ထိုင်းနိုင်ငံအတွင်း အကြောင်းအမျိုးမျိုးဖြင့် ရောက်ရှိနေကြသည့် မြန်မာနိုင်ငံသားများအနေဖြင့် ထိုင်းနိုင်ငံရေးလှုပ်ရှားမှုများတွင် မပါဝင်ရန် အမျိုးသားညီညွတ်ရေးအစိုးရ NUG မှ သတိပေးစာ ထုတ်ပြန်လိုက်သည်။

ယနေ့ (ဇူလိုင် ၂ ရက်) တွင် ထုတ်ပြန်ခဲ့သည့် NUG ၏ အသိပေးမေတ္တာရပ်ခံချက်ထဲတွင် ထိုင်းနိုင်ငံအတွင်း ရောက်ရှိနေထိုင်နေကြသည့် မြန်မာနိုင်ငံသားများ အနေဖြင့် ထိုင်းနိုင်ငံသားများ စုဝေးဆန္ဒပြသည့် နေရာများအား ရှောင်ရှားကြရန်၊ ထိုင်းနိုင်ငံရေး လှုပ်ရှားမှုများတွင် ပါဝင်ခြင်း မပြုကြရန် တိုက်တွန်းနှိုးဆော်ထားသည်။

မြန်မာနိုင်ငံ၏ တိုင်းပြည်အခြေအနေ အရပ်ရပ်ကြောင့် အိမ်နီးချင်းနိုင်ငံများတွင် ခိုလှုံနေရသည့်အားလျော်စွာ ယာယီခိုလှုံနေထိုင်လျက်ရှိသည့် နိုင်ငံ၏ ဥပဒေ၊ ဓလေ့ထုံးတမ်း၊ လူမှုအသိုင်းအဝိုင်းများနှင့် သဟဇာတဖြစ်စွာ နေထိုင်နိုင်ရေး လွန်စွာအရေးကြီးခြင်းကြောင့် ထိုင်းရောက်မြန်မာနိုင်ငံသားများ အဘက်ဘက်မှ ဝိုင်းဝန်းဆောင်ရွက်ပေးရန် ဆိုထားသည်။

ပြီးခဲ့သည့် ဇွန်လ ၂၈ ရက်တွင် ဘန်ကောက်မြို့ရှိ အနုစာဝရီ ကျောက်တိုင် (Victory Monument) ၌ ထိုင်းဝန်ကြီးချုပ် ပေထုန်တန် ရှင်နာဝပ် ရာထူးမှ နုတ်ထွက်ပေးရန် ထိုင်းပြည်သူများ ဆန္ဒပြနေစဉ် ၎င်းနေရာအနီးသို့ ကားတစ်စီးဖြင့် ရောက်ရှိလာသော မြန်မာနိုင်ငံသား (၇) ဦးနှင့် ကမ္ဘောဒီးယားနိုင်ငံသား (၁) ဦးတို့ကို ထိုင်းရဲတပ်ဖွဲ့က မသင်္ကာဖြစ်၍ စစ်ဆေးမေးမြန်းရန် ခေါ်ဆောင်သွားခဲ့သည်။

ထို့နောက် ၎င်းတို့၏ နိုင်ငံကူးလက်မှတ် ပက်စ်ပို့စာအုပ်များ၊ ဝေါ့ခ်ပါမစ် အလုပ်လုပ်ခွင့်လက်မှတ်နှင့် ထိုင်းနိုင်ငံသို့ ဝင်ထွက်သွားလာသည့် မှတ်တမ်းများကို ထိုင်းရဲတပ်ဖွဲ့မှ တိုက်ဆိုင်စစ်ဆေးခဲ့ကြောင်း ထိုင်းသတင်းများတွင် ဖော်ပြသည်။

ခေါ်ယူစစ်ဆေးခံရသည့် မြန်မာနှင့် ကမ္ဘောဒီးယား နိုင်ငံသားများကို ပြန်လွှတ်၊ မလွှတ် လက်ရှိအချိန်ထိ မသိရသေးဘဲ နိုင်ငံရေးအပြောင်းအလဲ တောင်းဆိုသည့် ဆန္ဒပြနေရာအနီးသို့ လာရောက်ပါက စုံစမ်းစစ်ဆေးရမည်ဟု ထိုင်းရဲတပ်ဖွဲ့က ပြောကြားထားကြောင်း သိရသည်။