သျှမ်းပြည် လားရှိုးမြို့ ရပ်ကွက် ၃ တွင် လမ်းလျှောက်လာသူ အမျိုးသားတစ်ဦးကို သတင်းအရ ရပ်တန့်စစ်ဆေးရာမှ မူးယစ်ဆေးဝါးများဖမ်းဆီးရမိကြောင်း သတင်းသိရသည်။

ဇွန်လ ၁၀ ရက်နေ့တွင် မူးယစ်ဆေးဝါး တားဆီးနှိမ်နင်းရေး ရဲတပ်ဖွဲ့မှ သတင်းအရ သက်သေများနှင့်အတူ သိန်းစိုးအောင် (ခ) အားဝေအား စစ်ဆေးရှာဖွေရာမှ စိတ်ကြွရူးသွပ်ဆေးပြား ၃၀,၀၀၀ ပြားနှင့် လက်ကိုင်ဖုန်း ၁ လုံးကို သိမ်းဆည်းရမိကြောင်း CCDAC Myanmar က ယမန်နေ့ ၁၂ ရက်နေ့တွင် သတင်းထုတ်ပြန်သည်။

ထို့အပြင် ကွင်းဆက်ဖော်ထုတ်ချက်အရ လားရှိုးမြို့ ရပ်ကွက် (၇)တွင် နေထိုင်သော လောဝ်ဝူ (ခ) လီမင်ချန်ကိုလည်း စိတ်ကြွရူးသွပ်ဆေးပြား ၂၀,၈၀၀ ပြား၊ ဘိန်းဖြူ အလေးချိန် ၁၁၀ ဂရမ်၊ လက်ကိုင်ဖုန်း ၁ လုံးနှင့်အတူ ၎င်းနေအိမ်၌ သိမ်းဆည်းရမိကြောင်း သိရသည်။

၎င်းတို့ နှစ်ဦးထံမှ သိမ်းဆည်းရမိသော စိတ်ကြွရူးသွပ်ဆေးပြား ၃၀,၀၀၀ ပြားမှာ ဒေသကာလပေါက်ဈေး တန်းဖိုးငွေကျပ် ၁၅၀ သိန်းရှိပြီး စိတ်ကြွရူးသွပ်ဆေးပြား ၂၀,၈၀၀ ပြားမှာ တန်ဖိုးငွေ ကျပ် ၁၀၄ သိန်းနှင့် ဘိန်းဖြူ အလေးချိန် ၁၁၀ ဂရမ်မှာ တန်ဖိုးငွေကျပ် ၂၂ သိန်းရှိကြောင်း CCDAC Myanmar ကဖော်ပြထားသည်။

သိန်းစိုအောင် (ခ) အားဝေ အသက် ၂၉ နှစ်နှင့် လောဝ်ဝူ (ခ) လီမင်ချိန် အသက် ၃၆ နှစ်တို့အား လားရှိုးမြို့မ ရဲစခန်းတွင် မူးယစ်ဆေးဝါးနှင့် စိတ်ပြောင်းလဲစေသော ဆေးဝါးများဆိုင်ရာ ဥပဒေအရ အမှုဖွင့်အရေယူထားကြောင်း သိရသည်။