သျှမ်းပြည် မိုင်းရယ်မြို့နယ်တွင် ကိုးကန့်တပ်ဖွဲ့ MNDAA ထောက်ခံချက်ဖြင့် ရွှေတူးဖေါ်နေသည်ကို ဒေသခံများ ကန့်ကွက်သည့်ကြားမှ ဆက်လက်လုပ်ဆောင်နေကြောင်း စုံစမ်းသိရသည်။

ဇွန်လ ဒုတိယပတ်မှ စတင်ပြီး မိုင်းရယ်မြို့နယ် စလန်းပုန်းထွန်ကျေးရွာအုပ်စုရှိ ကောင်းဝိန်းကျေးရွာ ရေထွက်တောတွင် MNDAA ထောက်ခံချက်ဖြင့် ‘ဝ’ဒေသ မိုင်းမောမြို့ဘက်မှ လာသည့် လုပ်ငန်းရှင် ဦးဆောင်ပြီး ရွှေတူးဖေါ်ရန် လုပ်ဆောင်နေကြောင်း ဒေသခံများက ပြောသည်။

ယခု ရွှေတူးဖော်ရန် လုပ်ဆောင်သည့် နေရာသည် လယ်ယာစိုက်ပျိုးရေးအတွက် ရေအရင်းအမြစ်ရရှိသည့် ရေထွက်ဦးနေရာနှင့် သာသနာ့နယ်မြေ ဖြစ်ခြင်းကြောင့် ဇွန်လ (၁၆) ရက်တွင် သံဃာတော်များနှင့် ရပ်ရွာလူထုမှ သွားရောက်ကန့်ကွက်ခဲ့သော်လည်း ရပ်နားခြင်းမရှိဘဲ ဆက်လက်တူးဖော်နေကြောင်း မိုင်းရယ်ဒေသခံတစ်ဦးက သျှမ်းသံတော်ဆင့်ကို ပြောသည်။
“မိုင်းမောဘက်ကလာတဲ့ ‘ဝ’လောပန်း ဦးဆောင်ပြီး အလုပ်သမား ၇ ယောက် Vigo ကားတစ်စီးနဲ့ ဘတ်ဖိုးကား တစ်စီး လာတယ်။ ကိုးကန့်ဆီက ထောက်ခံစာ တစ်စောင် ပါလာတယ်။ ဒီနယ်မြေက သံဃာနဲ့ ပြည်သူတွေ ထိန်းသိမ်းထားတဲ့ ရေထွက်တောနေရာ ဖြစ်တယ်။ အဲ့တာကို သူတို့က ရွှေတူးဖို့ သစ်ပင်တွေ ခုတ်လိုက်ပြီ”ဟု မိုင်းရယ်ဒေသခံ အမျိုးသားတစ်ဦးက ပြောသည်။

SSPP ထိန်းချုပ်နယ်မြေရှိ လားရှိုးမြို့နယ် နမ့်ပေါင်ကျေးရွာအုပ်စုနှင့် မိုင်းရယ်မြို့နယ် စလန်းပုန်းထွန်ကျေးရွာအုပ်စုကြား ရွှေတူးဖော်ရန် MNDAA ၏ သိန္နီခရိုင် အုပ်ချုပ်ရေးကော်မတီမှ ဇွန်လ ၇ ရက်တွင် အတည်ပြု ထောက်ခံပြီး တံဆိပ်တုံး ရိုက်နှိပ်ပေးထားသည်ကို သျှမ်းသံတော်ဆင့်မှ ရရှိသည့် ၎င်းထောက်ခံစာထဲတွင် တွေ့ရသည်။

ထို့အပြင် ရွှေတူးဖော်မည့် ကောင်းဝိန်းရွာ ရေထွက်တောနေရာသို့ ဇွန်လ (၁၈) ရက်တွင် ဘတ်ဖိုးယာဉ်တစ်စီး ထပ်မံရောက်ရှိလာခြင်းကြောင့် ပြည်သူများမှာ မည်သည့်အဖွဲ့အစည်းထံ တိုင်ကြားရမည်ကို ဝေခွဲမရ ဖြစ်နေကြောင်း ဒေသခံများက ပြောသည်။

