ထိုင်း-မြန်မာနယ်စပ် တာချီလိတ်မြို့တွင် ရွှေဆိုင်များအပါအဝင် စီးပွားရေးလုပ်ငန်းပေါင်းများစွာ ပိုင်ဆိုင်ထားသည့် ကြီးမြတ်သောရွှေမြင်း ရွှေဆိုင်လုပ်ငန်းရှင် အားချန် (ခ) စီမာဘင် ကို မူးယစ်ရာဇာအဖြစ် ဖမ်းဝရမ်းထုတ်ပြီး ရှာဖွေနေကြောင်း ထိုင်းနိုင်ငံ မူးယစ်ဆေးဝါး တားဆီးနှိမ်နှင်းရေးဘုတ်အဖွဲ့ (Office Of the Narcotics Control Board – ONCB) က ထုတ်ပြန်လိုက်သည်။

ထိုင်းနိုင်ငံ ချင်းရိုင်းခရိုင်ရှိ အားချန် (ခ) စီမာဘင်၏ နေအိမ် (၂) လုံး၊ မြေကွက် (၂) ကွက်၊ ကား (၁) စီးနှင့် နာရီ (၁) လုံး စုစုပေါင်း ဘတ် ၁၅ ဒဿမ ၁ သန်း တန်ဖိုးရှိ ပိုင်ဆိုင်မှုများကိုလည်း ထိုင်းရဲတပ်ဖွဲ့က သိမ်းဆည်းထားကြောင်း ထုတ်ပြန်ထားသည်။

ပြီးခဲ့သည့် ဇန်နဝါရီလ ၁၀ ရက်နေ့တွင် ဘန်ကောက်မြို့မှ သံသယရှိသူ ၈ ဦးကို သက်သေအဖြစ် မက်သာဖက်တမင်း ဆေးပြား သုံးသန်းခန့်ဖြင့် ဖမ်းဆီးနိုင်ခဲ့ပြီး ၎င်းတို့အား စစ်ဆေးမှုများအရ ၎င်းမူးယစ်မှောင်ခိုဂိုဏ်းအား ထိန်းချုပ်သူမှာ တာချီလိတ်မြို့ရှိ လုပ်ငန်းရှင် မစ္စတာအားချန် (ခ) စီမာဘင် ဖြစ်ကြောင်း ယမန်နေ့ ဇွန်လ ၁၈ ရက်၌ ထိုင်းနိုင်ငံ ချင်းရိုင်းမြို့တွင် ပြုလုပ်သော သတင်းစာရှင်းလင်းပွဲတွင် ပြောကြားခဲ့သည်။

တာချီလိတ်မြို့ရှိ ရွှေဆိုင်လုပ်ငန်းရှင် မစ္စတာအားချန် (ခ) စီမာဘင်သည် တာချီလိတ်ခရိုင်၊ ထိုင်းနိုင်ငံ ချင်းရိုင်ခရိုင် မယ်ဆိုင်မြို့နယ်တို့မှ မူးယစ်ဆေးဝါးများ ခိုးသွင်းကာ ထိုင်းနိုင်ငံအနှံ့အပြား အပါအဝင် ပြည်နိုင်ငံများသို့ မူးယစ်းဆေးဝါး ဖြန့်ဖြူးနေသူ ဖြစ်ကြောင်း ဆိုသည်။

လက်ရှိတွင် မစ္စတာအားချန် (ခ) စီမာဘင်ကို သက်သေများနှင့်တကွ ချင်းရိုင်းခရိုင် တရားရုံးမှ မေလ ၃၀ ရက်စွဲဖြင့် ဖမ်းဝရမ်းထုတ်ထားကြောင်း ထိုင်းရဲအရာရှိများက ပြောသည်။

ထိုင်းရဲတပ်ဖွဲ့ အလိုရှိနေသည့် မစ္စတာအားချန် (ခ) စီမာဘင်သည် မြန်မာဘက်ခြမ်း တာချီလိတ်မြို့၌ ပုန်းအောင်းနေသဖြင့် မြန်မာအာဏာပိုင်များနှင့် ညှိနှိုင်းလုပ်ဆောင်သွားရန် စီစဉ်နေကြောင်းလည်း ထိုင်းသတင်းများတွင် ဖော်ပြထားသည်။