သျှမ်းပြည် လားရှိုးမြို့နယ်ရှိ ကိုးကန့်တပ်ဖွဲ့ MNDAA မှ ကျေးရွာအားလုံးနီးပါးတွင် တပ်သားသစ် အတင်းအကြပ် စုဆောင်းနေကြောင်း စုံစမ်းသိရသည်။
ကိုးကန့်တပ်ဖွဲ့ MNDAA သည် လားရှိုးမြို့ပေါ် ရပ်ကွက် (၁၂) ခုကို စစ်ကောင်စီထံ ဧပြီလအတွင်း ပြန်လည်အပ်နှံရပြီးနောက် လားရှိုးမြို့ပြင်ရှိ ကျေးရွာအားလုံးနီးပါးတွင် တပ်သားသစ် အတင်းအကြပ် စုဆောင်းနေကြောင်း ဒေသခံများက ပြောသည်။
ဇွန်လဆန်းပိုင်းမှ စတင်ပြီး MNDAA ၏ မြို့နယ်မှူးဆိုသူများမှ လားရှိုးမြို့နယ် အရှေ့တောင်ဘက်ရှိ မိုင်းပိုင်၊ နားနန်း၊ မန်စယ်၊ နမ့်ပေါင် စသည့် ကျေးရွာအုပ်စုများတွင် တစ်ရွာလျှင် တစ်ဦးကျ တပ်သားသစ် စုဆောင်းပြီး ဇွန်လ ၂၅ ရက် နောက်ဆုံးထား ပို့ဆောင်ပေးရန် ဆင့်ခေါ်ထားကြောင်း လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“နမ့်ပေါင်ဘက်က ကိုးကန့်မြို့နယ်မှူးလုပ်တဲ့လူက စစ်သားလုပ်ဖို့ လူလာကောက်တာ။ တစ်ရွာကို လူတစ်ယောက် ရအောင် ရှာပေးရမယ်၊ ၂၅ ရက်နေ့ မအပ်ပေးနိုင်ရင် ရွာလူကြီးကို အစားထိုး ခေါ်သွားမယ် ပြောတယ်။ မန်စယ်အုပ်စုကတော့ လူစားထိုးဖို့ ရှာတာ သိန်း (၆၀) နဲ့ ရတယ်လို့ ကြားတယ်”ဟု ၎င်းဒေသခံ အမျိုးသားက ပြောသည်။
လားရှိုးမြို့နယ် MNDAA တပ်ဖွဲ့ထံ ဇွန်လ (၂၅) ရက် နောက်ဆုံးထား၍ တပ်သားသစ် ပို့ဆောင်ပေးရမည့် ကျေးရွာများမှာ မိုင်းပိုင်အုပ်စု၊ ကြူတီးအုပ်စုနှင့် တောနေအုပ်စုတို့ ဖြစ်ကြောင်း ဒေသခံများထံမှ သိရသည်။
အလားတူ လားရှိုးမြို့နယ် နမ့်ပေါင်ကျေးရွာအုပ်စုအတွင်းရှိ ရွာပေါင်း (၉) ရွာလည်း တစ်ရွာလျှင် တစ်ဦးကျ လူသစ်စုဆောင်းပြီး ပို့ဆောင်ပေးရန် MNDAA ၏ ဒုတိယမြို့နယ်မှူးဆိုသူ ဦးစိုးမြင့်နှင့် စိုင်းကျော်ဟန်တို့က ဦးဆောင်ကာ အစည်းအဝေး ပြုလုပ်ခဲ့ကြောင်း နမ့်ပေါင်ဒေသခံများက ပြောသည်။
“ကိုးကန့်က အပြောတစ်မျိုး၊ အလုပ်တစ်မျိုး အဲ့လိုဖြစ်နေတာ။ အထက်လူကြီးတွေ ဘယ်လိုပဲ ဆွေးနွေးတယ်ပြောလည်း အောက်ခြေက လုပ်ချင်တာ လုပ်တာပဲ။ အရင်တစ်ပတ်က SSPP နဲ့ ဆွေးနွေးတုန်းက ဒီဘက်မှာ လူမကောက်တော့ဘူးလို့ သဘောတူထားတာ၊ သူတို့ကတိ မတည်ဘူးလားပေါ့”ဟု ၎င်းအမျိုးသားက ဆက်ပြောသည်။
ပြီးခဲ့သည့် ဇွန်လ (၅) ရက်ကလည်း လားရှိုးမြို့နယ်ရှိ ကိုးကန့်တပ်ဖွဲ့ MNDAA မှ လောင်ခိုင် ဆိုသူ ဦးဆောင်သည့် အဖွဲ့သည် ဟန်နားကျေးရွာ ဥက္ကဋ္ဌ ဦးဆန်ကြာကို စဉ့်အင်ဘက်ရှိ နားလန်းရွာသို့ တစ်ညအိပ် ဖမ်းဆီးသွားပြီး ဟန်နားကျေးရွာအုပ်စုအတွင်းရှိ အိမ်ထောင်စုစာရင်းများကို ပြည်သူ(၁၀) ဦးမှ သွားရောက်ပေးပို့မှသာ ဇွန်လ (၆) ရက်တွင် ပြန်လည်လွတ်မြောက်လာခဲ့ကြောင်း ဒေသခံများက ပြောသည်။
ထို့အပြင် သီပေါမြို့နယ် မိုင်းလင်းကျေးရွာအုပ်စုရှိ မန်မိုင်မိုက်နင်(မႆႉၼိမ်)ရွာမှ ကျေးရွာဥက္ကဋ္ဌနှင့် ရှေ့မီနောက်မီ လူကြီး (၂) ဦးတို့ကိုလည်း အိမ်ထောင်စုစာရင်း အကြောင်းပြကာ ကိုးကန့်တပ်ဖွဲ့မှ ဇွန်လပထမပတ်အတွင်း ဖမ်းဆီးခေါ်ဆောင်သွားခဲ့ပြီး ဇွန်လ (၆) ရက်တွင် ပြန်လွှတ်ပေးခဲ့သည်။
ပြီးခဲ့သည့် ဇွန်လ (၁၇) ရက်တွင် လားရှိုးမြို့နယ် နမ့်ပေါင်ကျေးရွာအနီးရှိ သံလွင်ကျေးရွာတွင် SSPP နှင့် MNDAA နှစ်ဘက်အရာရှိများ ဒုတိယအကြိမ် တွေ့ဆုံဆွေးနွေးခဲ့ပြီး SSPP ထိန်းချုပ် မိုင်းရယ်၊ နမ့်ပေါင်နှင့် ဆင်ကျော့အနီးတဝိုက်တွင် MNDAA မှ တပ်သားစုဆောင်းခြင်း၊ အုပ်ချုပ်ရေးချမှတ်ခြင်းနှင့် အခွန်(ဆတ်ကြေး) ကောက်ခံခြင်း မပြုလုပ်ရန် သဘောတူညီမှု ရရှိခဲ့ကြောင်း စစ်ရေးသတင်းရင်းမြစ်ထံမှ သိရသည်။
Leave a Comments