သျှမ်းပြည် နမ့်ခမ်း၊ နမ္မတူနှင့် ကွတ်ခိုင်မြို့နယ်များတွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA မှ ဖမ်းဆီးရမိသည့် ကျားဖြန့်လုပ်ကိုင်သူ အမျိုးသား (၁၂) ဦးကို တရုတ်နိုင်ငံ ရဲတပ်ဖွဲ့ထံ လွှဲပြောင်းပေးခဲ့ကြောင်း သတင်းသိရသည်။
ယမန်နေ့ (ဇွန်လ ၁၀ ရက်) နံနက် ၉ နာရီတွင် နမ့်ခမ်း၊ နမ္မတူနှင့် ကွတ်ခိုင်မြို့နယ်များအတွင်း ဖမ်းဆီးရမိသည့် ကျားဖြန့်လုပ်ကိုင်သူ အမျိုးသား (၁၂) ဦးကို TNLA ထိန်းချုပ်ထားသည့် မြန်မာ-တရုတ် နယ်စပ်တစ်နေရာ၌ တရုတ်နိုင်ငံ ရဲတပ်ဖွဲ့ထံ လွှဲပြောင်းပေးခဲ့ကြောင်း TNLA သတင်းနှင့် ပြန်ကြားရေးဌာနမှ သတင်းထုတ်ပြန်ခဲ့သည်။
TNLA မှ တရုတ်ရဲတပ်ဖွဲ့ထံ လွှဲပြောင်းပေးလိုက်သည့် ကျားဖြန့်လုပ်ကိုင်သူ (၁၂) ဦးမှာ နမ့်ခမ်းမြို့နယ်မှ (၄) ဦးနှင့် ကွတ်ခိုင်မြို့နယ်မှ (၅) ဦးတို့ကို စစ်ဆေးရေးဂိတ်တွင် ဖမ်းဆီးရမိသူများဖြစ်ပြီး နမ္မတူမြို့နယ်မှ (၃) ဦးသည် ကျားဖြန့်လုပ်ငန်းလုပ်ရန် စီစဉ်နေချိန် သတင်းရရှိပြီး သွားရောက်စစ်ဆေး ဖမ်းဆီးခဲ့ခြင်းဖြစ်ကြောင်း သိရသည်။
ထိုအထဲတွင် (၁) ဦးသည် ခြေထောက်တွင် ဒဏ်ရာရရှိထားခြင်းကြောင့် ဆေးကုသပေးနေစဉ် လူမှုကူညီရေးယာဉ်ဖြင့် တရုတ်ရဲတပ်ဖွဲ့ထံ လွှဲပြောင်းပေးခဲ့သည်ဟု ဓာတ်ပုံနှင့်တကွ ထုတ်ပြန်ချက်တွင် ဖော်ပြထားသည်။
တအာင်း(ပလောင်) အမျိုးသားလွတ်မြောက်ရေးတပ်မတော် TNLA နှင့် ကိုးကန့်တပ်ဖွဲ့ MNDAA တို့ အဖွဲ့ဝင်ဖြစ်သည့် ညီနောင်မဟာမိတ် (၃) ဖွဲ့တို့သည် မြန်မာ-တရုတ် နယ်စပ်တလျှောက် ကျားဖြန့်တိုက်ဖျက်ရေး ခေါင်းစဉ်ဖြင့် “၁၀၂၇ စစ်ဆင်ရေး”ကို ဆင်နွှဲခဲ့သော်လည်း ကျားဖြန့်လုပ်ငန်းများမှာ ပပျောက်သွားခြင်း မရှိဘဲ သျှမ်းပြည်အတွင်းရှိ လက်နက်ကိုင်နှင့် ပြည့်သူ့စစ် ထိန်းချုပ်နေရာအသီးသီးသို့ ရွှေ့ပြောင်းလုပ်ကိုင်နေကြောင်း ဒေသခံများထံမှ သိရသည်။
Leave a Comments