သျှမ်းပြည် မူဆယ်မြို့တွင် ယခုရက်ပိုင်း  အွန်လိုင်းကျားဖြန့် ငွေလိမ်လုပ်ငန်းလုပ်ကိုင်နေသည့်  တရုတ်နိုင်ငံသားအပါအဝင် လူဦးရေ ၂၀၀ ဝန်းကျင် ဖမ်းဆီးခဲ့ကြောင်း သတင်းရရှိသည်။ 

တရုတ်ဖိအားမှုကြောင့် မူဆယ်မြို့ကို စစ်ကောင်စီတပ်သားများက ယခုရက်တစ်ပတ်အတွင်း  စွမ်းစော်ရပ်ကွက်၊  ကောင်းမှုတုံ ရပ်ကွက်၊ ၄၅ ကုန်း ရပ်ကွက် စသည့်ရပ်ကွက်ထဲရှိ အွန်လိုင်းကျားဖြန့် လုပ်ကိုင်နေသည့်နေအိမ်များကို ဝင်ရောက်စီးနင်းခဲ့သည်။ 

ထို့ကြောင့် အွန်လိုင်းကျားဖြန့် ငွေလိမ်လုပ်ငန်းလုပ်ကိုင်နေသည့် တရုတ်နိုင်ငံသား အပါအဝင် မြန်မာနိုင်ငံသား  ၂၀၀ ဝန်းကျင် ဖမ်းဆီး ထိန်းသိမ်းခံထားရကြောင်း မူဆယ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“စစ်ကောင်စီက အရင်တုန်က လိုက်ဖမ်းရင်၊ ပြည်သူ့စစ်တွေ နဲ့ ရဲတွေ ပါတယ်။ ဒါမဲ့အခုက စစ်ကောင်စီ တပ်သားတွေကပဲဖမ်းနေတာ။ လက်ရှိမှာ ဖမ်းခံရတဲ့လူတွေကို အချုပ်ထဲမှာ ထိန်းသိမ်းထားတုန်း။ ဖမ်းခံရတာ ၂၀၀ ဝန်ကျင်လောက်ရှိမယ်။ တရုတ်နိုင်ငံသား ဘယ်နယောက်လဲ ဆိုတာမသိရသေးဘူး”ဟု မူဆယ်မြို့ဒေသခံ အမျိုးသားတစ်ဦးက ပြောသည်။

စစ်ကောင်စီမှ  ဖမ်းဆီးထိန်းသိမ်းထားသည့် အွန်လိုင်းကျားဖြန့် ငွေလိမ်လုပ်သားများကို တရုတ်ယွမ်ငွေ ၄ သောင်းမှ ၇ သောင်းအထိ ပေးပြီး ပြန်ရွေးရကြောင်း၊ ငွေမပေးနိုင်သည့် အချို့သော သူများကို  မူဆယ်ခရိုင်တရားရုံး တွင် တရားစွဲဆိုချက်များတင်ထားကြောင်း ၎င်းကပြောသည်။ 

“အဲ့ကျားဖြန့်လုပ်တဲ့လူတွေကို တရားဆွဲဆိုခွင့်ပြုမိန့်ကို ခရိုင်ရုံးတင်ထားတယ်။ အမိန့်ကျပြီလား မကျသေးဘူးလားတော့ မသိဘူး။တရားစွဲတာက ဘာအမှုဘာပုဒ်မနဲ့ ဆွဲမလဲဆိုတော့ မသိရသေးဘူး။ မြန်မာနိုင်သားကော တရုတ်နိုင်ငံသာကောပါတယ်”ဟု မူဆယ်မြို့ ဒေသခံအမျိုးသမီးတစ်ဦးက ပြောသည်။ 

ပြီးခဲ့သည့် ဇူလိုင် ၁၁ ရက်တွင် မူဆယ်မြို့ ဖူလီလိုက်အပေါ်ဘက်ရှိ ကျားဖြန့်လုပ်ငန်းတစ်ခုကို စစ်ကောင်စီတပ်က ဝင်းရောက် ဖမ်းဆီးခဲ့သေးသည်။​

ထို့ပြင် ယမန်နေ့ (ဇူလိုင်လ ၁၇) ရက်တွင်လည်း မူဆယ်မြို့ ၊ မူဆယ် လမ်းသွယ် ၉ လမ်းမကြီး၏ ကုန်းဆင်းက အနီးတဝိုက်ရှိ အဆောက်အဦးတစ်ခုကို စစ်‌ကောင်စီက ဝင်ရောက် စီးနင်းခဲ့ကြောင်း ဖမ်းဆီးမှုပြုလုပ်ခဲ့သည်။ 

မူဆယ်မြို့သည် မြန်မာ-တရုတ်နယ်စပ်ဒေသဖြစ်သကဲ့သို့ စစ်ရေးပဋိပက္ခ မဖြစ်ပွားသည့်ဒေသဖြစ်ပြီး၊ လက်ရှိအချိန်ထိ စစ်ကောင်စီ ၏လက်အောက်ခံ ဌာနများ လည်ပတ်နေဆဲမြို့ဖြစ်သည်။