုင်လ ဒုတိယပတ်အတွင်းတွင်လည်း တရုတ်ဖိအားကြောင့် မူဆယ်မြို့ပေါ်ရှိ စွမ်းစော်ရပ်ကွက်၊ ကောင်းမှုတုံ ရပ်ကွက်၊ ၄၅ ကုန်း ရပ်ကွက်စသည့်ရပ်ကွက်ထဲရှိ အွန်လိုင်းကျားဖြန့် လုပ်ကိုင်နေသည့်နေအိမ်များကို စစ်ကောင်စီတပ်ဖွဲ့များက ဝင်ရောက်စီးနင်းခဲ့သည်။

မူဆယ်မြို့သည် မြန်မာ-တရုတ်နယ်စပ်ဒေသဖြစ်သကဲ့သို့ စစ်ရေးပဋိပက္ခ မဖြစ်ပွားသည့်ဒေသဖြစ်ပြီး၊ လက်ရှိအချိန်ထိ စစ်ကောင်စီ၏ လက်အောက်ခံ ဌာနများ လည်ပတ်နေဆဲမြို့ဖြစ်သည်။

မူဆယ်မြို့၏ ဘေးပတ်ပတ်လည်တွင် တိုင်းရင်းသားလက်နက်ကိုင်တပ်ဖွဲ့များ လှုပ်ရှားနေသကဲ့သို့ စစ်ကောင်စီလက်အောက်ခံ ပြည်သူ့စစ်အဖွဲ့များဖြစ်သည့် ကောင်းခါးပြည်သူ့စစ်၊ မြို့မပြည်သူ့စစ်၊ ပန်းဆေးပြည်သူ့စစ်၊ လုံထန်ပြည်သူ့စစ်၊ ပိန်းဆာပြည်သူ့စစ်၊ မန်ဂျယ် ပြည်သူ့စစ်၊ စိန်ကျော့ပြည်သူ့စစ်၊ မန်ပြိန်း ပြည်သူ့စစ်၊ ရှောက်ဟော်ပြည်သူ့စစ်၊ တာမိုးညဲ ပြည်သူ့စစ်၊ မုံးပေါ် ပြည်သူ့စစ် စသည့် ပြည့်သူ့စစ် အဖွဲ့ပေါင်း ၁၅ဖွဲ့ထက်မနည်းလှုပ်ရှားနေကြောင်း သိရသည်။