သျှမ်းပြည် ‘ဝ’တပ်ဖွဲ့ UWSA ထိန်းချုပ်နယ်မြေအတွင်း ဖမ်းဆီးရမိသည့် ကျားဖြန့်လုပ်ကိုင်သူ တရုတ်နိုင်ငံသား (၅၀) ဦးကို တရုတ်နိုင်ငံသို့ လွှဲပြောင်းပေးအပ်ခဲ့ကြောင်း သတင်းသိရသည်။

UWSA ဖမ်းဆီးရမိသည့် ကျားဖြန့်လုပ်ကိုင်သူ တရုတ်နိုင်ငံသား (၅၀) ဦးကို ဇူလိုင်လ ၁၂ ရက်တွင် ‘ဝ’ထိန်းချုပ် တရုတ်-မြန်မာနယ်စပ်ရှိ Yonghe ဆိပ်ကမ်းမှတဆင့် တရုတ်နိုင်ငံ ရဲတပ်ဖွဲ့သို့ လွှဲပြောင်းပေးခဲ့ကြောင်းကို UWSA မှ ယမန်နေ့ (ဇူလိုင် ၁၃ ရက်)တွင် သတင်းထုတ်ပြန်ခဲ့သည်။

UWSA မှ ကျားဖြန့်လွှဲပြောင်းမှုတွင် ကျားဖြန့်လုပ်ကိုင်သူ တရုတ်နိုင်ငံသားများနှင့်အတူ မိုဘိုင်းလ်ဖုန်းများ၊ ကွန်ပျူတာများ၊ စက်ပစ္စည်း ကိရိယာများကိုလည်း တရုတ်ရဲတပ်ဖွဲ့ထံ တပါတည်း လွှဲပြောင်းပေးအပ်ခဲ့ကြောင်း ထုတ်ပြန်ချက်တွင် ဖော်ပြထားသည်။

လက်ရှိ လွှဲပြောင်းပေးလိုက်သည့် ကျားဖြန့်လုပ်ကိုင်သူများကို မည်သည့်မြို့ မည်သည့်နေရာတွင် ဖမ်းဆီးရမိခဲ့ကြောင်း ဖြစ်စဉ် အသေးစိတ်ကို UWSA ထုတ်ပြန်ချက်ထဲတွင် ထည့်သွင်းဖော်ပြထားခြင်း မရှိပါ။

ပြီးခဲ့သည့် (ဇူလိုင်လ ၁ ရက်)တွင်လည်း ‘ဝ’ပြည်သွေးစည်းညီညွတ်ရေးတပ်မတော် UWSA ဝင်ရောက်တပ်စွဲထားသည့် တန့်ယန်းမြို့နယ်အတွင်း ဖမ်းဆီးရမိသော အွန်လိုင်းကျားဖြန့် လုပ်ကိုင်သူ တရုတ်နိုင်ငံသား (၆၆) ဦးတို့ကို ပန်ဝိုင်မြို့နယ်ရှိ တရုတ်-မြန်မာ နယ်စပ်ဂိတ်မှတဆင့် တရုတ်ရဲတပ်ဖွဲ့ထံ လွှဲပြောင်းပေးခဲ့ကြောင်း UWSA မှ သတင်းထုတ်ပြန်ထားသည်။