သျှမ်းပြည်တောင်ပိုင်း၊ ပင်လောင်းမြို့နယ် ထီပေါင်းကျေးရွာအုပ်စုတွင် တောင်ကျရေနှင့်အတူ ကျောက်တုံးကြီးများ လှိမ့်ကျလာပြီး နေအိမ်များထဲ ဝင်ရောက်လာခဲ့ကြောင်း သတင်းရရှိသည်။

ဇူလိုင်လ ပထမပတ်မှ စပြီး ပင်လောင်းမြို့နယ် ထီပေါင်းကျေးရွာအုပ်စု လွယ်မောင်းကျေးရွာတွင် မိုးအဆက်မပြတ် ရွာသွန်းမှုကြောင့် တောင်ကျရေနှင့်အတူ လှိမ့်ဆင်းလာသည့် ကျောက်တုံးကြီးများသည် အရှေ့လွယ်မောင်းကျေးရွာ အနောက်ဘက်ခြမ်းရှိ နေအိမ်များထဲသို့ ဝင်ရောက်လာသဖြင့် မြေပြန့်သို့ ပြောင်းရွှေ့ရကြောင်း ဒေသခံများက ပြောသည်။

“ရွာက တောင်စောင်းမှာရှိတော့ မိုးရွာရင် တောင်ပေါ်က ကျလာတဲ့ ကျောက်တုံးတွေက အိမ်ထဲဝင်လာတယ်။ လူတွေကိုလည်း ထိခိုက်စေတယ်၊ အိမ်ထဲကို ရေတွေလည်း ဝင်လာတယ်။ ရွာထဲက ရေမရောက်တဲ့ နေရာတွေမှာ နေကြတာ။ တချို့ကျတော့ ပင်လောင်းမြို့ထဲ သွားနေကြတာ” ဟု ပင်လောင်းဒေသခံ အမျိုးသားတစ်ဦးက ပြောသည်။

ယမန်နှစ် ၂၀၂၄ တွင်လည်း အဆိုပါ လွယ်မောင်းရွာ၌ တောင်ကျရေနှင့်အတူ မြေပြိုမှု၊ ရေကြီးမှုများ ကြုံတွေ့ခဲ့ရသောကြောင့် စိုးရိမ်စိတ်ဖြင့် ရွှေ့ပြောင်းနေသူများလည်း ရှိနေကြောင်း ၎င်းက ဆက်ပြောသည်။

အဆိုပါ ရွှေ့ပြောင်းနေထိုင်ကြသူများသည် (၃၀) ဦးနီးပါးရှိပြီး ဆွေမျိုးရှိရာ ပင်လောင်းမြို့ထဲနှင့် တောင်ကျရေ မရောက်သည့် လွယ်မောင်းကျေးရွာရှိ ဆွေမျိုးနေအိမ်များတွင် ယာယီရွှေ့ပြောင်း အိပ်စက်နေရကြောင်း သိရသည်။

“အရင်က အရှေ့လွယ်မောင်းမှာ မြေတွေပြိုတယ်၊ ရေတွေကြီးလို့ လမ်းတွေလည်း ပျက်တယ်။ တော်တော်ဆိုးဆိုးရွားရွား ဖြစ်ခဲ့တာ။ မဲနယ်တောင်ထက် အခြေအနေ မဆိုးပေမယ့် အဲ့လိုနီးနီး ပျက်စီးခဲ့ရတာ။ ဒီနှစ်လည်း အဲ့ဒီလို ထပ်ဖြစ်မှာစိုးလို့ ပြောင်းနေကြတာ၊ အဓိကတော့ တောင်စောင်းမှာ နေကြသူတွေ ပြောင်းကြတာ” ဟု အသက် ၂၆ ဝန်းကျင် အမျိုးသားတစ်ဦးက သျှမ်းသံတော်ဆင့်ကို ပြောသည်။

လွယ်မောင်းတောင်သည် ပင်လောင်းမြို့နယ်ထဲတွင် အမြင့်ဆုံးတောင်ဖြစ်ပြီး ကျေးရွာသည်လည်း တောင်စောင်းတွင် တည်ရှိကာ မိုးရာသီရောက်လျှင် တောင်ကျရေများကြောင့် မြေပြိုမှုဖြစ်ကာ ယာယီရွှေ့ပြောင်း နေထိုင်ရသည်ဟု သိရသည်။

အလားတူ ဟိုပုံးမြို့နယ် မဲနယ်တောင်ဒေသ စံဖူးကျေးရွာအုပ်စုတွင်လည်း ယမန်နှစ် ၂၀၂၄ ခုနှစ်တွင် ဖြစ်ပွားခဲ့သော မြေပြိုမှု၊ ရေကြီးမှုများကဲ့သို့ ထပ်ဖြစ်မည်ကို စိုးရိမ်သောကြောင့် တောင်စောင်းရှိ အိမ်များတွင် မနေဘဲ မြေပြန့်များတွင် ပြောင်းရွှေ့ရန် စီစဉ်နေကြောင်း သိရသည်။

“အရင်က လမ်းတွေ ခြံတွေ ပျက်သွားတာ ပြုပြင်ထားတာ။ ခုတော့ မိုးတွေရွာပြီး ပြန်ပျက်သွားပြီး။ ထန်းအယ်ရွာဘက်ကနေ ဟိုပုံးတို့ တောင်ကြီးတို့ကို သွားရတာ။ ထန်းအယ်လမ်းက ကျောက်ကြမ်းဆိုတော့ လမ်းက ကြမ်းတယ်။ လမ်းကောင်းတဲ့ စငေါလမ်းက ရေတိုက်စားလို့ လမ်းပျက်သွားပြီ သွားမရတော့ဘူး။ အရင်နှစ်လို ဖြစ်မှာကြောက်လို့ တောင်စောင်းမှာ မအိပ်ဘူး၊ မြေပြန့်က အိမ်တွေမှာ သွားအိပ်ရတယ်”ဟု ဒေသခံ အမျိုးသားတစ်ဦးက ပြောသည်။

ပြီးခဲ့သည့် ၂၀၂၄ ခုနှစ် စက်တင်ဘာလတွင် မိုးရွာသွန်းမှု များပြီး တောင်ကျရေများ စီးဆင်းကာ မဲနယ်တောင်တကြောရှိ ကျေးရွာများ၊ နေအိမ်များ၊ လမ်းများ ထိခိုက်ပျက်စီးခဲ့ရပြီး ပြည်သူ (၂၁) ဦး သေဆုံးသွားခဲ့ကြောင်း ဒေသခံများထံမှ သိရသည်။