သျှမ်းပြည်မြောက်ပိုင်းရှိ TNLA ထိန်းချုပ်ဒေသ တစ်နေရာတွင် ဗမာပြည်သူ့လွတ်မြောက်ရေးတပ်တော် (BPLA) ၏ အခြေခံစစ်သင်တန်းဆင်းပွဲ အခမ်းအနားကို ကျင်းပပြုလုပ်ခဲ့ကြောင်း သတင်းသိရသည်။

ဇွန်လ (၇) ရက်တွင် TNLA ထိန်းချုပ်ဒေသ တစ်နေရာတွင် ပြုလုပ်ခဲ့သည့် BPLA ၏ အခြေခံစစ်ပညာသင်တန်း အပတ်စဉ် (၉) သင်တန်းဆင်းပွဲသို့ NUG ကျန်းမာရေးနှင့် ပညာရေးဝန်ကြီး ဒေါက်တာဇော်ဝေစိုး၊ PSLF/TNLA အထွေထွေအတွင်းရေးမှူး ဗိုလ်ချုပ်တားဘုန်းကျော်နှင့် BPLA ကွပ်ကဲရေးမှူး မောင်ဆောင်းခ တို့ တက်ရောက်ခဲ့ကြောင်း BPLA ဘက်မှ ယနေ့ (ဇွန်လ ၂၁ ရက်) တွင် ဓာတ်ပုံနှင့်တကွ သတင်းထုတ်ပြန်သည်။

အဆိုပါ စစ်သင်တန်းဆင်းပွဲသို့ ကရင်နီပြည် ကြားကာလအုပ်ချုပ်ရေးကောင်စီ IEC ဒုဥက္ကဋ္ဌ ခွန်းဘီထူး၊ အာရက္ခတပ်တော် AA မှ တပ်မှူးတစ်ဦး၊ ပြည်သူ့လွတ်မြောက်ရေးတပ်တော် PLA မှ စစ်ဦးစီးချုပ်နှင့် အထွေထွေအတွင်းရေးမှူး၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး ABSDF ဒုက္ကဋ္ဌတို့လည်း တက်ရောက်ခဲ့ကြောင်း BPLA ထုတ်ပြန်ချက်အရ သိရသည်။

BPLA စစ်သင်တန်းဆင်းပွဲတွင် တက်ရောက်လာကြသည့် မဟာမိတ်ခေါင်းဆောင်များမှ တော်လှန်ရေးအောင်မြင်ရန် မတူညီသော အင်အားစုများအကြား ညီညွတ်ရေးလိုအပ်ကြောင်း၊ ဟန်ချက်ညီပါက စစ်အာဏာရှင်စနစ် အမြန်အဆုံးသတ်မည်ဖြစ်ကြောင်း ပြောကြားခဲ့သည်ဟု ထုတ်ပြန်ချက်တွင် ရေးသားထားသည်။

ထို့အပြင် BPLA ၏ အမှတ် (၂၀၃) စစ်ဒေသအတွက် တပ်ရင်းသစ်တစ်ခုလည်း တိုးချဲ့ဖွဲ့စည်းနိုင်ခဲ့ပြီး သင်တန်းဆင်း ရဲဘော်များကိုလည်း လက်နက်များ တပ်ဆင်ပေးနိုင်ခဲ့ကြောင်း သိရသည်။

“၁၀၂၇ စစ်ဆင်ရေး” ပထမပိုင်းမှ စတင်ပြီး BPLA တပ်ဖွဲ့သည် ညီနောင်မဟာမိတ် တပ်ဖွဲ့များနှင့်အတူ သျှမ်းပြည်မြောက်ပိုင်း မြို့သိမ်းတိုက်ပွဲများတွင် ပါဝင်တိုက်ခိုက်ခဲ့သည်။

BPLA သည် NUG ၏ ကာကွယ်ရေးဝန်ကြီးဌာန လက်အောက်ခံတပ် မဟုတ်သော်လည်း ယမန်နှစ် ၂၀၂၄ နိုဝင်ဘာလ လဆန်းပိုင်း၌ အညာဒေသတွင် စစ်ဒေသ အသစ်ဖော်ဆောင်သွားမည်ဟု ထုတ်ပြန်ခဲ့သည်။