သျှမ်းပြည် သိန္နီမြို့ပေါ်ရပ်ကွက်နေ ပြည်သူများကို ကိုးကန့်တပ်ဖွဲ့ MNDAA မှ အထူးဒေသ(၁) ဒေသခံစိစစ်ရေးကဒ်ပြား ပြုလုပ်ခိုင်းနေကြောင်း စုံစမ်းသိရသည်။
ဇူလိုင်လ ဒုတိယပတ်မှ စတင်ပြီး ကိုးကန့်တပ်ဖွဲ့ MNDAA ထိန်းချုပ်ထားသည့် သိန္နီမြို့တွင် မြို့ပေါ်ရပ်ကွက်နေ ပြည်သူများကို MNDAA ထုတ်ပေးသည့် အထူးဒေသ(၁) ဒေသခံစိစစ်ရေးကဒ်ပြားနှင့် အိမ်ထောင်စုစာရင်း ပြုလုပ်ရန် အစည်းအဝေး ခေါ်ယူကာ စာရင်းပေးသွင်းခိုင်းပြီး တုံကင်နံပါတ် ထုတ်ပေးနေကြောင်း သိန္နီဒေသခံများက ပြောသည်။
“ပြီးခဲ့တဲ့ လပြည့်နေ့က ရပ်ကွက်(၃) တော့ အစည်းအဝေး ခေါ်ပြီ။ သူတို့ (MNDAA) ကိုးကန့်မှတ်ပုံတင် လုပ်ပေးမှာတဲ့၊ တချို့က အိမ်ထောင်စု လုပ်ပေးမယ်ပြောတယ်။ အိမ်မှာရှိတဲ့ လူတွေတော့ စာရင်းသွားပေးကြတယ်၊ ဘယ်နေ့လုပ်ပေးမယ်တော့ မပြောသေးဘူး။ တုံကင်တော့ ပေးလာတယ်၊ မပျောက်စေနဲ့တဲ့”ဟု သိန္နီဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
သိန္နီမြို့ပေါ်ရပ်ကွက်များတွင် အထူးဒေသ(၁) ဒေသခံစိစစ်ရေးကဒ်ပြားနှင့် အိမ်ထောင်စုစာရင်း ပြုလုပ်ပေးရန် MNDAA မှ ဇူလိုင်လ ဒုတိယပတ်အတွင်း (၃) ကြိမ်ထက်မနည်း အစည်းအဝေး ခေါ်ယူခဲ့ပြီး အိမ်ထောင်စုစာရင်းနှင့်တကွ ရပ်ကွက်ရုံးများသို့ သွားရောက်စာရင်းသွင်းရကြောင်း ဒေသခံများထံမှ သိရသည်။
“၁၁ ရက်နေ့က ရပ်ကွက်(၁) အဖွဲ့တွေ အိမ်ထောင်စုယူပြီး ရပ်ကွက်ရုံး သွားရတယ်။ အခုပဲ လုပ်ပေးမှာ နောက်ပိုင်း မလုပ်ပေးတော့ဘူးလို့ ပြောတာ။ တချို့က အိမ်ထောင်စုစာရင်းယူပြီး စစ်သားကောက်မှာ ကြောက်နေတယ်။ မြို့ခံကျတော့ ကိုးကန့်မှတ်ပုံတင် လုပ်ခိုင်းတယ်၊ တခြားနယ်က လူဆိုရင်တော့ နေထိုင်ခွင့်လက်မှတ် လုပ်ရမယ် ပြောတယ်”ဟု သိန္နီမြို့မှ ၎င်းဒေသခံ အမျိုးသမီးက သျှမ်းသံတော်ဆင့်ကို ဆက်ပြောသည်။
ထို့အပြင် ဇူလိုင်လ (၁၂) ရက်ကလည်း သိန္နီမြို့နယ် နမ့်စလပ်ကျေးရွာရှိ ဈေးဆိုင်နှင့် ပွဲရုံဂိုထောင်များတွင် အခြားဒေသမှ အလုပ်လာလုပ်သူများကို MNDAA မှ ရှောင်တခင် စစ်ဆေးခဲ့ပြီး နေထိုင်ခွင့်လက်မှတ် မရှိသူများကို ဒဏ်ကြေးဆောင်ခိုင်းကာ အသစ်ပြုလုပ်ခိုင်းကြောင်း ဒေသခံများထံမှ သိရသည်။
အလားတူ MNDAA ထုတ်ပေးသည့် အထူးဒေသ(၁) ဒေသခံစိစစ်ရေးကဒ်ပြားနှင့် အိမ်ထောင်စုစာရင်းဖြင့် မြန်မာ-တရုတ်နယ်စပ်ရှိ မုံးကိုးနှင့် ချင်းရွှေဟော် နယ်စပ်ဂိတ်များတွင် MNDAA ၏ နယ်စပ်ဖြတ်ကျော်ခွင့်စာအုပ်များ ထပ်မံပြုလုပ်နိုင်ပြီး တရုတ်အစိုးရ ခွင့်ပြုချက်ဖြင့် တရုတ်နိုင်ငံ မံစီမြို့နယ်အထိ ဝင်ထွက်သွားလာနိုင်ကြောင်း နယ်စပ်ကုန်သည်များက ပြောသည်။
လာမည့် စက်တင်ဘာလအတွင်း သိန္နီမြို့မှ ကိုးကန့်တပ်ဖွဲ့များ ထပ်မံတပ်ဆုတ်ရမည်ဟု သတင်းများ ကျယ်ကျယ်ပြန့်ပြန့် ထွက်ပေါ်ခဲ့ပြီးနောက် ပြီးခဲ့သည့် ဇူလိုင်လ ၈ ရက်တွင် စစ်ကောင်စီ ပြန်လည်ထိန်းချုပ်ထားနိုင်သည့် လားရှိုးမြို့ပေါ်ရှိ ဆင်နှစ်ကောင်ဟိုတယ်တွင် တရုတ်ကိုယ်စားလှယ် ကြားဝင်မှုဖြင့် စစ်ကောင်စီနှင့် ကိုးကန့်တပ်ဖွဲ့ MNDAA ကိုယ်စားလှယ်များ ထပ်မံတွေ့ဆုံဆွေးနွေးခဲ့ကြောင်း စစ်ရေးသတင်းရင်းမြစ်ထံမှ သိရသည်။
သိန္နီမြို့ကို တစ်နှစ်ခွဲကျော် ထိန်းချုပ်ထားသည့် ကိုးကန့်တပ်ဖွဲ့ MNDAA သည် မြို့ပေါ်ရပ်ကွက်များကို မူလ (၄) ရပ်ကွက်မှ (၆) ရပ်ကွက်အဖြစ် ပြောင်းလဲသတ်မှတ်ပြီး အုပ်ချုပ်ရေးယန္တရား လည်ပတ်လျက်ရှိသည်။
Leave a Comments