သျှမ်းပြည် တောင်ကြီးမြို့နယ်၊ ဟိုပုံးမြို့နယ်နှင့် ဆီဆိုင်မြို့နယ်အတွင်းရှိ ပုံးအင်းဒေသတွင် မိုးအဆက်မပြတ် ရွာသွန်းမှုကြောင့် နွေစပါးစိုက်ခင်းများ ဧကပေါင်း ရာနှင့်ချီ ရေနစ်မြှုပ်သွားခဲ့ကြောင်း ပုံးအင်းတောင်သူများက ပြောသည်။

ပြီးခဲ့သည့် သီတင်းတပတ်အတွင်း မိုးအဆက်မပြတ်ရွာသွန်းမှုကြောင့် ရေကြီးရေလျှံမှု ဖြစ်ပေါ်ခဲ့ပြီး တောင်ကြီးမြို့နယ် နားဟီးကျေးရွာအုပ်စု၊ အသုံးတော်ကျေးရွာအုပ်စုနှင့် ဆီဆိုင်မြို့နယ် ပုံးအင်းကျေးရွာအုပ်စု အတွင်းရှိ နွေစပါးစိုက်ခင်း ဧက တစ်ထောင် ကျော် ရေလွှမ်းမိုးခံခဲ့ရကြောင်း ပုံးအင်းဒေသခံ တောင်သူတစ်ဦးက သျှမ်းသံတော်ဆင့်ကို ပြောသည်။

“ပျိုးခင်းစိုက်ပြီး မကြာသေးဘူး၊ ရေမြှုပ်သွားတာ။ ပြန်ယူလို့လည်းမရတော့ဘူး၊ စပါးတွေက ပုတ်ကုန်ပြီ။ အခုက ရေဘေးတင်မကဘူး၊ မြက်စားငါးကြင်းဘေးတွေလည်း ကြုံနေရတယ်။ စပါးစိုက်ခင်းရေမြှုပ်တွေတော့ စပါးပင်တွေကို မြက်စားငါးကြင်းတွေ အကုန်စားပစ်လိုက်တာ၊ ပြီးတော့ ရွှေခရုတွေလည်းကျတော့ စပါးတွေ တော်တော်များများ ပျက်စီးကုန်ပြီ” ဟု ပုံးအင်းဒေသခံ တောင်သူတစ်ဦးက ပြောသည်။

ယမန်နှစ် သြဂုတ်လတွင်လည်း ပုံးအင်းဒေသတွင် ရေကြီးရေလျှံမှု ဖြစ်ပေါ်ခြင်းကြောင့် စပါးဧက တစ်သောင်းကျော်အပြင် စပါးကျည်အတွင်း သိုလှောင်ထားသော စပါးများလည်း ပျက်စီးသွားသောကြောင့် တောင်သူများ အရှုံးပေါ်ခဲ့ရသည်။

ပုံးအင်းဒေသ တောင်သူများသည် ယမန်နှစ်က စပါးအရှုံးပေါ်ခဲ့သဖြင့် ယခုနှစ်အတွင်းမှာ စားလောက်ရုံသာ စပါးဧကလျှော့ပြီး စိုက်ပျိုးခဲ့သည်။

သို့သော်လည်း မိုးဦးအစမှာပင် မိုးအဆက်မပြတ်ရွာသွန်း ခြင်းကြောင့် စပါးစိုက်ခင်းများ ပျက်စီးဆုံးရှုံးမှုနှင့် စတင်ရင်ဆိုင်နေရကြောင်း ပုံးအင်းဒေသခံများက ပြောသည်။

“နဂိုကတည်းက ကျနော်တို့တောင်သူတွေက အရှုံးပေါ်နေပြီးသားပဲ၊ ဒါပေမယ့် ပုံးအင်းမှာက စပါးမစိုက်ရင် လုပ်စားစရာမှ မရှိတာကို၊ ဒါကြောင့် ဒီနှစ်မှာစားလောက်ရုံပဲ စိုက်ခဲ့တာ။ အခုတော့ အားကြိုးမာန်တက် ရက်ရက်နေ့နေ့ ခဲလေသမျှ သဲရေကျ ဖြစ်ကုန်တာပေါ့၊ အခုစိုက်ထားတဲ့ စပါးတွေလည်း အကုန်ပြန်ရမလား မသေချာဘူး။ မိုးထပ်ရွာမှာကိုပဲ စိုးရိမ်နေရတယ်၊ တောင်သူတွေကတော့ ဘာမှ မမျှော်လင့်ရဲတော့ဘူး” ဟု ပုံးအင်းဒေသခံ အသက် ၃၀ ကျော် အမျိုးသားတစ်ဦးက ပြောသည်။

ယမန်နှစ်တွင် ရေကြီးရေလျှံမှု ဖြစ်ပေါ်ခြင်းကြောင့် စပါးခင်းများ ရေမြှုပ်နေချိန်ကာလ၌ ရွှေအပ်၊ ရွှေရင်အေး ဆန်ဈေးမှာ (အလေးချိန် ၄၆ ပေါင်) တစ်အိတ်လျှင် ကျပ်ငွေ နှစ်သိန်းခွဲနီးပါးသော်လည်း လက်ရှိတွင် တစ်အိတ်လျှင် ကျပ်ငွေ တစ်သိန်းသာရသဖြင့် တစ်ဝက်ကျော်ဆုံးရှုံးသည်။

ထိုသို့ သဘာဝဘေးကြောင့် ဆန်းစပါးရောင်းမဝင်သည့် အခြေအနေတွင် စပါးတစ်ဧကမှာ လုပ်အားခနှင့် မြေသြဇာအပါအဝင် ၁၀ သိန်းကျပ်အထိ ကုန်ကျစရိတ်ရှိကြောင်း တောင်သူများက ပြောသည်။

“စိုက်ပျိုးရေး ဦးစီးဌာနနဲ့ မြေစာရင်း ဦးစီးဌာက ဝာာဝန်ယူမှု အားနည်းချက် ရှိနေသရွှေ့ကတော့ စာရင်းအတိအကျနဲ့ တောင်သူတွေ ထိထိရောက်ရောက် ကယ်တင်နိုင်မှာမဟုတ်ဘူး” ဟု ပုံးအင်းဒေသခံ တောင်သူတစ်ဦးကလည်း ထပ်လောင်းပြောသည်။

ပုံးအင်းဒေသသည် ကုန်းခြောက်လေ၊ ရေခြောက်လေ ဒေသဆိုသော်လည်း ယခုနောက်ပိုင်းမှာ ရာသီဥတုဖော်ပြန်မှုကြောင့် လယ်ထွန်ရမည့် ကာလတွင် ရေခြားပါးမှုနှင့် စပါးစိုက်ပျိုးပြီး ကာလတွင် အချိန်အခါမဟုတ် မိုးရွာသွန်းမှုကြောင့် ရေကြီးရေလျှံမှု ပြဿနာများ ကြုံတွေ့လာနေရကြောင်း တောင်သူများက ပြောသည်။