သျှမ်းပြည်မြောက်ပိုင်း၊ နောင်ချိုမြို့နယ်တွင် စစ်ကောင်စီတပ်က စစ်အင်အား အလုံးအရင်း ဖြည့်တင်းကာ ထိုးစစ်ဆင်နေပြီး အချို့ကျေးရွာများကိုလည်း ပြန်လည်သိမ်းယူထားကြောင်း စစ်ရေးသတင်းရင်းမြစ်များက ပြောသည်။

စစ်ကောင်စီတပ်သည် ရပ်စောက်မြို့နယ်မှတဆင့် တောင်းခမ်း-ကံကြီးဘက်မှလည်းကောင်း၊ ပြင်ဦးလွင်မြို့မှတဆင့် အုမ္မသီးကျေးရွာဘက်မှလည်းကောင်း စစ်ကြောင်းခွဲကာ နောင်ချိုမြို့ဘက်သို့ အပြင်းအထန် ထိုးစစ်ဆင် တိုက်ခိုက်ပြီး ရွှေသွန်းကျေးရွာ၊ လုံဝယ်ကျေးရွာ နှင့် ညံတောကျေးရွာဘက်အထိ စစ်အင်အား ဖြည့်တင်းလာကြောင်း ရှေ့တန်းရောက် စစ်ရေးသတင်းရင်းမြစ်တစ်ဉီးက သျှမ်းသံတော်ဆင့်ကို ပြောသည်။

“နေသာတဲ့ နေ့ဆို လေယာဉ်လာတော့ မိုးပဲ ရွာစေချင်တာ။ သူတို့က အပစ်ရပ်ကာလကို ဒီလကုန်ထိ ပြောပြီး စစ်ကောင်စီဘက်ကပဲ ထိုးစစ်လုပ်နေတာ၊ ကျနော်တို့တော့ ခံစစ်အနေနဲ့ပဲ တိုက်နေရတာ။ သူတို့ (စစ်ကောင်စီ)က အင်အားအလုံးအရင်းနဲ့ လာတာ၊ တခါတလေဆို သူတို့ဘက်ကလည်း အလုံးအရင်း သေတယ်” ဟု ၎င်းစစ်ရေးသတင်းရင်းမြစ်က ဆိုသည်။

စစ်ကောင်စီတပ်သည် လက်ရှိအနေအထားအရ နောင်ချိုမြို့နယ် ရွှေမုဌောကျေးရွာ၊ နောင်လင်ကျေးရွာ၊ မဲပုတ်ကျေးရွာ၊ သရက်ချိုကျေးရွာနှင့် ရှောက်ခြုံကျေးရွာတို့ကို ပြန်လည် သိမ်းယူထားသည်။

ထို့အပြင် စစ်ကောင်စီတပ်သည် နောင်ချိုမြို့ကို ပြန်ရရန် စစ်အင်အား အလုံးအရင်းဖြင့် ထိုးစစ်ဆင်နေပြီး စစ်ကောင်စီ ရောက်ရှိနေသော ရွှေသွန်းရွာနှင့် နောင်ချိုမြို့သည် ၈ မိုင်ခန့်သာ ကွာဝေးတော့ကြောင်း သိရသည်။

နောင်ချိုမြို့နယ်အတွင်း ဖြစ်ပွားသည့်တိုက်ပွဲများကြောင့် ကျောက်မဲမြို့နယ်ဘက်သို့ ထွက်ပြေးတိမ်းရှောင်သွားသော စစ်ဘေးရှောင်များသည် စားဝတ်နေရေး အခက်အခဲ ဖြစ်ပွားနေကြောင်း စစ်ဘေးရှောင် အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

“ကျောက်မဲမြို့ဘက်မှာ စစ်ရှောင်နေကြတာ အများကြီးပဲ၊ တစ်ထောင်ကျော်မယ် ထင်တာပဲ။ နောင်ချိုတို့ နောင်ပိန်တို့ဘက်မှာ တအုန်းအုန်းနဲ့ အသံတွေ ကြားနေရတာ။ အစ်မတို့လည်း အခြေအနေ ကြည့်နေရတာ၊ ဒီတစ်ခါဆို ပြေးစရာမြေ မရှိတော့ဘူး။ ဆိုင်ကယ်က လိုင်စင်ဖမ်းတယ် ဆိုတော့ စီးစရာလည်း မရှိဘူး၊ အလုပ်အကိုင်လည်း ရှားတယ်” ဟု ၎င်းစစ်ရှောင် အမျိုးသမီးက ဆိုသည်။

စစ်ကောင်စီတပ်က ဇွန် ၂၂ ရက်တွင် နောင်ချိုမြို့ သရက်ကုန်ကျေးရွာကို လေကြောင်းဖြင့် ဗုံးကြဲတိုက်ခိုက်ခဲ့ပြီး၊ ဇွန် ၂၁ ရက်တွင်လည်း နောင်ချိုမြို့ သံဘိုကျေးရွာကို စစ်ကောင်စီတပ်က လေယာဉ်ဖြင့် ဗုံးအလုံး(၅၀)ကျော် ကြဲချတိုက်ခိုက်ခဲ့ကြောင်း TNLA ဘက်မှ ထုတ်ပြန်ထားသည်။

ပြီးခဲ့သည့် ဧပြီလကုန်ပိုင်းတွင် တအာင်း(ပလောင်)အမျိုးသားလွတ်မြောက်ရေးတပ်မတော် TNLA နှင့် စစ်ကောင်စီတို့သည် တရုတ်၏ ကြားဝင်စေ့စပ်ပေးမှုဖြင့် ကူမင်းမြို့၌ တွေ့ဆုံဆွေးနွေးမှု ပြုလုပ်ခဲ့ရာ နောင်ချိုမြို့နယ်၊ ကျောက်မဲမြို့နယ်၊ သီပေါမြို့နယ်၊ မိုးကုတ်မြို့နယ်နှင့် မိုးမိတ်မြို့နယ်တို့မှ TNLA တပ်များ ဆုတ်ခွာရန် စစ်ကောင်စီဘက်က တောင်းဆိုခဲ့ခြင်းကြောင့် ဆွေးနွေးပွဲ မအောင်မြင်ခဲ့ပေ။

စစ်ကောင်စီ၏ စစ်ရေးဖိအားပေးမှု၊ တရုတ်အစိုးရ၏ ဖိအားကြား TNLA အနေဖြင့် ရင်ဆိုင်နေရသော်လည်း ၎င်းတို့ သိမ်းပိုက်ထားသည့် နယ်မြေကို လက်လွှတ်မည်မဟုတ်ကြောင်း၊ စစ်အာဏာရှင်ကို ဆက်လက်တော်လှန်သွားမည် ဖြစ်ကြောင်း ဇွန် ၅ ရက်တွင် ပြုလုပ်သည့် သတင်းစာရှင်းလင်းပွဲတွင် TNLA ဘက်မှ ပြောဆိုခဲ့သည်။