သျှမ်းပြည် ကျောက်မဲမြို့နှင့် သီပေါမြို့မှ ဒေသခံများသည် စစ်ကောင်စီတပ်၏ လေကြောင်းဗုံးကြဲတိုက်ခိုက်မှု အန္တရာယ်စိုးရိမ်မှုကြောင့် ဘေးလွတ်ကင်းရာ ထပ်မံထွက်ပြေးတိမ်းရှောင်နေရကြောင်း စုံစမ်းသိရသည်။
ဇူလိုင်လဆန်းပိုင်းမှ စတင်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကျောက်မဲနှင့် သီပေါမြို့ပေါ်သို့ စစ်ကောင်စီတပ်မှ ဂျက်ဖိုက်တာဖြင့် (၁၀) ကြိမ်ထက်မနည်း လေကြောင်းဗုံးကြဲ တိုက်ခိုက်ခဲ့သည်။
ထို့ကြောင့် ကျောက်မဲနှင့် သီပေါမြို့ပေါ် ရပ်ကွက်နေ ပြည်သူများမှာ လေကြောင်းအန္တရာယ် စိုးရိမ်မှုကြောင့် ဘေးလွတ်ရာသို့ ထွက်ပြေးတိမ်းရှောင်လျက်ရှိပြီး အနီးဆုံးရှိ နမ့်လန်မြို့သို့လည်းကောင်း၊ သီပေါတံတားကြီး တစ်ဘက်ကမ်းရှိ ကိုးကန့်တပ်ဖွဲ့ MNDAA ထိန်းချုပ်ထားသည့် ဆွတ်လန်း၊ ကုန်းသာ စသည့် ကျေးရွာများဘက်သို့လည်းကောင်း သွားရောက်ခိုလှုံနေရပြီး အကူအညီများ လိုအပ်ကြသည်ဟု ဒေသခံများက ပြောသည်။
“ဗုံးကြဲခံရတော့ မြို့ခံတွေက ကိုယ့်အိမ်ကိုယ် မနေရဲကြတော့ဘူး၊ ထွက်ပြေးကြတာ အများကြီး။ ကိုးကန့်ဘက်ကို ထွက်တဲ့ သီပေါတံတားကြီး ထိပ်မှာလည်း TNLA တွေ အရမ်းစစ်တယ်။ အခုကျတော့ တစ်နေရာထဲ စုနေတာမျိုး မရှိတော့ဘူး၊ တာဝန်ယူပြီး ကူညီပေးတာလည်း မရှိဘူး။ ငတ်တဲ့လူလည်းငတ် အားလုံးခက်ခဲနေကြတာ”ဟု သီပေါမြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကိုးကန့်တပ်ဖွဲ့ MNDAA ထိန်းချုပ်ထားသည့် လားရှိုးမြို့နယ် နောင်မွန်ကျေးရွာအုပ်စုတွင်လည်း ကျောက်မဲ၊ သီပေါဘက်မှ တိမ်းရှောင်လာသည့် စစ်ဘေးရှောင်ဦးရေ ၁၀၀၀ နီးပါး ရောက်ရှိနေပြီး စားနပ်ရိက္ခာ အကူအညီများ လိုအပ်လျက်ရှိကြောင်း စစ်ဘေးရှောင်ကူညီသူများထံမှ သိရသည်။
“သီပေါ၊ ကျောက်မဲကတော့ တော်တော်လေး ငြိမ်နေတယ်၊ လေယာဉ်က ဖြတ်သွားဖြတ်လာ လုပ်နေတုန်းပဲ။ အရောင်းအဝယ်လည်း အခြေအနေ မကောင်းဘူး၊ ဈေးရောင်းပဲရှိပြီး ဈေးဝယ်မရှိဘူး။ သီပေါဆေးရုံလည်း ဗုံးကြဲခံရတော့ တစ်ခုခု ဖျားနာရင် ဆေးကုဖို့ မရှိဘူး”ဟု သီပေါမြို့မှ စစ်ဘေးရှောင် အမျိုးသမီးတစ်ဦးက ပြောဆိုသည်။
