သျှမ်းပြည် ညောင်ရွှေမြို့နယ်အတွင်း ရောက်ရှိနေသည့် စစ်ဘေးရှောင် (၁၇၀၀) ကျော်အတွက် ကျန်းမာရေး စောင့်ရှောက်မှု အကူအညီများလိုအပ်နေကြောင်း သတင်းရရှိသည်။
ဇွန်လ ပထမပတ်မှစ၍ ဖယ်ခုံမြို့နယ် အရှေ့ဘက်ခြမ်းရှိ ကျေးရွာများကို စစ်ကောင်စီတပ်နှင့် ပအိုဝ်းပြည်သူ့စစ် PNO ပူးပေါင်းတပ်ဖွဲ့က ထိုးစစ်ဆင် တိုက်ခိုက်ခဲ့သဖြင့် ဒေသခံ (၁၇၀၀)ကျော် သည် ညောင်ရွှေမြို့နယ်သို့ လာရောက်ရှောင်နေရသည်။
ထိုစစ်ဘေးရှောင်ထဲမှ အမျိုးသမီး ၊ကလေးငယ် နှင့် အသက်ကြီးသည့်သူ ဦးရေ ပိုများကြောင်း သိရသည်။
“မိုးရာသီဆိုတော့ တချို့အတွက် နေရာထိုင်ခင်းက အမိုးအကာတွေမပြည့်စုံတော့ လုံခြုံမှုမရှိဘူး။ ခြင်ထောင်တွေ သိပ်မပါလာတော့ ခြင်တွေကလည်းပေါ ကလေးတွေဖျားနာ နေကြတာ၊ ပြီးတော့ အမျိုးသမီးတွေအတွက် လစဉ်သုံးပစ္စည်းတွေလိုအပ်တယ်။နေမကောင်းလည်း ကိုယ့်ဟာကို ဒီတိုင်းဆေးဆိုင်မှာ ဆေးပဲဝယ်သောက်ရတာ ဆရာဝန်တို့ ဆရာမတို့ကလည်းလာ ကြည့်ပေးတာမျိုးမရှိဘူး။”ဟု ဖယ်ခုံမြို့နယ် စစ်ဘေးရှောင်အမျိုးသားတစ်ဦက ပြောသည်။
ထိုအပြင် မှော်ဘီကျေးရွာတွင် ရောက်ရှိနေသည့် စစ်ရှောင်များအတွက် ဆေးရုံ၊ဆေးခန်းများသည် ဝေးနေသည့်အတွက် မွေးလူနာ၊ အရေးပေါ်လူနာများကို ဆေးရုံးသွားရန်လိုအပ်ပါက ညောင်ရွှေမြို့နယ် နမ့်ပန်ကျေးရွာ၊ တောင်ကြီးမြို့ အထိ သွားရသည့်အတွက် အခက်အခဲများကိုလည်း ကြုံတွေ့ ကြရကြောင်း ဖယ်ခုံမြိုနယ် စစ်ဘေးရှောင် အမျိုးသားတစ်ဦးကပြောသည်။
“တချို့ကိုယ်ဝန်းဆောင်တွေအတွက်ကလည်း နမ့်ပန် ဆေးရုံသွား မဟုတ်ရင် တောင်ကြီးသွားဖို့ပဲရှိတာ။ ပြီးတော့ ဂိတ်တွေမှာလည်း စစ်ရှောင်ဆိုရင် အရမ်းစစ်တယ် အဆင်မပြေဘူး။ စိတ်ပူနေရတာ။ ကိုယ်ဝန်ဆောင် အမျိုးသမီးတွေ ကျန်းမာရေးချို့တဲ့နေတဲ့လူတွေလည်း များတယ်။ အကူညီတွေကလည်း ဒေသခံဆီကလောက်ပဲရှိတယ်။”ဟု ၎င်းကဆက်ပြောသည်။
ညောင်ရွှေမြို့နယ် မှော်ဘီကျေးရွာလာရောက်စစ်ဘေးရှောင်နေသည့် ဖယ်ခုံစစ်ဘေးရှောင် ၁၇၀၀ ကျော်ရှိနေပြီ နေရာထိုင်ခင်းအတွက် အကူအညီများ၊စားနပ်ရိက္ခာများ နှင့် ကလေး၊အမျိုးသမီးများ အတွက် ကျန်းမာရေး အစောက်ရှောက် အကူအညီများ ဆက်လက်လိုအပ်နေကြောင်း ဖယ်ခုံမြို့နယ် စစ်ဘေးရှောင် အမျိုးသားတစ်ဦးကပြောသည်။
ဖယ်ခုံမြို့နယ် အရှေ့ဘက်ခြမ်းတွင် တိုက်ပွဲများဆက်လက်ဖြစ်ပွားနေမှုကြောင့် ကျေးရွာ ၁၃ ရွာမှ ဒေသခံ (၈၀၀၀) ကျော်သည် ဘေးလွတ်ရာသို့ ထွက်ပြေးတိမ်းရှောင်နေကြပြီး လက်ရှိအချိန်ထိ နေရပ်မပြန်နိုင်ကြကြောင်း စစ်ဘေးရှောင်များက ပြောသည်။
Leave a Comments