သျှမ်းပြည်အရှေ့ပိုင်း၊မိုင်းဆတ်မြို့ တွင် တောင်ကျချောင်းရေကြောင့် မိုင်းဆတ်-တာချီလိတ်သွားသည့် နမ့်ကျန်တံတား ယာယီပိတ်ထားကြောင်း စုံစမ်းသိရသည်။
ယမန်နေ့ (ဇူလိုင်လ ၁၅) ရက်ညတွင် မိုင်းဆတ်တွင် မိုးသည်းထန်စွာရွာသွန်းခဲ့ပြီး တောင်ကျချောင်းရေများကြောင့် နမ့်ကျန်းတံတား ချင်းကပ်လမ်းပျက်စီးသွားခဲ့ပြီး သွားလာမှု ယာယီပိတ်ထားရကြောင်း ဒေသခံများထံမှ သိရသည်။
“မနေ့ညက မိုးတစ်ညလုံးရွာလို့ ဒီမနက်ရေတက်လာတာ။တံတားချင်းကပ် ပြိုသွားလို့ အသွားအလာတော့ ခဏပိတ်ထားတယ်။ လူထိခိုက်မှုတော့မရှိဘူး။ ရေတော့ကျနေပြီ။ဓာတ်တိုင်တစ်ချောင်းတော့ လှဲသွားတယ်။ အဲ့လမ်းအပြင် အခြားလမ်းမရှိဘူး လူပဲ သွားလို့ရတယ်ခုက။ ကားဆိုင်ကယ် ဖြတ်မရဘူး။” ဟု ဒေသခံ အမျိုးသမီးတစ်ဦးက ပြောသည်။
ထို့အပြင် မိုင်းဆတ်မြို့ မြေနိမ့်ပိုင်းရပ်ကွက်များတွင် တောင်ကျရေ အနည်းငယ်ဝင်ရောက်နေပြီး ယခင်နှစ်များကလည်း တောင်ကျချောင်းရေကြောင့် တံတားယာယီရပ်ဆိုင်းထားရကြောင်း သိရသည်။
ပြီးခဲ့သည့် ၂၀၂၄ခုနှစ် စက်တင်ဘာလတွင်လည်း ရေကြီးရေလျှံမှုကြောင့် မိုင်းဆတ်တံတား ယာယီရပ်ဆိုင်းခဲ့ရကာ ၂၀၂၄ခုနှစ်နှင့် ၂၀၂၅ ခုနှစ်တွင် ရေကြီးမှု အဆိုးဆုံးဖြစ်ကြောင်း မြို့ခံများကပြောသည်။
Leave a Comments