တအာင်းအမျိုးသားလွတ်မြောက်ရေးတပ်မတော် (TNLA) သိမ်းပိုက်ထားသော သျှမ်းပြည် နောင်ချိုမြို့ကို စစ်ကောင်စီတပ်က ပြန်လည်သိမ်းပိုက်ပြီးနောက် ၎င်းတို့ကို ဆန့်ကျင်သော သူများကို ဖမ်းဆီးရန် မှိုင်းဝေအပါအဝင် တယ်လီဂရမ်ချန်နယ်များက လှုံ့ဆော်နေသည်။

TNLA က တစ်နှစ်ကြာသိမ်းပိုက်ထားသော နောင်ချိုမြို့ကို စစ်ကောင်စီတပ်က လေကြောင်းပစ်ကူ၊ မြေပြင် စစ်ကြောင်းများဖြင့် ထိုးစစ်ဆင်ပြီးနောက် ဇူလိုင် (၁၅) ရက်နေ့တွင် ပြန်လည်သိမ်းပိုက်လိုက်ခြင်း ဖြစ်သည်။

စစ်ကောင်စီကျောထောက် နောက်ခံပေးထားပြီး Subscribers ပေါင်း ၁၇၀,၀၀၀ ရှိသည့် မှိုင်းဝေချန်နယ်နှင့် Subscribers ပေါင်း ၂၆,၀၀၀ ရှိသည့် Truth Media ချန်နယ်သည် TNLA နှင့် PDF များအတွက် ချက်ပြုတ်၊ ထောက်ပို့၊ လမ်းကြောင်းပြပေးသည်ဟုဆိုကာ နောင်ချိုမြို့နယ် နေထိုင်သူများအား ဖမ်းဆီးရန်လှုံ့ဆော်နေသည်။

နောင်ချိုမြို့ကို TNLA က သိမ်းပိုက်ထားချိန် ၎င်းတို့နှင့်ပေါင်းပြီး နောင်ချိုမြို့ပေါ်ရှိ စစ်တပ်မိသားစု၊ ရဲမိသားစုနှင့် ဝန်ထမ်းမိသားစုတွေကို ဖမ်းဆီးရန် လှုံ့ဆော်ထားသူဟုဆိုကာ ပြင်ဦးလွင်မြို့ အမျိုးသမီးတစ်ဦးကိုလည်း ဖမ်းဆီးရန် မှိုင်းဝေချန်နယ်မှ ဇူလိုင် (၁၄) ရက်နေ့တွင် လှုံ့ဆော်ထားသည်။

ထိုသို့ ဖမ်းဆီးရန်လှုံ့ဆော်ပြီးနောက် ဇူလိုင် (၁၅) ရက်နေ့တွင် အဆိုပါအမျိုးသမီးတစ်ဦးကို ဖမ်းဆီးရမိပြီ ဖြစ်ကြောင်း တင်ပြထားသည်။

ထိုတယ်လီဂရမ်ချန်နယ်များသည် စစ်ကောင်စီကို ဝေဖန်သူများအား အစဉ်တစိုက် စောင့်ကြည့်ပြီး ဖမ်းဆီးရန်အတွက် မကြာခဏ လှုံ့ဆော်ရေးသားလေ့ရှိရာ ၎င်းတို့ ရေးသားချက်များတွင် ပါဝင်သူများကို စစ်ကောင်စီကလည်း မကြာခဏ ဖမ်းဆီးထောင်ချနေသည်။

စစ်တပ်အာဏာသိမ်းပြီးနောက် လေးနှစ်ကျော်ကာလအတွင်း လူမှုကွန်ယက်ပေါ်တွင် စစ်ကောင်စီကို ဆန့်ကျင်ဝေဖန်ပြီး လူထုလှုပ်ရှားမှုများနှင့် တော်လှန်ရေး အဖွဲ့အစည်းများကို ထောက်ခံအားပေးသည့် ရေးသားမှုများ၊ ပြောဆိုဆက်သွယ်မှုများကြောင့် ဖမ်းဆီးခံရသူ ၁,၈၈၄ ဦး ရှိခဲ့ကြောင်း သုတေသနအဖွဲ့ တစ်ခုဖြစ်သည့် Data for Myanmar က ၂၀၂၅ ဖေဖော်ဝါရီ ၂၈ ရက်နေ့တွင် ဖော်ပြသည်။