“ကိုးကန့်ထောက်ခံချက်နဲ့ ရွှေတူးတာက လယ်စိုက်ဖို့ ရေထွက်နေရာမှာ လာလုပ်တာ။ ပြီးတော့ အဲ့တာက သာသနာ့နယ်မြေလည်း ဟုတ်တယ်။ ရှေ့ရက်က ကိုးကန့်တွေ ဘတ်ဖိုးနောက်တစ်စီး ထပ်တင်လာတယ်၊ သူတို့ကတော့ ရအောင် လုပ်မယ်လို့ ပြောနေတာ။ ပြည်သူတွေလည်း ဘယ်သူ့ကို အားကိုးရမလဲ မသိတော့ဘူး”ဟု ၎င်းဒေသခံ အမျိုးသားက ဆက်ပြောသည်။

အလားတူ ယခုနှစ် မတ်လဆန်းပိုင်းတွင် ကွတ်ခိုင်မြို့နယ် မုံးစီးကျေးရွာအုပ်စုရှိ ပိန်းခမ်ရွာ ရေထွက်တောနေရာ၌ ရွှေတူးဖော်နေသည့် တရုတ်လူမျိုးများနှင့် ကိုးကန့်တပ်ဖွဲ့ MNDAA ကို ရွာသားများမှ သွားရောက်ကန့်ကွက်ခဲ့စဉ်ကလည်း ရုန်းရင်းဆန်ခတ် ဖြစ်ပွားခဲ့သည်။
ထို့နောက် သွားရောက်ကန့်ကွက်သည့် ဒေသခံများကို MNDAA တပ်သားများမှ သေနတ်ဖြင့် ပြန်လည်ပစ်ခတ်ခဲ့ရာ စုစုပေါင်း (၆) ဦး သေဆုံးပြီး (၆) ဦး ဒဏ်ရာရရှိခဲ့ခြင်းကြောင့် သေဆုံးသူများ၏ အသုဘစရိတ်နှင့် ထိခိုက်ဒဏ်ရာရသူများအတွက် ဆေးကုသစရိတ်တို့ကို တာဝန်ယူပေးရပြီး ရွှေတူးဖော်မှုကိုလည်း ရပ်နားခဲ့ရကြောင်း မုံးစီးဒေသခံများထံမှ သိရသည်။

ပြီးခဲ့သည့် ဇွန်လ (၁၇) ရက်တွင် လားရှိုးမြို့နယ် နမ့်ပေါင်ကျေးရွာအနီး သံလွင်ကျေးရွာတွင် SSPP နှင့် MNDAA နှစ်ဘက်အရာရှိများ ဒုတိယအကြိမ် တွေ့ဆုံဆွေးနွေးခဲ့ရာ SSPP ထိန်းချုပ် မိုင်းရယ်၊ နမ့်ပေါင်နှင့် ဆင်ကျော့အနီးတဝိုက်တွင် MNDAA မှ တပ်သားစုဆောင်းခြင်း၊ အုပ်ချုပ်ရေးချမှတ်ခြင်းနှင့် အခွန်(ဆတ်ကြေး) ကောက်ခံခြင်း မပြုလုပ်ရန် သဘောတူညီမှု ရရှိခဲ့ကြောင်း စစ်ရေးသတင်းရင်းမြစ်ထံမှ သိရသည်။

ပုံစာ – မိုင်းရယ်မြို့နယ် စလန်းပုန်းထွန်ကျေးရွာအုပ်စုတွင် MNDAA ထောက်ခံချက်ဖြင့် ရွှေတူးဖော်သည့်နေရာကို ဒေသခံသံဃာတော်များ သွားရောက်ကန့်ကွက်စဉ် (ဓာတ်ပုံ – ဒေသခံ ပေးပို့)