သျှမ်း-ကရင်နီ(ကယား)နယ်စပ် သျှမ်းပြည်တောင်ပိုင်း ဖယ်ခုံမြို့နယ် အနောက်ဘက်ခြမ်း ဆောင်းဖွေးရွာရှိ စစ်ရှောင်စခန်းကို စစ်ကောင်စီမှ လေကြောင်းမှ ဗုံးကြဲတိုက်ခိုက်ခဲ့ခြင်းကြောင်း အသက် (၄)နှစ်အရွယ် ကလေးအပါအဝင် ၃ဦးသေဆုံးသွားကြောင်း သတင်းရရှိသည်။
ယမန်နေ့ (ဇူလိုင်လ ၇)ရက် ည ၁၁ နာရီတွင် ဖယ်ခုံမြို့နယ် ဆောင်းဖွေးရွာရှိ စစ်ရှောင်စခန်းကို စစ်ကောင်စီက ဗုံးကြဲချလိုက်သဖြင့် ၎င်းစစ်ရှောင်စခန်းတွင် နေထိုင်သည့် မိသားစုဝင် (၃)ဉီးပွဲချင်းပြီးသေဆုံးခဲ့ကြောင်း၊ နှစ်ဉီးထိခိုက်ဒဏ်ရာရရှိခဲ့ကြောင်း စစ်ရှောင်ကူညီကယ်ဆယ် ရေးလုပ်သူ အမျိုးသားတစ်ဦးက ပြောသည်။
“မနေ့ညက ၁၁ နာရီအချိန်လောက် လာကြဲသွားတာ။ နှစ်လုံးမှာ တစ်လုံးက မပေါက်ကွဲသေးဘူး။ စစ်ရှောင်မိသားစု တစ်စုထဲကပဲ သုံးဦးလုံးသေတာ။ ကိုယ်ဝန်ဆောင် အမျိုးသမီး နဲ့ အမျိုးသားတစ်ဦးက ထိခိုက်ဒဏ်ရာ ရထားတယ်။ စစ်ရှောင်တွေကို နေရာ ရွှေ့ပြောင်းပေးရတာတွေရှိတယ်။ လိုအပ်တာတွေလည်း များတယ် စားစရာတို့ နေရာထိုင်ခင်းတို့ပေါ့။”ဟု အဆိုပါ အမျိုးသားက ပြောသည်။
ထိုကဲ့သို့ စစ်ကောင်စီဗုံးကြဲတိုက်ခိုက်မှုကြောင့် ပွဲချင်းပြီးသေဆုံးသွားသည့် မိသားစုဝင် (၃)ဉီးမှာ အသက်၄နှစ်အရွယ် မိန်းကလေးတစ်ဦး၊ အသက်(၂၆ )ရှိ အမျိုးသမီး နှင့် အသက်် ( ၂၈) နှစ်အရွယ်ရှိ အမျိုးသားတို့ဖြစ်ပြီး ရရှိသူများသည် အသက် ၃၀ အရွယ် ကိုယ်ဝန်ဆောင် အမျိုးသမီးနှင့် အသက် (၄၀)အရွယ် အမျိုးသားတို့ဖြစ်ကြောင်း ၎င်းက ထပ်လောင်းပြောသည်။
ထို့အပြင် စစ်ကောင်စီဘက်မှ ဖယ်ခုံအရှေ့ခြမ်းတွင် စစ်ရေး အရေးနိမ့်လာချိန် အနောက်ခြမ်းကို ဗုံးကြဲမှုများ ပြုလုပ်နေကာ ပြည်သူများကို ဦးတည်တိုက်ခိုက်လာနေသည်ဟု အဆိုပါ ကူညီကယ်ဆယ်ရေး လုပ်နေသူ အမျိုးသားက ပြောသည်။
“ရှေ့တန်းစစ်မြေပြင်မှာ စကစ ဘက်က အရေးနိမ့်လာတာမျိုးမှာ အနောက်ဘက်ခြမ်းမှာ ရှိတဲ့ စစ်ရှောင်တွေကို လေယာဉ်၊ လက်နက်ကြီးနဲ့ တိုက်ခိုက်တာမျိုး လုပ်လေ့ရှိတယ်။ တိုက်ပွဲမရှိဘဲနဲ့ ရည်ရွယ်ချက်ရှိရှိနဲ့ စစ်ရှောင်တွေ ပြည်သူတွေကို ဗုံးကြဲတိုက်ခိုက်လေ့ရှိတယ်။ စစ်ကောင်စီက သူတို့အာဏာစသိမ်းကတည်းက ပြည်သူတွေကို ဥပဒေမဲ့ သတ်လာတယ်။အခုလို စစ်ဖြစ်တော့လည်း အပြစ်မဲ့ ပြည်သူတွေကို ဖမ်းဆီးတာ သတ်တာ ဗုံးကြဲတာတွေ က တမင်သက်သက် ကျူးလွန်နေ။” ဟု ၎င်းက ဆက်ပြောသည်။
ထို့အပြင် ကရင်နီတော်လှန်ရေးတပ်များ ထိန်းချုပ်ထားသည့် မိုးဗြဲမြို့ကို စစ်ကောင်စီတပ်က ၆ လကြာအောင် ထိုးစစ်ဆင်ပြီးနာက် တစ်မြို့လုံးကို ပြန်လည်တိုက်ခိုက်သိမ်းပိုက်ရရှိပြီ ဖြစ်ကြောင်း စစ်ကောင်စီက ပြီးခဲ့သည့် ဇူလိုင်လ (၇)ရက်နေ့တွင် သတင်းထုတ်ပြန်ထားသည်။
ပြီးခဲ့သည့် ဇွန်လ (၂၄)ရက်နေ့ ညနေပိုင်း ၅ နာရီဝန်းကျင်တွင် ဖယ်ခုံမြို့နယ် အရှေ့ဘက်ကမ်းရှိ လွယ်ပေါကျေးရွာအုပ်စု ဆောင်နန်းခဲကျေးရွာကို စစ်ကြောင်းတိုက်ခိုက်နေသည့် စစ်ကောင်စီနှင့် PNOပြည်သူ့စစ်တို့က ကျေးရွာအတွင်း နေအိမ်များကို မီးရှို့ဖျက်ဆီးခဲ့ကြောင်း သိရသည်။
Leave a Comments