သျှမ်းပြည် ကျောက်မဲမြို့နယ် မိုင်းငေါ့မြို့အနီးသို့ စစ်ကောင်စီတပ်မှ လေကြောင်းဖြင့် ဗုံးကြဲတိုက်ခိုက်ခဲ့ကြောင်း စုံစမ်းသိရသည်။
ယနေ့ (ဇူလိုင်လ ၁၅ ရက်) နေ့လယ် ၁ နာရီခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် ကျောက်မဲမြို့နယ် မိုင်းငေါ့မြို့အနီးသို့ စစ်ကောင်စီတပ်မှ လေကြောင်းဗုံးကြဲ တိုက်ခိုက်ခဲ့ရာ မန်ပင့်လမ်းခွဲ တံတားအနီး ကျရောက်ပေါက်ကွဲခဲ့ပြီး ပြည်သူထိခိုက်မှုမရှိကြောင်း မိုင်းငေါ့ဒေသခံများက ပြောသည်။
“မြို့ထဲက တံတားမဟုတ်ဘူး၊ မန်ပင့်လမ်းခွဲက တံတားကြီးနား ကျတာ။ တံတားတော့ အရမ်းကြီး မထိခိုက်လို့ ဖြတ်လို့ရသေးတယ်”ဟု မိုင်းငေါ့မြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် မေလအတွင်းကလည်း TNLA ထိန်းချုပ်ထားသည့် ကျောက်မဲမြို့နယ် မိုင်းငေါ့မြို့အနီး လေကြောင်းဖြင့် ၂ ကြိမ် ဗုံးခွဲတိုက်ခိုက်ခဲ့ခြင်းကြောင့် တာလုံရပ်ကွက်ရှိ စာသင်ကျောင်းအနီးနှင့် ကွင်းစလန်းကျေးရွာတို့တွင် ကျရောက်ပေါက်ကွဲခဲ့ကြောင်း ဒေသခံများထံမှ သိရသည်။
စစ်ကောင်စီတပ်သည် ဇွန်လ (၂၄) ရက်မှ ဇူလိုင်လ (၁၅) ရက်အထိ သုံးပတ်အတွင်း ကျောက်မဲမြို့နယ်တွင် (၇) ကြိမ်၊ သီပေါမြို့တွင် (၂) ကြိမ် လေကြောင်းဖြင့် ဗုံးကြဲတိုက်ခိုက်ခဲ့ပြီး အရပ်သား (၁၂) ဦးထက်မနည်း သေဆုံး၍ (၃၀) ကျော် ထိခိုက်ဒဏ်ရာရရှိကြောင်း ဒေသတွင်း လူမှုကူညီရေးအသင်းများထံမှ သိရသည်။
Leave a Comments