သျှမ်းပြည် မိုင်းပန်မြို့နယ် လွိုင်နွဲ့ရွာရှိ KTV ဆိုင်တွင် အသက် ၁၆ အရွယ် မိန်းကလေးငယ်တစ်ဉီး Happy Water စိတ်ကြွဆေးရည် သောက်သုံးပြီး သေဆုံးသွားခဲ့ကြောင်း ဒေသခံများထံမှ သိရသည်။

ဖြစ်စဉ်မှာ ဇွန်လ ၂၁ ရက် ညပိုင်းတွင် အသက် ၁၆ နှစ်အရွယ် နန်းဟျိုးငင်းသည် ၎င်းသူငယ်ချင်းနှင့်အတူ မိုင်းပန်မြို့နယ် လွိုင်နွဲ့ရွာရှိ KTV ဆိုင်သို့ သွားရောက်လည်ပတ်ပြီး Happy Water စိတ်ကြွဆေးရည်ကို သောက်သုံးရာ ရုတ်တရက်သေဆုံးသွားခဲ့ကြောင်း မိုင်းပန်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သူငယ်ချင်းတွေနဲ့စုပြီး KTV သွားလည်ကြတာ၊ Happy Water သောက်ပြီးတော့ အဲ့သလို ရုတ်တရက်ဆုံးသွားတာပဲ။ အစတုန်းက ဆေးရုံကိုပို့လိုက်သေးတယ်၊ ဆေးရုံကလက်မခံတော့ အိမ်ကိုပြန်ခေါ်လာတာ” ဟု ၎င်းကပြောသည်။

သေဆုံးသွားသူမှာ အသက် ၁၆ နှစ်အရွယ် နန်းဟျိုးငင်းဆိုသူ မိန်းကလေးငယ်တစ်ဦးဖြစ်ပြီး မိုင်းပန်မြို့၌ ကျောင်းတက်နေသည့် ကျောင်းသူတစ်ဦးလည်း ဖြစ်ကြောင်း သိရသည်။

Happy Water ဆိုသည်မှာ MDMA (အက်တစီ)၊ မက်သာဖက်တမင်း၊ ဒိုင်ယာဇီပင်နှင့် ကက်တမင်းတို့ အပါအဝင် ဓာတုဆေးဝါးများဖြင့် အမှုန့်ကြိတ် အရည်ဖျော်စပ်ထားသည့် စိတ်ကြွဆေးရည်ဖြစ်သည်။

ထိုစိတ်ကြွဆေးရည်ကို ကော့တေးလ်ခွက်ဖြင့် ရေ၊ အချိုရည်၊ အရက် စသည့်ဖြင့်ရောကာ သောက်သုံးပြီးလျှင် လူကိုမပင်ပန်းစေဘဲ ပျော်ရွှင်မြူးတူး ကခုန်စေနိုင်သည့်အပြင် လူကို တက်ကြွစေသည့် အရည်တမျိုးဖြစ်သည်။

သို့သော် ထိုစိတ်ကြွဆေးရည်ကိုသောက်ပြီး ကခုန်ခြင်းမပြုပါက အရိုးအဆစ်များ အေးခဲလာပြီး ကြွက်သား၊ အကြောများ တောင့်တင်းလာကာ နောက်ဆုံးတွင် အသက်ဆုံးရှုံးရသည့်အထိ ဖြစ်နိုင်သည်ဟု သုံးစွဲသူများထံမှ သိရသည်။

စစ်တပ်အာဏာသိမ်းပြီးနောက်ပိုင်း မိုင်းပန်မြို့နယ်တွင် KTV ဆိုင်များ ပေါများခြင်းကြောင့် လူငယ်များအကြား ရေပန်းစားလာသော မူးယစ်ဆေးပေါင်းစုံ ရောစပ်ထားသည့် စိတ်ကြွဆေးရည် ကော့တေးလ်နှင့် ပတ်သက်ပြီး စိုးရိမ်နေရသည်ဟု ဒေသခံများကပြောသည်။

“အရင်တုန်းက မိုင်းပန်မှာ KTV ဆိုလည်းမရှိဘူး၊ Happy Water ဆိုလည်း မကြားဖူးဘူး။ ဘိန်းဖြူတို့၊ ရာမ (မြင်းဆေး) တို့ပဲ ကြားဖူးတယ်။ အခုလို ခေတ်ကာလအခြေအနေ မကောင်းအချိန်မှာ ကျနော်တို့ လူငယ်တွေ ဘာမှမသိဘဲနဲ့ စမ်းသပ်တာမျိုး၊ လုပ်ကြည့်တာမျိုး စတာတွေကြောင့် လမ်းမှားရောက်သွားမှာကို အရမ်းစိုးရိမ်ရတယ်” ဟု မိုင်းပန်မြို့ဒေသခံ အသက် ၃၀ ကျော် အမျိုးသားတစ်ဦးက ပြောသည်။

လက်ရှိ မိန်းကလေးငယ်တစ်ဦး သေဆုံးမှုနှင့် ပတ်သက်၍ မည်သည့် အဖွဲ့အစည်းမှ အရေးယူဆောင် ရွက်ပေးခြင်းမရှိသကဲ့သို့ KTV ဆိုင်များလည်း ဖွင့်လှစ်ဆဲရှိနေသေးကြောင်း ၎င်းကဆိုသည်။

မိုင်းပန်မြို့သည် သျှမ်းပြည်ပြန်လည်ထူထောင်ရေးကောင်စီ RCSS ၏ ထိန်းချုပ်နယ်မြေဒေသ တစ်ခုဖြစ်သည်။

အာဏာသိမ်းပြီးနောက်ပိုင်း ထိုင်း-မြန်မာနယ်စပ် တာချီလိတ်မြို့နှင့် တရုတ်-မြန်မာနယ်စပ် မူဆယ်မြို့ရှိ KTV ဆိုင်၊ ကလပ်ဆိုင်နှင့် ဘားဆိုင်များတွင် Happy Water စိတ်ကြွဆေးရည်၊ K (Ketamine) မူးယစ်ဆေးနှင့် E (Ecstasy) မူးယစ်ဆေးများမှာ လူငယ်များအကြား၌ ရေပန်းစားလာသလို မကြာခဏ သေဆုံးမှုများလည်း ရှိသည်။

ထိုမူးယစ်ဆေးကို အလွန်အကျွံသုံးစွဲမှုကြောင့် ပြီးခဲ့သော ၂၀၂၃ ခုနှစ် စက်တင်ဘာလ ၁၇ တွင်လည်း မူဆယ်မြို့၌ အသက် ၁၉ နှစ်အရွယ် မိန်းကလေးတစ်ဦးလည်း သေဆုံးခဲ့ရသည်။