မန္တလေးတိုင်း မိုးကုတ်မြို့ပေါ်တွင် မိုးသည်းထန်စွာ ပြီးနောက်ပိုင်း ရေကြီးရေလျှံမှု ကြုံတွေ့ရကြောင်း စုံစမ်းသိရသည်။
ယနေ့ (ဇွန်လ ၂၇ ရက်) မနက်ပိုင်းတွင် မိုးကုတ်မြို့ အရှေ့ပိုင်း ၊ မင်းတံတား ရပ်ကွက်တွင် မိုးသည်းထန်ရွာသွန်းခဲ့ခြင်းကြောင့် ရေကြီးရေလျှံမှု ကြုံတွေ့ ခဲ့ရကြောင်း မိုးကုတ်မြို့ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ဒီမနက်ရေတွေကြီးနေတာ ဟုတ်တယ်။ မင်းတံတား ဘက်မှာပါ။ အခုတော့ မိုးတိတ်ပြီး ရေတွေ ပြန်ကျ နေပြီ။ ညက နည်းနည်းမိုးများသွားလို့ ရေကြီးတာ။မိုးနည်းနည်းရွာတာနဲ့ ရေကြီး တာတော့ ဖြစ်တယ်။ ဒီနေ့က ရေတက်တာ ဒူးကျော်တယ် တချို့နေရာ ခါးလောက်ရှိတယ်။”ဟု မိုးကုတ်မြို့ ဒေသခံအမျိုးသားတစ်ဦးကပြောသည်။
မိုးကုတ်မြို့သည်” ၁၀၂၇ စစ်ဆင်ရေး” ဒုတိယပိုင်း ၂၀၂၄ခုနစ် ဇူလိုင်လပိုင်းတွင် တအာင်း(ပလောင်) အမျိုးသား လွတ်မြောက်ရေး တပ်မတော် (TNLA) ထိန်းချုပ်သည့် နယ်မြေဖြစ်သည်။
TNLA ထိန်းချုပ်ပြီးနောက်ပိုင်း ကျောက်မျက်ရတနာ တူးဖော်မှု အလွန်အကျွံ ယခင်ကထက်ပိုလုပ်ဆောင်လာပြီး၊ သဘာဝပတ်ဝန်းကျင် ပျက်စီးဆုံးရှုံးမည်ကို မိုးကုတ်ဒေသခံများက စိုးရိမ်ပူပန်နေကြကြောင်း သိရသည်။
“ မိုးကုတ်က အရင်နှစ်တွေကလည်း မိုးရွာရင် ရေတော့ ကြီးတယ်။ အဓိကတော့ ဒီမှာ ကျောက်မျက်တွေတူးတာ အလွန်အကျွံကြောင့်လည်းပါတယ်။ ဒီတူးဖော်မှုကို မကန့်သတ်ရင် သဘာဝပတ်ဝန်းကျင်က ဒီထက်ဆိုးရွားလာမယ်။ အခုဆို မိုးရွာတာနဲ့ ရေက ကြီးနေပြီ” ဟု မိုးကုတ်ဒေသခံ အမျိုးသမီးက ဆိုသည်။
လွန်ခဲ့သည့် ရက်ပိုင်း (ဇွန်လ ၂၅ ရက်)မိုးကုတ်မြို့ အရှေ့ပိုင်း အုန်းကိုင်းရပ်ကွက်ကို စစ်ကောင်စီတပ်က လေကြောင်း ဗုံးကြဲခဲ့ခြင်းကြောင့် ကလေးအပါအဝင် အရပ်သား ၃ ဦး ထိခိုက်ဒဏ်ရာ ရခဲ့ကြောင်းသိရသည်။
ယခုရက်ပိုင်း စစ်ကောင်စီလေကြောင်းဖြင့် အကြီးအကျယ် ဗုံးကြဲတိုက်ခိုက်သည့်နေရာများမှာ “၁၀၂၇ စစ်ဆင်ရေး” ဒုတိယလှိုင်း တွင် TNLA ထိန်းချုပ်နိုင်ခဲ့သည့် မိုးကုတ်မြို့၊ ကျောက်မဲမြို့၊ နောင်ချိုမြို့နယ်တို့ ဖြစ်သည်။
Leave a Comments