သျှမ်းပြည် မူဆယ်မြို့ ဝမ်းပိန်းမုန့်တိုက်၏ မိသားစုဝင်တစ်ဦးသည် အသိမိတ်ဆွေများထံ ငွေကျပ်သိန်းပေါင်း သုံးထောင်ကျော် လိမ်လည်ပြီး ထွက်ပြေးသွားကြောင်း သတင်းရရှိသည်။

မူဆယ်မြို့ တောင်ရပ်ကွက်ရှိ ဝမ်းပိန်းမုန့်တိုက်၏ မိသားစုဝင်တစ်ဦးသည် မူဆယ်မြို့ရှိ လုပ်ငန်းရှင်များနှင့် ဒေသခံ အသိမိတ်ဆွေများထံ အကြောင်းအမျိုးမျိုးပြပြီး ကျပ်ငွေသိန်းပေါင်း ၃၀၀၀ ကျော် လိမ်လည်ခဲ့ကြောင်း ဒေသခံများက ပြောသည်။

“သူက ဘဏ်အကောင့် ပိတ်ခံရတယ် ဆိုပြီးတော့ ပိုက်ဆံလာချေးတာ။ တစ်ပတ်နေရင် ပြန်ပေးမယ်လို့ ပြောတာပါ။ ကျမရဲ့ သူငယ်ချင်းတွေဆီမှာကြတော့ မုန့်ဖုတ်စက် ဝယ်ဖို့ စာရင်းတွေပြပြီး ရှယ်ယာလုပ်ရအောင် ပြောရင်း ငွေလိမ်တောင်းတယ်။ သူတို့ မုန့်တိုက်က နာမည်လည်း ရှိနေတော့ ဒီပိုက်ဆံလောက်နဲ့ လိမ်မယ် မထင်ဘူးလေ”ဟု ငွေလိမ်ခံရသည့် မူဆယ်မြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

ထိုသို့ ငွေလိမ်လည်ခံရသူများက ဝမ်းပိန်းမုန့်တိုက် မိသားစုဝင်များကို အကျိုးအကြောင်း ရှင်းပြပြီး တာဝန်ယူဆောင်ရွက်ပေးရန် ပြောဆိုခဲ့သော်လည်း မိသားစုဝင်များမှ ၎င်းတို့နှင့် မသက်ဆိုင်ကြောင်း ပြန်လည်ငြင်းဆိုခဲ့ကြောင်း ၎င်းအမျိုးသမီးက ဆက်ပြောသည်။

“အိမ်ကနေ မပြေးခင် တစ်ရက်က သူ့မိသားစုတွေနဲ့ အတူရှိကြသေးတယ်။ နောက်တစ်ရက်မှာပဲ ပျောက်သွားတော့ အိမ်ထိ ချက်ချင်းလိုက်မေးတယ်။ သူ့မိဘတွေက သူတို့သားသမီးတွေ မဟုတ်တော့ဘူးလို့ပဲ ပြောတယ်။ သူတို့က ပြောတာ ဒီကိစ္စတွေနဲ့မသိဘူး၊ တရားစွဲချင် ဆွဲလိုက်တဲ့။ ပြီးတော့ မှတ်ပုံတင် မိတ္တူတွေပါ ပေးလာတာ၊ ဘာမှ တာဝန်မယူနိုင်ဘူးလို့ပဲ ပြောတယ်”ဟု ငွေလိမ်ခံရသည့် မူဆယ်မြို့ဒေသခံ အမျိုးသမီးတစ်ဦးက ပြောဆိုသည်။

အဆိုပါ ငွေလိမ်သွားသည့် အမျိုးသမီးသည် ဝမ်းပိန်းမုန့်တိုက်၏ ချွေးမဖြစ်ပြီး ဇူလိုင် ၁၁ ရက်တွင် ၎င်း၏ အမျိုးသား၊ သား ၃ ယောက်နှင့် အတူ မူဆယ်မြို့မှ ထွက်ပြေးတိမ်းရှောင်သွားကြောင်း ဒေသခံများက ပြောသည်။

ထို့ကြောင့် မူဆယ်မြို့တွင် နေထိုင်သည့် ဒေသခံများကို ယခုကဲ့သို့ ငွေလိမ်လည် လှည့်ဖျားမှုများမှ သတိထားနိုင်ကြရန် အသိပေးစေလိုကြောင်း ၎င်းက ထပ်လောင်းပြောသည်။

ပြီးခဲ့သည့် ၂၀၁၆ တွင်လည်း အဆိုပါ အမျိုးသမီးသည် မူဆယ်မြို့ရှိ ငွေလဲလုပ်ကိုင်သူများ၊ စီးပွားရေးလုပ်ကိုင်သူများကို ငွေလိမ်လည်ခဲ့ပြီး ယခုဖြစ်စဉ်သည် ဒုတိယအကြိမ် ဖြစ်ကြောင်း ဒေသခံများထံမှ သိရသည်။