သျှမ်းပြည် ကျောက်မဲမြို့နယ် နောင်ပိန်ကျေးရွာထဲသို့ ဂုတ်ထိပ်တဖက်ကမ်းရှိ နောင်ချိုစစ်ကောင်စီတပ်မှ လက်နက်ကြီးဖြင့် ဆက်တိုက်ပစ်ခတ်နေခြင်းကြောင့် ဒေသခံနှင့် နောင်ပိန်ရောက်စစ်ဘေးရှောင်းများ ထပ်မံထွက်ပြေးနေရကြောင်း စုံစမ်းသိရသည်။

ယနေ့ (ဇူလိုင်လ ၂၆ ရက်) နေ့လယ် ၁၂ နာရီခန့်မှ စတင်ပြီး ကျောက်မဲမြို့နယ် နောင်ပိန်ကျေးရွာထဲသို့ ဂုတ်ထိပ်တဖက်ကမ်းရှိ နောင်ချိုစစ်ကောင်စီတပ်မှ လက်နက်ကြီးဖြင့် ဆက်တိုက်ပစ်ခတ်နေခြင်းကြောင့် လူနေရပ်ကွက်အတွင်း ကျရောက်ပေါက်ကွဲပြီး အမျိုးသမီးတစ်ဦး ထိမှန်သေဆုံးကာ နေအိမ်အများအပြား ထိခိုက်ပျက်စီးကြောင်း ဒေသခံများက သျှမ်းသံတော်ဆင့်ကိုပြောသည်။ ။

“နေ့လယ် ၁၂ နာရီလောက်ကတည်းက ရွာထဲကို လက်နက်ကြီးနဲ့ ပစ်တာ၊ ညနေပိုင်းအထိ ၈ လုံးကျတယ်။ စာသင်ကျောင်းဘက်ရယ်၊ နတ်စင်ဘက်ရယ် နောက်ပြီးတော့ ဈေးနားက ငါးသည်တစ်ယောက် ခေါင်းပြတ်သွားတယ်။ အစောပိုင်းတုန်းက တော်တော်ဆိုးဆိုးဝါးဝါးပဲ ပြေးကြတာ၊ အခုက တချို့လည်း အိမ်ပြန်လာကြပြီ” ဟု နောင်ပိန်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ ယမန်နေ့ (ဇူလိုင်လ ၂၅ ရက်) နေ့လယ်ပိုင်းကလည်း နောင်ချိုစစ်ကောင်စီတပ်မှ ဂုတ်ထိပ်တဖက်ကမ်းရှိ ပင်ပေါ၊ ပင်တီး၊ ပင်တိန်နှင့် နောင်ပိန်လမ်းခွဲ ကျေးရွာများသို့ လက်နက်ကြီးဖြင့် ပစ်ခတ်ခဲ့ခြင်းကြောင့် ပင်ပေါကျေးရွာမှ အရပ်သား(၂) ဦး ထိခိုက်ဒဏ်ရာရခဲ့ပြီး ဒဏ်ရာပြင်းထန်ခြင်းကြောင့် လားရှိုးဆေးရုံသို့ ပို့ဆောင်စဉ် တစ်ဦးသေဆုံးသွားကြောင်း ဒေသခံများထံမှ သိရသည်။

လက်ရှိတွင် ကျောက်မဲမြို့နယ် နောင်ပိန်တိုက်နယ်အတွင်း နောင်ချိုဘက်မှ တိမ်းရှောင်လာသည့် စစ်ဘေးရှောင် (၃၀၀၀) ကျော် ကျန်ရှိနေပြီး နောင်ချိုမြို့ကို စစ်ကောင်စီတပ် ပြန်လည်ထိန်းချုပ်နိုင်ပြီးနောက် လက်နက်ကြီးအပြင် ဒရုန်းဖြင့် ဗုံးကြဲတိုက်ခိုက်လာခြင်းကြောင့် လုံခြုံရေးစိုးရိမ်ကာ ထပ်မံထွက်ပြေးရန် ပြင်ဆင်နေကြကြောင်း စစ်ဘေးရှောင်ကူညီသူများထံမှ သိရသည်။

ပြီးခဲ့သည့် ဇူလိုင်လ ၂၀ ရက်တွင်လည်း နောင်ချိုစစ်ကောင်စီတပ်မှ လက်နက်ကြီး ပစ်ခတ်မှုနှင့် ဒရုန်းဖြင့် ဗုံးကြဲတိုက်ခိုက်မှုကြောင့် နောင်ချိုမြို့ သပြေရေရပ်ကွက်မှ နောင်ပြစ်ကျေးရွာတွင် လာရောက်တိမ်းရှောင်နေသည့် စစ်ဘေးရှောင်သားအမိနှစ်ဦးကို ထိမှန်၍ ပွဲချင်းပြီး သေဆုံးသွားခဲ့ကြောင်း နောင်ပိန်ဒေသခံများက ပြောသည်။

လက်ရှိတွင် နောင်ချိုနှင့် ကျောက်မဲကြားရှိ ဂုတ်တွင်းတံတားကြီး ဗုံးခွဲဖျက်စီးခံထားရခြင်းကြောင့် ခရီးသည်ယာဉ်နှင့် ကုန်တင်ယာဉ်များ သွားလာ၍ မရသော်လည်း မကြာမီ နောင်ချိုစစ်ကောင်စီတပ်မှ မြေပြင်စစ်ကြောင်းများ ချီတက်လာပြီး ကျောက်မဲမြို့နယ်အတွင်း တိုက်ပွဲထပ်မံဖြစ်ပွားမည်ကို စိုးရိမ်ကြောင်း ဒေသခံများက ပြောဆိုသည်။