ထိုင်းနိုင်ငံ ချင်းမိုင်မြို့တွင် ကလေးငယ်တစ်ဦး ဆေးခြောက်ပါသော ဂျယ်လီစားသုံးပြီး သတိလစ်မေ့မျောခဲ့ပြီးနောက် သက်ဆိုင်ရာဝာာဝန်ရှိသူများက ဆေးခြောက်ပါဝင်သည့် ကုန်ပစ္စည်းများကို လိုက်လံသိမ်းဆည်းနေကြောင်း Chiang Mai News သတင်းတွင် ဖော်ပြသည်။

ချင်းမိုင်ခရိုင် ပြည်သူ့ကျန်းမားရေးဌာန၊ ဒေသန္တရာကျန်းမာရေးဌာန၊ ဆေးသိပ္ပံဌာန ဝာာဝန်ရှိသူနှင့် နယ်မြေခံ ရဲများက ပူးပေါင်းကာ ဇူလိုင် ၇ ရက်နေ့တွင် ချင်းမိုင်မြို့ရှိ ဆေးခြောက်အရောင်းဆိုင်များနှင့် ဆေးခြောက်ပါဝင်သော ကုန်ပစ္စည်းအရောင်းဆိုင်များကို သွားရောက်စစ်ဆေးခဲ့ကြောင်း ဆိုသည်။

စစ်ဆေးချက်အရ ထိုဆိုင်များသည် သက်ဆိုင်ရာနှင့် တရားဝင်ခွင့်ပြုချက်ရထားပြီး အစာနှင့် ဆေးဝါးဌာန ထောက်ခံချက်လည်း ပါရှိသောကြောင့် အရေးယူခံရခြင်း မရှိကြောင်း သိရသည်။

ထိုင်းနိုင်ငံဥပဒေအရ ဆေးခြောက်ပါဝင်သော ထုတ်ကုန်ပစ္စည်းများမှာ တရားဝင် မှတ်ပုံတင်ထားခြင်းမရှိ၊ ပါဝင်ပစ္စည်း ရာခိုင်နှုန်းဖော်ပြထားခြင်း မရှိပါက ဘတ် ၃၀,၀၀၀ ထက်မပိုသော ငွေဒဏ် သို့မဟုတ် ၃ နှစ်ထက်မပိုသော ထောက်ဒဏ်များ ရမှတ်ခံရနိုင်သည်။

ထို့ပြင် ဆေးခြောက်ပါဝင်သော ကုန်ပစ္စည်းမှာ THC အာနိသင် 0.2 ရာခိုင်နှုန်းထက်များနေပါက ထောင်ဒဏ် ၂ နှစ် သို့မဟုတ် ငွေဒဏ် ၂၀,၀၀၀ အထိ ပေးဆောင်ရမည်ဟု ဖော်ပြထားသည်။

ပြီးခဲ့သည့် ဇူလိုင် ၂ ရက်နေ့တွင် ချင်းမိုင်ခရိုင် ဟန်တုန်းမြို့နယ်၌ အသက် ၂ နှစ်အရွယ်ရှိ သမီးငယ်တစ်ဦးသည် မူကြိုကျောင်းတွင် ပုံမှန်မဟုတ်ဘဲ မျက်လုံးတွေေ လေးလံထိုင်းမှိုင်းနေသည့်အတွက် အုပ်ထိန်းသူ ဦးလေးကို ဆရာများက အသိပေးခေါ်ယူခဲ့သည်။

ပုံမှန်မဟုတ်သည့် အခြေအနေကြောင့် ဦးလေးက ချက်ချင်း ဆေးရုံတင်ခဲ့သော်လည်း သတိလစ်မေ့မျောသွားခဲ့ရသည်။

ဖြစ်စဉ်မှာ ဇူလိုင် ၁ ရက်နေ့က ၎င်းတို့အိမ်တွင် ပြုလုပ်သည့် မွေးနေ့ပွဲကို လာသည့် ဧသည့်သည်တစ်ယောက်က ဆေးခြောက်ပါဝင်သော ဂျယ်လီမေ့ကျန်ခဲ့ကြောင်း ဝန်ခံခဲ့ပြီး ထိုကလေးငယ်သည် အဆိုပါဂျယ်လီကို ၁၀ လုံးတိတိစားခဲ့ကြောင်း သိရသည်။

အဆိုပါ ကိစ္စနှင့် ပတ်သက်၍ ကလေးမိဘများက ယခုကဲ့သို့ဖြစ်စေခဲ့သည့်သူကို ဆေးကုသစရိတ် တောင်းခံရာ ဆေးကုသခ သီးသန့် ဘတ် ငါးသောင်းကုန်ခဲ့သည့်အပြင် ဆေးခြောက်ပါဝင်သော ဂျယ်လီမေ့ကျန်ခဲ့သူကို အမှုဖွင့်ထားကြောင်း သိရသည်။