အလားတူ TNLA ထိန်းချုပ်ထားသည့် ကျောက်မဲမြို့တွင်လည်း မြို့ပေါ်ရပ်ကွက်နေ ပြည်သူအချို့မှာ ဘေးလွတ်ရာသို့ ထွက်ပြေးတိမ်းရှောင်သွားခဲ့သော်လည်း စိုက်ပျိုးရေး၊ မွေးမြူရေးလုပ်ကိုင်သူများမှာ လေကြောင်းအန္တရာယ်စိုးရိမ်မှုနှင့် အလုပ်သမား အခက်အခဲ ကြုံတွေ့နေရကြောင်း ဒေသခံများက ပြောသည်။
“အခုက သီးနှံပေါင်းလိုက်ရမယ့် အချိန်ဆိုတော့ တောင်သူအနေနဲ့ဆို ဆုံးရှုံးမှုက ၇၀ ရာခိုင်နှုန်းလောက် ရှိမယ်။ တကယ်လို့ တိုက်ပွဲသာ ကျောက်မဲကို မြန်မြန်ရောက်လာရင် ဆုံးရှုံးတာ များလိမ့်မယ်။ ကြက်မွေး ဝက်မွေးတဲ့လူတွေဆိုလည်း မရှောင်နိုင်ဘူး၊ အခု ကြက်စာ ဝက်စာ အကုန်ပြတ်နေပြီ။ ကုန်ထပ်ရောက်မယ်ဆိုရင်တောင် ဈေးက နှစ်ဆ သေချာတယ်”ဟု ကျောက်မဲမြို့မှ မွေးမြူရေးလုပ်ကိုင်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။
လက်ရှိတွင် ကျောက်မဲမြို့ပေါ် ရပ်ကွက်နေပြည်သူများမှာ နောင်ပိန်၊ ပုံဝိုး၊ ဟဲကွီ စသည့် ကျေးရွာများဘက်သို့ ထပ်မံထွက်ပြေးတိမ်းရှောင်နေပြီး နောင်ချိုမြို့ဘက်မှ တိမ်းရှောင်လာသည့် စစ်ဘေးရှောင် (၂၀၀၀) ကျော်လည်း နောင်ပိန်တိုက်နယ်အတွင်း ဆက်လက်ခိုလှုံလျက်ရှိကြောင်း စစ်ဘေးရှောင်ကူညီသူများထံမှ သိရသည်။
စစ်ကောင်စီတပ်သည် ဇွန်လ (၂၄) ရက်မှ ယနေ့ (ဇူလိုင်လ ၂၂ ရက်) အထိ တစ်လနီးပါးအတွင်း TNLA ထိန်းချုပ်ထားသည့် ကျောက်မဲမြို့တွင် (၇) ကြိမ်၊ မိုင်းငေါ့မြို့အနီးတွင် (၁) ကြိမ်၊ သီပေါမြို့တွင် (၄) ကြိမ် လေကြောင်းဖြင့် ဗုံးကြဲတိုက်ခိုက်ခဲ့ပြီး အရပ်သား (၁၃) ဦးထက်မနည်း သေဆုံး၍ (၃၀) ကျော် ထိခိုက်ဒဏ်ရာရရှိကြောင်း ဒေသတွင်း လူမှုကူညီရေးအသင်းများထံမှ သိရသည်။
နောင်ချိုမြို့ကို စစ်ကောင်စီတပ်က အလုံးစုံ ပြန်လည်ထိန်းချုပ်နိုင်ကြောင်း ဇူလိုင်လ ၁၆ ရက်တွင် ကြေညာခဲ့ပြီးနောက် မကြာမီအချိန်တွင် နောင်ချိုစစ်ကောင်စီတပ်မှ မြေပြင်စစ်ကြောင်းများ ချီတက်လာပြီး ကျောက်မဲမြို့နယ်အတွင်း တိုက်ပွဲထပ်မံဖြစ်ပွားမည်ကို စိုးရိမ်ကြောင်း ဒေသခံများက ပြောဆိုသည်။
Leave a Comments