သျှမ်းပြည်တောင်ပိုင်း ရွာငံမြို့နယ် မြောက်ဘက်ကျေးရွာများတွင် စစ်ကောင်စီတပ် ဆက်လက်တပ်စွဲထားပြီး ၎င်းတို့စားစရိတ်အတွက် ပြည်သူများထံ ငွေကောက်ခံနေကြောင်း သတင်းရရှိသည်။

ပြီးခဲ့သည့် ဇူလိုင်လ ၁၈ ရက်တွင် ရွာငံမြို့နယ် မြောက်ဘက်ကျေးရွာများသို့ စစ်ကောင်စီတပ်သားများက ကျေးရွာအတွင်း ရုတ်တရက် ဝင်ရောက်လာပြီး ပြည်သူများကို ခြိမ်းခြောက်ခြင်းများ ပြုလုပ်ကာ ယနေ့ (ဇူလိုင် ၂၁ ရက်)အထိ ကျေးရွာအတွင်း ဆက်လက်တပ်စွဲ နေထိုင်နေကြောင်း ဒေသခံများက ပြောသည်။

ထိုသို့ တပ်စွဲနေထိုင်စဉ်အတွင်း စစ်ကောင်စီတပ်သားများကို ကျေးရွာအလိုက် ထမင်းထုတ်များ နေ့စဉ်ပို့ပေးနေရပြီး တစ်ရွာလျှင် ငွေကျပ်(ငါးသိန်း)၊ တစ်အိမ်လျှင် ကျပ်(၂၀၀၀) ကောက်ခံ၍ စစ်ကောင်စီတပ်သားများကို ပေးဆောင်နေရကြောင်း အသက် ၃၀ ကျော်အရွယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ရွာမှာနေတာ ခုဆို ၃ ရက်လောက်ရှိပြီ၊ သူတို့ တပ်စွဲထားတဲ့ ဘုရားကုန်းနားကို ထမင်းထုတ် ပို့ရတယ်။ ပိုက်ဆံလည်း တစ်ခါလာရင် တစ်ရွာလုံး ငါးသိန်း ပေးနေရတယ်၊ သူတို့တစ်ခါ လာရင် မလွယ်ဘူး။ ဘယ်နေရမှန်းမသိ စားရမှန်းမသိနဲ့ အသက်တောင် ဖြောင့်အောင် မရှုနိုင်ဘူး။ သူတို့က တစ်လမှာ သုံးခါလောက်ကို လာနေတာ တစ်ခါလာရင် ငါးရက်လောက်နေတာ” ဟု အဆိုပါ ဒေသခံအမျိုးသားက ပြောသည်။

အဆိုပါ စစ်ကောင်စီတပ်သားများကို ကျေးရွာအတွင်းရှိ စစ်ကောင်စီတပ် လက်အောက်ခံ ပျူစောထီးများက ခေါ်ဆောင်လာခြင်းဖြစ်ပြီး ကျေးရွာအတွင်းသို့ တစ်ခါတပ်စွဲလျှင် အင်အား ၃၀ ဝန်းကျင် ရှိသည်ဟု ၎င်းက ဆက်ပြောသည်။

ဆက်လက်ပြီး စစ်ကောင်စီတပ်သားများသည် ရွာငံမြို့နယ် မြစေတီကျေးရွာ၊ မြသိန်းတန်ကျေးရွာဘက်သို့ မကြာခဏ စစ်ကြောင်းထိုးနေပြီး ဖုန်းလိုင်းများလည်း ဖြတ်တောက်ထားကြောင်း သိရသည်။

“မြသိန်းတန်နဲ့ မြစေတီက ဖုန်းလိုင်းဖြတ်ထားတာ။ အဆက်အသွယ်လည်း မရဘူး၊ စစ်ကောင်စီတပ်ကလည်း တောက်လျှောက်ဝင်နေတာ။ နေအိမ်တွေမှာ တပ်စွဲတာ ဘုန်းကြီးကျောင်းမှာ တပ်စွဲတာတို့ လုပ်နေတာ။ ရွာသားတွေလည်း အသွားအလာ မဖြောင့်နေဘူး၊ အကုန်ကြောက်နေကြရတာ”ဟု အသက် ၂၀ ကျော်အရွယ် ဒေသခံအမျိုးသမီးတစ်ဦးက ပြောသည်။

ပြီးခဲ့သည့် ဇွန်လ ၁၁ ရက်တွင် စစ်ကောင်စီခန့်အပ်ထားသည့် အထွေထွေအုပ်ချုပ်ရေးဌာန ဝန်ထမ်း (၃)ဦးကို အမည်မသိ လက်နက်ကိုင်တပ်ဖွဲ့မှ ဖမ်းဆီးသွားခဲ့ပြီး ယနေ့ (ဇူလိုင် ၂၁ ရက်) အထိ အဆက်အသွယ် မရသေးသည့်အပြင် ထိုနေ့မှစ၍ စစ်ကောင်စီတပ်များက မြစေတီနှင့် မြသိန်းတန်ကျေးရွာသို့ ရက်ခြားဝင်ရောက် စစ်ကြောင်းထိုးနေကြောင်း ဒေသခံများထံမှ သိရသည်။

ထို့အပြင် ရွာငံမြို့နယ် နွားဘန်းကြီးကျေးရွာတွင်လည်း စစ်ကောင်စီတပ် လာရောက်တပ်စွဲထားပြီး ရွာအဝင်အထွက်များကို တင်းကြပ်စွာ စစ်ဆေးလျက်ရှိကာ အချိန်အကန့်သတ်ဖြင့်သာ ရွာဝင်ထွက်ခွင့်ရကြောင်း နွားဘန်းကြီးရွာဒေသခံများက ပြောသည်။

ပြီးခဲ့သည့် ဇူလိုင်လ ၁၈ ရက်တွင်လည်း စစ်ကောင်စီတပ်သားများက ရွာငံမြို့နယ် မြောက်ဘက်ကျေးရွာများအတွင်း ဝင်ရောက်၍ အတင်းအကြပ် စုဝေးခိုင်းကာ ပျူစောထီးများနှင့် စစ်ကောင်စီတပ်သားများကို စောင့်ရှောက်ရန် အကာအကွယ်ပေးရန်နှင့် ပျူစောထီးအဖွဲ့ဝင်များ တစ်ခုခုဖြစ်ခဲ့လျှင် ရွာခံများကို အပြစ်ပေးမည်ဟု ခြိမ်းခြောက်ပြောဆိုသွားခဲ့ကြောင်း သိရသည်။