တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) သိမ်းပိုက်ထားသော သျှမ်းပြည် နောင်ချိုမြို့ကို စစ်ကောင်စီတပ်က ပြန်လည်သိမ်းပိုက်ပြီးနောက် အရာရှိ၊ စစ်သည်များကို ဒုတိယဗိုလ်ချုပ်မှူးကြီး စိုးဝင်းက သွားရောက်တွေ့ဆုံခဲ့ကြောင်း စစ်ကောင်စီက သတင်းထုတ်ပြန်သည်။
ယမန်နေ့ (ဇူလိုင် ၂၁) ရက်တွင် နောင်ချိုမြို့ရှိ အရာရှိ၊ စစ်သည်များကို ဒုတိယဗိုလ်ချုပ်မှူးကြီး စိုးဝင်းက သွားရောက်တွေ့ဆုံခဲ့ပြီး စစ်မြေပြင် တစ်ဆင့်မြင့်ရာထူး တိုးမြှင့်ခြင်းခံရသည့် စစ်သည်များကို အဆင့်တံဆိပ်များ တပ်ဆင်ပေးခဲ့ကြောင်း သိရသည်။
TNLA က တစ်နှစ်ကြာ သိမ်းပိုက်ထားသော နောင်ချိုမြို့ကို စစ်ကောင်စီတပ်က လေကြောင်းပစ်ကူ၊ မြေပြင် စစ်ကြောင်းများဖြင့် ထိုးစစ်ဆင်ပြီးနောက် ဇူလိုင် (၁၅) ရက်နေ့တွင် ပြန်လည်သိမ်းပိုက်ခဲ့ခြင်း ဖြစ်သည်။
နောင်ချိုမြို့ကို ပြန်လည်ထိန်းချုပ်ထားသည့် စစ်ကောင်စီအနေဖြင့် နောင်ချိုမြို့နယ် တည်ငြိမ်အေးချမ်း သာယာရေးနှင့် ရေရှည်ဖွံ့ဖြိုးတက်ရေး ဆောင်ရွက်သွားရန်အတွက် လုံခြုံရေးနှင့် တရားဥပဒေ စိုးမိုးရေးလုပ်ငန်းများ လက်ဆက်ဆောင်ရွက်သွားမည်ဖြစ်ကြောင်း ဒုတိယဗိုလ်ချုပ်မှူးကြီး စိုးဝင်က ပြောကြားခဲ့သည်။
ထို့ပြင် ယခုနှစ်ဒီဇင်ဘာလအတွင်း ကျင်းပပြုလုပ်မည့် အထွေထွေရွေးကောက်ပွဲကို အောင်မြင်စွာ ကျင်းပသွားမည် ဖြစ်ကြောင်း၊ မဲပေးပိုင်ခွင့်ရှိသည့် မည်သူမဆို ပါဝင်မဲပေးခွင့်ရရှိရေး လိုအပ်သည့် နိုင်ငံသား စိစစ်ရေးကတ်ပြားနှင့် အိမ်ထောင်စုစာရင်းများ အကြောင်းအမျိုးမျိုးကြောင့် ပျောက်ဆုံးခဲ့လျှင်လည်း ပြန်လည်ပြုလုပ်ပေးသွားမည်ဖြစ်ကြောင်း ဒုတိယဗိုလ်ချုပ်မှူးကြီး စိုးဝင်ကပြောသည်။
နောင်ချိုမြို့ကို စစ်ကောင်စီတပ်က အကြောင်းကြောင်းကြောင့် ခေတ္တစွန့်ခွာခဲ့ရခြင်းဖြစ်ပြီး တောင်ခမ်းတယ်နယ်၌ ပြင်ဆင်စုဖွဲ့များမှုပြုလုပ်ကာ အောင်ဇေယျစစ်ဆင်ရေးဖြင့် အကြမ်းဖက်ချေမှုန်းမှု စစ်ဆင်ရေးကို ဆောင်ရွက်ခဲ့၍ ယခုကဲ့သို့ နောင်ချိုမြို့အား ပြန်လည်ထိန်းချုပ်နိုင်ခြင်းဖြစ်ကြောင်း စစ်ကောင်စီက ဆိုထားသည်။
ထိုတိုက်ပွဲများကြောင့် တစ်နှစ်နီးပါး ပိတ်ထားခဲ့ရသည့် အခြေခံပညာကျောင်များကို အမြန်ဆုံး ပြန်လည်ဖွင့်လှစ်ပြီး ယနေ့ ဇူလိုင် ၂၂ ရက်မှစ၍ ကျောင်းသား/ ကျောင်းသူများ ကျောင်းအပ်နှံမှုကို လက်ခံပေးသွားပြီး အတန်းအလိုက် သင်ခန်းစာများ ပြန်လည်သင်ကြာပေးသွားရန် စီစဉ်ထားပြီး ဖြစ်ကြောင်း စစ်ကောင်စီက ထုတ်ပြန်ထားသည်။
Leave a Comments