သျှမ်းတောင်၊ ကလောမြို့ရှိ ကလောချောင်း ယနေ့ (ဇွန်လ ၁၂ ရက်) ညနေပိုင်းက ရေပြန်တက်လာသဖြင့် ရေကြီးမှုများ ဖြစ်ပွားမည်ကို စိုးရိမ်နေရကြောင်း ဒေသခံပြည်သူများက ယနေ့နေ့ညပိုင်းတွင် ပြောသည်။

ပြီးခဲ့သည့် ရက်ပိုင်းက အဆက်မပြတ် ရွာသွန်းနေသည့် မိုးကြောင့် ချောင်းရေ မြင့်တက်လာရာ မြို့လယ်ပိုင်း ရပ်ကွက် (၄) ရှိ ခရီးသွားများကြား ကျော်ကြားသည့် ပလောင်းဈေး နေရာ ရေဝင်ရောက်နေပြီး၊ ရပ်ကွက် (၂) စခန်းသာ နှင့် ရပ်ကွက် (၃) ချောင်းဘေး နေအိမ်များ စောင့်ကြည့်နေရသည်ဟု မြို့ခံ တဦးက ဆိုသည်။

“နာမည် ထည့်မရေးပါနဲ့။ မနေ့က စည်ပင်ခန်းမမှာ ချောင်းဘေး နေတဲ့သူတွေ အစည်းအဝေးခေါ်တယ်။ ချောင်းထဲ အမှိုက်မပစ်ဖို့ပြောတယ်ပါ့။ အဓိက ပြောတာက CB ခင်မောင်အေး နဲ့ သောင်းရွှေ (CB BANK ပိုင်ရှင်နှင့် တပည့် အိမ်ယာဖော်ဆောင်သူ) တို့က သိန်းထောင်ပေါင်းများစွာ အကုန်ခံ ချောင်းချဲ့ထားပေးတယ်။ ရေလုံးဝမတက်တော့ဘူးပေါ့။ အဲတော့ ချောင်းထဲ အမှိုက် အပြစ်ပါနဲ့” အဲဒါ” ဟု မြို့ခံ တဦးက ဆိုသည်။

ယမန်နေ့က ယင်းသို့ ခေါ်ပြောပြီးနောက် ယခု ချောင်းရေတက်လာသဖြင့် အထုတ် ပြင်ထားရသည်ဟု ၎င်းကဆိုသည်။
နောက်ဆုံး မေးမြန်းမှုများအရ ချောင်းရေ ဆက်တက်မည်ကို စိုးရိမ်၍ ပစ္စည်း ရွှေ့ပြောင်းသများ ရှီနေပြီး စောင့်ကြည့်နေဆဲ ဖြစ်ကြောင်း ဆိုသည်။
“ခုက ရေပြန်တက်လာတာ၊ ရပ်ကွက် ၄ ထဲရေလျှံလာပြီ။ ရေတက်တာက မြန်တယ်။ အရင်လို ထပ်ဖြစ်ရင် မလွယ်ဘူး” ဟု ရပ်ကွက် (၄) ချောင်းဘေးနေ အမျိုးသမီးတစ်ဦးက ပြောသည်။

ကလောချောင်း တိုးချဲ့မှု၊ ချောင်းအထက်ပိုင်း သစ်ပင်ခုတ်မှုများကြောင့် မြေပြိုမှု စသည်ဖြင့် ပြသနာများစွာ ရှိနေသည်ဖြစ်ရာ ယင်းအချက်အလက်များကို သျှမ်းသံတော်ဆင့် အနေဖြင့် မေးမြန်းစုဆောင်းနေဆဲ ဖြစ်သည်။

ပင်လယ်ရေမျက်နှာပြင်အထက် ပေ ၄၂၈၀ တွင် တည်ရှိသော ကလောမြို့ရှိ ကလောချောင်း ပြီးခဲ့သည့်နှစ်က ရေကြီး ရေလျှံမှု ဖြစ်ပွားရာ ရာနှင့်ချီသည့် နေအိမ်များ လုံးဝ ပျက်စီးမျှောပါသွားပြီး ပြည်သူ ၂၀၀၀ ကျော် ရေဘေးသင့်ခဲ့ကြောင်း၊ ရေဘေးကြောင့် ကလောမြို့ပေါ်တွင် သေဆုံးသူ ၁၃ ဦးရှိခဲ့ကြောင်း ဒသခံ လူမှုကူညီရေးအသင်း ပြောဆို ထုတ်ပြန်ထားသည်။