သျှမ်းပြည်တောင်ပိုင်း မောက်မယ်မြို့နယ် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ USDP ၏ ပြည်သူ့လွှတ်တော်ကိုယ်စားလှယ်သည် နှမ်းခင်းသွားနေစဉ် အမည်မသိ လက်နက်ကိုင်၏ ပစ်သတ်ခံရကြောင်း စုံစမ်းသိရသည်။

ယနေ့ (ဇူလိုင်လ ၁၁ ရက်) နံနက် ၈ နာရီခွဲ အချိန်တွင် မောက်မယ်မြို့နယ် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP ကိုယ်စားပြု ပြည်သူ့လွှတ်တော် ကိုယ်စားလှယ်ဖြစ်သူ ဦးစိုင်းငေါင်းဆိုင်ဟိန်းသည် နေအိမ်မှ တောင်ယာနှမ်းခင်းသို့သွားစဉ် မြို့မြောက်ဘက်တွင် အမည်မသိ လက်နက်ကိုင်၏ သေနတ်ပစ်သတ်ခံရပြီး ပွဲချင်းပြီး သေဆုံးသွားခဲ့ကြောင်း မောက်မယ်ဒေသခံများက ပြောသည်။

“ဒီမနက် သတင်းကြားတာတော့ ဆုံးသွားပြီ၊ နှမ်းခင်းထဲမှာ ပစ်သတ်ခံရတာလို့ ပြောတယ်။ သူ့ခြံက မြို့နဲ့ ၂ မိုင်လောက် ဝေးတယ်၊ သူ့အိမ်ကတော့ မြို့ထဲပဲ နေတာ။ သူက မနက်တိုင်း ခြံသွားတယ်၊ ဘယ်သူ ဘယ်အဖွဲ့က ပစ်သွားလဲတော့ မသိဘူး” ဟု မောက်မယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

သေနတ်ပစ်သတ်ခံရပြီး သေဆုံးသွားသည့် ဦးစိုင်းငေါင်းဆိုင်ဟိန်းသည် အသက် (၆၂) နှစ် ရှိပြီဖြစ်ပြီး ၂၀၁၀၊ ၂၀၁၅ နှင့် ၂၀၂၀ အထွေထွေရွေးကောက်ပွဲများတွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP ၏ မောက်မယ်မြို့နယ်ကိုယ်စားပြု ပြည်သူ့လွှတ်တော်ကိုယ်စားလှယ်အဖြစ် (၃) ကြိမ်တိုင်တိုင် ဝင်ရောက်ယှဉ်ပြိုင် အနိုင်ရသူဖြစ်ကြောင်း သိရသည်။

USDP ကိုယ်စားပြု ဦးစိုင်းငေါင်းဆိုင်ဟိန်း သေနတ်ပစ်ခတ်ခံရသည့် အကြောင်းရင်းကို သျှမ်းသံတော်ဆင့်မှ ဆက်လက်စုံစမ်းလျက်ရှိပြီး လက်ရှိအချိန်ထိ ပစ်ခတ်မှုကျူးလွန်သူကို ဖမ်းဆီးရမိခြင်း မရှိသေးကြောင်း ဒေသခံများက ပြောသည်။

ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ၏ မောက်မယ်မြို့နယ် ပါတီဥက္ကဋ္ဌအဖြစ်လည်း တာဝန်ယူထားသည့် ဦးစိုင်းငေါင်းဆိုင်ဟိန်း သေနတ်ပစ်ခံရပြီး သေဆုံးမှုနှင့် ပတ်သက်၍ USDP ပါတီ သျှမ်းပြည်တောင်ပိုင်း၏ ဖေ့စ်ဘုတ်လူမှုကွန်ယက်တွင် မိသားစုနှင့် ထပ်တူဝမ်းနည်းကြောင်း ထုတ်ပြန်ထားသည်။

မောက်မယ်မြို့နယ်တွင် စစ်ကောင်စီတပ်နှင့် ၎င်းလက်အောက်ခံ ပြည်သူ့စစ်တပ်ဖွဲ့များအပြင် သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA)၊ ပအိုဝ်းအမျိုးသားလွတ်မြောက်ရေးတပ်မတော် PNLO အဖွဲ့များလည်း သွားလာလှုပ်ရှားနေကြောင်း ဒေသခံများက ပြောသည်။