သျှမ်းပြည် နောင်ချိုမြို့နယ်ရှိ ချိုခမ်းဘုန်းကြီးကျောင်းအနီး လယ်ထဲတွင် ခိုလှုံနေသည့် စစ်ဘေးရှောင်များသည် ဘေးလွတ်ရာသို့ ထပ်မံတိမ်းရှောင်ရန် ထွက်ခွာနေစဉ် သေနတ်ပစ်ခတ်ခံရပြီး အမျိုးသားတစ်ဦး ဒဏ်ရာရရှိခဲ့ကြောင်း စုံစမ်းသိရသည်။

ယမန်နေ့ (ဇွန်လ ၁၇ ရက်) နံနက် ၉ နာရီခန့်တွင် နောင်ချိုမြို့နယ် အုမ္မသီးလမ်းခွဲကျေးရွာ လယ်ထဲရှိ တဲများတွင် ခိုလှုံနေသည့် စစ်ဘေးရှောင်များသည် ဘေးလွတ်ရာသို့ ထပ်မံတိမ်းရှောင်ရန် ထွက်ခွာနေစဉ် ချိုခမ်းဘုန်းကြီးကျောင်းအနီး စခန်းချနေရာယူထားသည့် လက်နက်ကိုင်တပ်ဖွဲ့ဝင်မှ သေနတ်ပစ်ခတ်ခဲ့ရာ စစ်ဘေးရှောင် အမျိုးသားတစ်ဦးကို ထိမှန်ခဲ့ကြောင်း ဒေသခံများက ပြောသည်။

“စစ်ဘေးရှောင်တစ်ယောက် ဘုန်းကြီးကျောင်းနား လယ်ထဲက တဲနားမှာ ပစ္စည်းသယ်နေတာ၊ အဖွဲ့အစည်းက ဘုန်းကြီးကျောင်းဘက်ကနေ သေနတ်ပစ်လာတော့ ဗိုက်ပေါက်သွားတယ်။ တခြားနေရာ ထပ်ရှောင်ဖို့ လုပ်နေတုန်း ပစ်ခံရတာ၊ လက်မှာလည်း ထိတယ်။ အခု ပြင်ဦးလွင်ဘက်က ဆေးရုံကို ခေါ်သွားပြီ”ဟု ဖြစ်စဉ်သိရှိသူ နောင်ချိုစစ်ဘေးရှောင်တစ်ဦးက သျှမ်းသံတော်ဆင့်ကို ပြောသည်။

လယ်ထဲမှ ဘေးလွတ်ရာသို့ ထပ်မံတိမ်းရှောင်ရန် ထွက်ခွာနေစဉ် သေနတ်ပစ်ခတ်ခံရသူမှာ အုမ္မသီးလမ်းခွဲရွာနေ အသက် (၃၈) နှစ်အရွယ် အိုက်မွန် ဆိုသူဖြစ်ပြီး ပြင်ဦးလွင်မြို့တွင် ဆေးကုသလျက်ရှိကာ ဆေးဖိုးဝါးခများ အကူအညီ လိုအပ်လျက်ရှိကြောင်း စစ်ဘေးရှောင်များထံမှ သိရသည်။

နောင်ချိုမြို့နယ် ဆမ္မဆယ်နှင့် အုမ္မခါးကျေးရွာအုပ်စုတွင် စစ်ဘေးရှောင်များ သေနတ်ပစ်ခံရပြီး သေဆုံးဒဏ်ရာရခြင်းသည် ယခုတစ်ကြိမ်ဆိုလျှင် တတိယအကြိမ်ဖြစ်သည်။
ပြီးခဲ့သည့် မေလ ၁၈ ရက်တွင် ၎င်းချိုခမ်းဘုန်းကြီးကျောင်းထဲတွင် ခိုလှုံနေသည့် အမျိုးသားတစ်ဦး စနိုက်ဘာပစ်ခတ်ခံရပြီး အမျိုးသားတစ်ဦး ပွဲချင်းပြီး သေဆုံးခဲ့ရာ စစ်ကောင်စီတပ်မှ ပစ်ခတ်ခဲ့ကြောင်း TNLA သတင်းနှင့် ပြန်ကြားရေးဌာနမှ မေလ ၁၉ ရက်တွင် သတင်းထုတ်ပြန်ထားသည်။
အလားတူ မေလ ၁၄ ရက်တွင်လည်း နောင်ချိုမြို့နယ် ဆမ္မကျေးရွာအုပ်စု ရေမောင်းတန်းကျေးရွာတွင် လင်မယားနှစ်ဦးမှ ငှက်ပျောပင်ခုတ်ရန် နေအိမ်မှ ထွက်ခွာလာစဉ် နေအိမ်များထဲ ပုန်းအောင်းနေသည့် လက်နက်ကိုင်တပ်ဖွဲ့ဝင်မှ စနိုက်ဘာဖြင့် ပစ်ခတ်ခဲ့ရာ အသက် ၅၅ နှစ်အရွယ် စိုင်းညွန့်၏ ရင်ဘတ်ထိမှန်၍ ပွဲချင်းပြီး သေဆုံးသွားခဲ့ကြောင်း ဒေသခံများက ပြောသည်။

ထို့ကြောင့် မေလ ၂၁ ရက်မှ စတင်ပြီး နောင်ချိုမြို့နယ် အုမ္မသီးလမ်းခွဲကျေးရွာရှိ ချိုခမ်းဘုန်းကြီးကျောင်းတွင် ခိုလှုံနေသည့် စစ်ဘေးရှောင်များကို လုံခြုံရေးအကြောင်းပြချက်ဖြင့် ဘေးလွတ်ရာသို့ ရွှေ့ပြောင်းရန် TNLA ဘက်မှ ပြောဆိုခဲ့သည်။

နောင်ချိုမြို့နယ် ဆမ္မဆယ်နှင့် အုမ္မခါး ကျေးရွာအုပ်စုတို့တွင် TNLA ၊ PDF ပူးပေါင်းတပ်ဖွဲ့နှင့် စစ်ကောင်စီတပ်တို့ အနီးကပ် စစ်ရေးတင်းမာနေပြီး လက်နက်ကြီးအပြင် ဒရုန်းများဖြင့် နှစ်ဘက်အပြန်အလှန် နေ့စဉ်ပစ်ခတ် တိုက်ခိုက်နေခြင်းကြောင့် ချိုခမ်းဘုန်းကြီးကျောင်းရှိ ဇရပ်ဆောင်များလည်း မီးလောင်ပျက်စီးခဲ့ကြောင်း စစ်ဘေးရှောင်များက ပြောသည်။