သျှမ်းပြည် မြောက်ပိုင်း မူဆယ်မြို့ မန့်ဝိန်းရပ်ကွက်ရှိ နေအိမ်တစ်အိမ်ကို ဝင်ခိုးပြီး ထွက်ပြေးသည့် သူခိုးကို ပြည်သူ့စစ်တပ်ဖွဲ့က လိုက်လံဖမ်းဆီးကာ ပစ်သတ်ခဲ့ကြောင်း သတင်းရရှိသည်။
ယမန်နေ့ (ဇွန်လ ၂၅ ရက်) နေ့လည် ၁ နာရီဝန်းကျင်တွင် မူဆယ်မြို့ မန်ဝိန်းရပ်ကွက်ရှိ နေအိမ်တစ်လုံးကို အသက် ၂၀ ဝန်းကျင်ရှိ အမျိုးသားတစ်ဦးက ဝင်ခိုးခဲ့ပြီး ထွက်ပြေးရာမှ ပြည်သူ့စစ်အဖွဲ့က လိုက်လံဖမ်းဆီးချိန် ပစ်ခတ်ခံခဲ့သဖြင့် သေဆုံးသွားကြောင်း မူဆယ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“မန်ဝိန်းက အိမ်ထဲကို ဝင်ခိုးတာ အိမ်ရှင်လာတော့ ခိုးတဲ့လူကထွက်ပြေးတာ။ ထွက်ပြေးလာတော့ ပြည်သူ့စစ်ရှိတဲ့ ဘက်ကိုပြေးသွားတယ်လေ။ အဲ့မှာ အိမ်ရှင်က အော်လိုက်တာနေမှာ သူတို့ကလည်း လိုက်ဖမ်းတာ။ လိုက်ဖမ်းတဲ့ ပြည်သူ့စစ်တွေက မမီတော့ ရပ်ခိုင်းတာမရပ်လို့ သေနတ်နဲ့ ပစ်တာ။အဲ့မှာပဲ ချက်ချင်း ပွဲချင်းပြီး သေသွားတာ။ သူခိုးကတော့ ဘာမှ မရလိုက်ပါဘူး” ဟု မူဆယ်မြို့နယ် ဒေသခံအမျိုးသားတစ်ဦးက ပြောသည်။
မူဆယ်မြို့နယ်တွင် လက်နက်ကိုင် ပြည်သူ့ စစ်ပေါင်းစုံလှုပ်ရှားသည့်ဒေသဖြစ်ပြီး ပစ်ခတ်မှု ဒုစရိုက်မှုများ မကြာခဏ ဖြစ်ပွားလေ့ရှိသည်။
ထို့အပြင်း လောင်းကစားဝိုင်းများလည်း ယခင်ကထက်ပေါများလာကြောင်း ၎င်းအမျိုးသားက ထပ်လောင်းပြောသည်။
“မူဆယ်မှာက လက်နက်ကိုင်တွေ ပြည်သူ့စစ်တွေလည်းများ။သူတို့မှာပစ်ခွင့်ရှိလား မရှိဘူးလား ဆိုတာ မသိရဘူး။တချို့ကဖမ်းပြီးရင်လည်း ပစ်သတ်ချင်ရင် ပစ်သတ်လိုက်ကြတာပဲ။ လောင်း ကစားဝိုင်း ကလည်း နေရာတိုင်းလိုလိုကို ရှိနေတာလေ။တချို့ဟာကို ပြည်သူ့စစ်ကပဲ လုံခြုံရေးယူပေးနေတာလေ”ဟု ၎င်းကပြောသည်။
လောင်းကစားရုံများသည် မူဆယ်မြို့အတွင်း ရပ်ကွက် ၉ ခု အပြင် မြို့ဆင်ခြေဖုံးဖြစ်သော ဟိုနားရပ်ကွက်၊ စက်မှုရပ်ကွက်၊ ကောင်းမှူးလွယ်ရပ်ကွက်၊ မန့်ဝိန်းရပ်ကွက် ၊ ခူးဝိန်းရပ်ကွက် စသည့်နေရာများတွင် ငါးပစ်ဂိမ်းစက်နှင့် အခြား လောင်းကစားရုံ အမြောက်အများ ရှိကြောင်း သိရသည်။
မူဆယ်မြို့သည် မြန်မာ-တရုတ်နယ်စပ်ဒေသဖြစ်သကဲ့သို့ စစ်ရေးပဋိပက္ခ မဖြစ်ပွားသည့်ဒေသဖြစ်ပြီး၊ လက်ရှိအချိန်ထိ စစ်ကောင်စီ ၏လက်အောက်ခံ ဌာနများ လည်ပတ်နေဆဲမြို့ဖြစ်သည်။
မူဆယ်မြို့၏ ဘေးပတ်ပတ်လည်တွင် တိုင်းရင်းသားလက်နက်ကိုင်တပ်ဖွဲ့များ လှုပ်ရှားနေသကဲ့သို့ စစ်ကောင်စီလက်အောက်ခံ ပြည်သူ့စစ်အဖွဲ့များဖြစ်သည့် ကောင်းခါးပြည်သူ့စစ်၊ မြို့မပြည်သူ့စစ်၊ ပန်းဆေးပြည်သူ့စစ်၊ လုံထန်ပြည်သူ့စစ်၊ ပိန်းဆာ ပြည်သူ့စစ်၊ မန်ဂျယ် ပြည်သူ့စစ်၊ စိန်ကျော့ပြည်သူ့စစ်၊ မန်ပြိန်း ပြည်သူ့စစ်၊ ရှောက်ဟော် ပြည်သူ့စစ်၊ တာမိုးညဲ ပြည်သူ့စစ်၊ မုံးပေါ် ပြည်သူ့စစ် အပြင် အဖွဲ့ပေါင်း ၁၅ဖွဲ့ထက်မနည်း လှုပ်ရှားကြောင်း သိရသည်။
Leave a Comments