သျှမ်းပြည်တောင်ပိုင်း၊ ညောင်ရွှေမြို့နယ် အင်းလေးထဲတွင် ရုတ်တရက် ရေမျက်နှာပြင် ၉ ပေခန့် မြင့်တက်လာသဖြင့် မြေပဲစိုက်ခင်းများ ရေမြှုပ်ပျက်စီးသွားကြောင်း စုံစမ်းသိရှိရသည်။

ပြီးခဲ့သည့် ဇွန်လ (၉) ရက်နေ့မှ စပြီး ယနေ့အထိ မိုးအဆက်မပြတ် ရွာသွန်းနေသောကြောင့် အင်းလေးဒေသတွင် ရုတ်တရက် ရေ (၄)ပေခန့် မြင့်တက်လာနေပြီး ဒေသခံများစိုက်ပျိုးထားသည့် မြေပဲခင်း၊ ဖရုံခင်းနှင့် စပါးခင်းများလည်း ပျက်စီးဆုံးရှုံးသွားကြောင်း သိရသည်။

မြေပဲ စိုက်ပျိုးရာတွင် သုံးလ အချိန်ယူ စိုက်ပျိုးရပြီး မြေပဲရိတ်သိမ်းရန် (၇)ရက်အလိုတွင် ရေနစ်မြှုပ်သွားသဖြင့် ကျပ်သိန်း(၂၀)ကျော်ဖိုး ဆုံးရှုံးသွားကာ နောက်ထပ်စိုက်ပျိုးရန် အရင်းအနှီးမရှိတော့ကြောင်း အင်းလေးရှိ မြေပဲစိုက်ပျိုးသူတစ်ဦးက ပြောသည်။

“ငလျင်လှုပ်ပြီးကတည်းက ကုန်စိမ်းဈေးက အရမ်းထိုးကျတာ။ အခုမှ နည်းနည်းပြန်တက်လာတုန်း ရှိသေးတယ်။ ရေတက်တာ စောတော့ မရိတ်သိမ်းခင်မှာ မြှုပ်သွားတာ။ စားသောက်ဖို့အတွက် ဒီကုန်စိမ်းကိုပဲ အားကိုးအားထားရတာ၊ ခုတော့ ဘာမျှော်လင့်ချက်မှ မရှိတော့ဘူး။ အရင်းအနှီးလည်း မရှိတော့ဘူး” ဟု အင်းလေး ဒေသခံ တစ်ဦးက ပြောသည်။

ထိုကဲ့သို့ အင်းလေးဒေသတွင် ရေမြင့်တက်လာပြီး ယခင်ထက် ရေကြီးရေလျှံမှု ဖြစ်လာနိုင်သောကြောင့် စိုက်ခင်းအများအပြား ပျက်စီးနိုင်ပြီး အင်းလေးဒေသရှိ နေအိမ်တိုင်းတွင် လှေများကို ပြင်ဆင်ထားခြင်း၊ အရေးကြီး စာရွက်စာတမ်းများပြင်ဆင်ထားခြင်း၊ မီးသွေးနှင့် ထင်းများကို ဝယ်ယူထားခြင်းတို့ လုပ်ဆောင်နေကြသည်ဟု ၎င်းက ဆက်ပြောသည်။

ဆက်လက်ပြီး ယမန်နေ့ ဇွန်လ (၁၁)ရက်တွင်လည်း တောင်ကြီးမြို့၊ ညောင်ရွှေမြို့၊ ရွှေညောင်မြို့နှင့် ရပ်စောက်မြို့တို့တွင် မိုးအဆက်မပြတ် ရွာသွန်းကာ ရေကြီးရေလျှံမှုများ ဖြစ်ပွားခဲ့ပြီး မြေနိမ့်ပိုင်းတွင် နေထိုင်သူများ ပြောင်းရွှေ့နေထိုင်ကြရကြောင်း သိရသည်။

“မနေ့က တောင်ကြီးမှာ ရေတအားကြီးတာ၊ ဆိုင်ကယ် တစ်ချို့ဆိုလည်း ရေမြှုပ်သွားတာ။ အိုးရှင်းနားက ဈေးသည်တွေဆို သူတို့ ကုန်ပစ္စည်း တစ်ချို့တောင် ရေထဲပါသွားတာ။ တောင်ကြီးက ရေကြီးပြီဆို တောင်အောက်က မြို့တွေဆိုလည်း ရေကြီးတာပဲ။ ရပ်စောက်မှာဆို မြေနိမ့်ပိုင်းက နေအိမ်တွေ ရွှေ့ပြောင်းရတယ်တဲ့။ သစ်တောတွေ မရှိတော့တာနဲ့ ရာသီဥတု ဖောက်ပြန်တာကြောင့် ရေကြီးတာထင်တယ်” ဟု တောင်ကြီးမြို့ခံ အမျိုးသမီးတစ်ဦးက ပြောသည်။

ယခုရက်ပိုင်းအတွင်း သျှမ်းပြည်တွင် မိုးများ ရက်ဆက်ရွာသွန်းနေသောကြောင့် တောင်ကြီးမြို့ ရပ်ကွက်တစ်ချို့အပြင် မောက်မယ်မြို့ရှိ နမ့်ယွန်းချောင်း ရေမြင့်တက်လာကာ မြို့ပေါ်ရပ်ကွက်များ ရေနစ်မြှုပ်ကာ အကူအညီလိုအပ်နေကြောင်း သိရသည်။